১২. লোহিচ্চসুত্তৱণ্ণনা

লোহিচ্চব্ৰাহ্মণৱত্থুৱণ্ণনা

৫০১. এৱং মে সুতং…পে… কোসলেসূতি লোহিচ্চসুত্তং. তত্ৰাযং অনুত্তানপদৱণ্ণনা. সালৱতিকাতি তস্স গামস্স নামং, সো কিৰ ৱতিযা ৱিয সমন্ততো সালপন্তিযা পৰিক্খিত্তো. তস্মা সালৱতিকাতি ৱুচ্চতি. লোহিচ্চোতি তস্স ব্ৰাহ্মণস্স নামং.

৫০২-৫০৩. পাপকন্তি পৰানুকম্পা ৱিৰহিতত্তা লামকং, ন পন উচ্ছেদসস্সতানং অঞ্ঞতৰং. উপ্পন্নং হোতীতি জাতং হোতি, ন কেৱলঞ্চ চিত্তে জাতমত্তমেৱ. সো কিৰ তস্স ৱসেন পৰিসমজ্ঝেপি এৱং ভাসতিযেৱ. কিঞ্হি পৰো পৰস্সাতি পৰো যো অনুসাসীযতি, সো তস্স অনুসাসকস্স কিং কৰিস্সতি. অত্তনা পটিলদ্ধং কুসলং ধম্মং অত্তনাৱ সক্কত্ৱা গৰুং কত্ৱা ৱিহাতব্বন্তি ৱদতি.

৫০৪-৪০৭. ৰোসিকং ন্হাপিতং আমন্তেসীতি ৰোসিকাতি এৱং ইত্থিলিঙ্গৱসেন লদ্ধনামং ন্হাপিতং আমন্তেসি. সো কিৰ ভগৱতো আগমনং সুত্ৱা চিন্তেসি – ‘‘ৱিহাৰং গন্ত্ৱা দিট্ঠং নামং ভাৰো, গেহং পন আণাপেত্ৱা পস্সিস্সামি চেৱ যথাসত্তি চ আগন্তুকভিক্খং দস্সামী’’তি, তস্মা এৱং ন্হাপিতং আমন্তেসি.

৫০৮. পিট্ঠিতো পিট্ঠিতোতি কথাফাসুকত্থং পচ্ছতো পচ্ছতো অনুবন্ধো হোতি. ৱিৱেচেতূতি ৱিমোচেতু, তং দিট্ঠিগতং ৱিনোদেতূতি ৱদতি. অযং কিৰ উপাসকো লোহিচ্চস্স ব্ৰাহ্মণস্স পিযসহাযকো. তস্মা তস্স অত্থকামতায এৱমাহ. অপ্পেৱ নাম সিযাতি এত্থ পঠমৱচনেন ভগৱা গজ্জতি, দুতিযৱচনেন অনুগজ্জতি. অযং কিৰেত্থ অধিপ্পাযো – ৰোসিকে এতদত্থমেৱ মযা চত্তাৰি অসঙ্খ্যেয্যানি. কপ্পসতসহস্সঞ্চ ৱিৱিধানি দুক্কৰানি কৰোন্তেন পাৰমিযো পূৰিতা, এতদত্থমেৱ সব্বঞ্ঞুতঞ্ঞাণং পটিৱিদ্ধং, ন মে লোহিচ্চস্স দিট্ঠিগতং ভিন্দিতুং ভাৰোতি, ইমমত্থং দস্সেন্তো পঠমৱচনেন ভগৱা গজ্জতি. কেৱলং ৰোসিকে লোহিচ্চস্স মম সন্তিকে আগমনং ৱা নিসজ্জা ৱা অল্লাপসল্লাপো ৱা হোতু, সচেপি লোহিচ্চসদিসানং সতসহস্সস্স কঙ্খা হোতি, পটিবলো অহং ৱিনোদেতুং লোহিচ্চস্স পন একস্স দিট্ঠিৱিনোদনে ময্হং কো ভাৰোতি ইমমত্থং দস্সেন্তো দুতিযৱচনেন ভগৱা অনুগজ্জতীতি ৱেদিতব্বো.

লোহিচ্চব্ৰাহ্মণানুযোগৱণ্ণনা

৫০৯. সমুদযসঞ্জাতীতি সমুদযস্স সঞ্জাতি ভোগুপ্পাদো, ততো উট্ঠিতং ধনধঞ্ঞন্তি অত্থো. যে তং উপজীৱন্তীতি যে ঞাতিপৰিজনদাসকম্মকৰাদযো জনা তং নিস্সায জীৱন্তি. অন্তৰাযকৰোতি লাভন্তৰাযকৰো. হিতানুকম্পীতি এত্থ হিতন্তি ৱুড্ঢি. অনুকম্পতীতি অনুকম্পী, ইচ্ছতীতি অত্থো, ৱুড্ঢিং ইচ্ছতি ৱা নো ৱাতি ৱুত্তং হোতি. নিৰযং ৱা তিৰচ্ছানযোনিং ৱাতি সচে সা মিচ্ছাদিট্ঠি সম্পজ্জতি, নিযতা হোতি, একংসেন নিৰযে নিব্বত্ততি, নো চে, তিৰচ্ছানযোনিযং নিব্বত্ততীতি অত্থো.

৫১০-৫১২. ইদানি যস্মা যথা অত্তনো লাভন্তৰাযেন সত্তা সংৱিজ্জন্তি ন তথা পৰেসং, তস্মা সুট্ঠুতৰং ব্ৰাহ্মণং পৱেচেতুকামো ‘‘তং কিং মঞ্ঞসী’’তি দুতিযং উপপত্তিমাহ. যে চিমেতি যে চ ইমে তথাগতস্স ধম্মদেসনং সুত্ৱা অৰিযভূমিং ওক্কমিতুং অসক্কোন্তা কুলপুত্তা দিব্বা গব্ভাতি উপযোগত্থে পচ্চত্তৱচনং, দিব্বে গব্ভেতি অত্থো. দিব্বা, গব্ভাতি চ ছন্নং দেৱলোকানমেতং অধিৱচনং. পৰিপাচেন্তীতি দেৱলোকগামিনিং পটিপদং পূৰযমানা দানং, দদমানা, সীলং ৰক্খমানা, গন্ধমালাদীহি, পূজং কুৰুমানা ভাৱনং ভাৱযমানা পাচেন্তি ৱিপাচেন্তি পৰিপাচেন্তি পৰিণামং গমেন্তি. দিব্বানং ভৱানং অভিনিব্বত্তিযাতি দিব্বভৱা নাম দেৱানং ৱিমানানি, তেসং নিব্বত্তনত্থাযাতি অত্থো. অথ ৱা দিব্বা গব্ভাতি দানাদযো পুঞ্ঞৱিসেসা. দিব্বা ভৱাতি দেৱলোকে ৱিপাকক্খন্ধা, তেসং নিব্বত্তনত্থায তানি পুঞ্ঞানি কৰোন্তীতি অত্থো. তেসং অন্তৰাযকৰোতি তেসং মগ্গসম্পত্তিফলসম্পত্তিদিব্বভৱৱিসেসানং অন্তৰাযকৰো. ইতি ভগৱা এত্তাৱতা অনিযমিতেনেৱ ওপম্মৱিধিনা যাৱ ভৱগ্গা উগ্গতং ব্ৰাহ্মণস্স মানং ভিন্দিত্ৱা ইদানি চোদনাৰহে তযো সত্থাৰে দস্সেতুং ‘‘তযো খো মে, লোহিচ্চা’’তিআদিমাহ.

তযো চোদনাৰহৱণ্ণনা

৫১৩. তত্থ সা চোদনাতি তযো সত্থাৰে চোদেন্তস্স চোদনা. ন অঞ্ঞা চিত্তং উপট্ঠপেন্তীতি অঞ্ঞায আজাননত্থায চিত্তং ন উপট্ঠপেন্তি. ৱোক্কম্মাতি নিৰন্তৰং তস্স সাসনং অকত্ৱা ততো উক্কমিত্ৱা ৱত্তন্তীতি অত্থো. ওসক্কন্তিযা ৱা উস্সক্কেয্যাতি পটিক্কমন্তিযা উপগচ্ছেয্য, অনিচ্ছন্তিযা ইচ্ছেয্য, একায সম্পযোগং অনিচ্ছন্তিযা একো ইচ্ছেয্যাতি ৱুত্তং হোতি. পৰম্মুখিং ৱা আলিঙ্গেয্যাতি দট্ঠুম্পি অনিচ্ছমানং পৰম্মুখিং ঠিতং পচ্ছতো গন্ত্ৱা আলিঙ্গেয্য. এৱংসম্পদমিদন্তি ইমস্সাপি সত্থুনো ‘‘মম ইমে সাৱকা’’তি সাসনা ৱোক্কম্ম ৱত্তমানেপি তে লোভেন অনুসাসতো ইমং লোভধম্মং এৱংসম্পদমেৱ ঈদিসমেৱ ৱদামি. ইতি সো এৱৰূপো তৱ লোভধম্মো যেন ত্ৱং ওসক্কন্তিযা উস্সক্কন্তো ৱিয পৰম্মুখিং আলিঙ্গন্তো ৱিয অহোসীতিপি তং চোদনং অৰহতি. কিঞ্হি পৰো পৰস্স কৰিস্সতীতি যেন ধম্মেন পৰে অনুসাসি, অত্তানমেৱ তাৱ তত্থ সম্পাদেহি, উজুং কৰোহি. কিঞ্হি পৰো পৰস্স কৰিস্সতীতি চোদনং অৰহতি.

৫১৪. নিদ্দাযিতব্বন্তি সস্সৰূপকানি তিণানি উপ্পাটেত্ৱা পৰিসুদ্ধং কাতব্বং.

৫১৫. ততিযচোদনায কিঞ্হি পৰো পৰস্সাতি অনুসাসনং অসম্পটিচ্ছনকালতো পট্ঠায পৰো অনুসাসিতব্বো, পৰস্স অনুসাসকস্স কিং কৰিস্সতীতি ননু তত্থ অপ্পোস্সুক্কতং আপজ্জিত্ৱা অত্তনা পটিৱিদ্ধধম্মং অত্তনাৱ মানেত্ৱা পূজেত্ৱা ৱিহাতব্বন্তি এৱং চোদনং অৰহতীতি অত্থো.

ন চোদনাৰহসত্থুৱণ্ণনা

৫১৬. ন চোদনাৰহোতি অযঞ্হি যস্মা পঠমমেৱ অত্তানং পতিৰূপে পতিট্ঠাপেত্ৱা সাৱকানং ধম্মং দেসেতি. সাৱকা চস্স অস্সৱা হুত্ৱা যথানুসিট্ঠং পটিপজ্জন্তি, তায চ পটিপত্তিযা মহন্তং ৱিসেসমধিগচ্ছন্তি. তস্মা ন চোদনাৰহোতি.

৫১৭. নৰকপপাতং পপতন্তোতি মযা গহিতায দিট্ঠিযা অহং নৰকপপাতং পপতন্তো. উদ্ধৰিত্ৱা থলে পতিট্ঠাপিতোতি তং দিট্ঠিং ভিন্দিত্ৱা ধম্মদেসনাহত্থেন অপাযপতনতো উদ্ধৰিত্ৱা সগ্গমগ্গথলে ঠপিতোম্হীতি ৱদতি. সেসমেত্থ উত্তানমেৱাতি.

ইতি সুমঙ্গলৱিলাসিনিযা দীঘনিকাযট্ঠকথাযং

লোহিচ্চসুত্তৱণ্ণনা নিট্ঠিতা.