১৩. তেৱিজ্জসুত্তৱণ্ণনা

৫১৮. এৱং মে সুতং…পে… কোসলেসূতি তেৱিজ্জসুত্তং. তত্ৰাযং অনুত্তানপদৱণ্ণনা. মনসাকটন্তি তস্স গামস্স নামং. উত্তৰেন মনসাকটস্সাতি মনসাকটতো অৱিদূৰে উত্তৰপস্সে. অম্বৱনেতি তৰুণঅম্বৰুক্খসণ্ডে, ৰমণীযো কিৰ সো ভূমিভাগো, হেট্ঠা ৰজতপট্টসদিসা ৱালিকা ৱিপ্পকিণ্ণা, উপৰি মণিৱিতানং ৱিয ঘনসাখাপত্তং অম্বৱনং. তস্মিং বুদ্ধানং অনুচ্ছৱিকে পৱিৱেকসুখে অম্বৱনে ৱিহৰতীতি অত্থো.

৫১৯. অভিঞ্ঞাতা অভিঞ্ঞাতাতি কুলচাৰিত্তাদিসম্পত্তিযা তত্থ তত্থ পঞ্ঞাতা. চঙ্কীতিআদীনি তেসং নামানি. তত্থ চঙ্কী ওপাসাদৱাসিকো. তাৰুক্খো ইচ্ছানঙ্গলৱাসিকো. পোক্খৰসাতী উক্কট্ঠৱাসিকো. জাণুসোণী সাৱত্থিৱাসিকো. তোদেয্যো তুদিগামৱাসিকো. অঞ্ঞে চাতি অঞ্ঞে চ বহুজনা. অত্তনো অত্তনো নিৱাসট্ঠানেহি আগন্ত্ৱা মন্তসজ্ঝাযকৰণত্থং তত্থ পটিৱসন্তি. মনসাকটস্স কিৰ ৰমণীযতায তে ব্ৰাহ্মণা তত্থ নদীতীৰে গেহানি কাৰেত্ৱা পৰিক্খিপাপেত্ৱা অঞ্ঞেসং বহূনং পৱেসনং নিৱাৰেত্ৱা অন্তৰন্তৰা তত্থ গন্ত্ৱা ৱসন্তি.

৫২০-৫২১. ৱাসেট্ঠভাৰদ্ৱাজানন্তি ৱাসেট্ঠস্স চ পোক্খৰসাতিনো অন্তেৱাসিকস্স, ভাৰদ্ৱাজস্স চ তাৰুক্খন্তেৱাসিকস্স. এতে কিৰ দ্ৱে জাতিসম্পন্না তিণ্ণং ৱেদানং পাৰগূ অহেসুং. জঙ্ঘৱিহাৰন্তি অতিচিৰনিসজ্জপচ্চযা কিলমথৱিনোদনত্থায জঙ্ঘচাৰং. তে কিৰ দিৱসং সজ্ঝাযং কত্ৱা সাযন্হে ৱুট্ঠায ন্হানীযসম্ভাৰগন্ধমালতেলধোতৱত্থানি গাহাপেত্ৱা অত্তনো পৰিজনপৰিৱুতা ন্হাযিতুকামা নদীতীৰং গন্ত্ৱা ৰজতপট্টৱণ্ণে ৱালিকাসণ্ডে অপৰাপৰং চঙ্কমিংসু. একং চঙ্কমন্তং ইতৰো অনুচঙ্কমি, পুন ইতৰং ইতৰোতি. তেন ৱুত্তং ‘‘অনুচঙ্কমন্তানং অনুৱিচৰন্তান’’ন্তি. মগ্গামগ্গেতি মগ্গে চ অমগ্গে চ. কতমং নু খো পটিপদং পূৰেত্ৱা কতমেন মগ্গেন সক্কা সুখং ব্ৰহ্মলোকং গন্তুন্তি এৱং মগ্গামগ্গং আৰব্ভ কথং সমুট্ঠাপেসুন্তি অত্থো. অঞ্জসাযনোতি উজুমগ্গস্সেতং ৱেৱচনং, অঞ্জসা ৱা উজুকমেৱ এতেন আযন্তি আগচ্ছন্তীতি অঞ্জসাযনো নিয্যানিকো নিয্যাতীতি নিয্যাযন্তো নিয্যাতি, গচ্ছন্তো গচ্ছতীতি অত্থো.

তক্কৰস্স ব্ৰহ্মসহব্যতাযাতি যো তং মগ্গং কৰোতি পটিপজ্জতি, তস্স ব্ৰহ্মুনা সদ্ধিং সহভাৱায, একট্ঠানে পাতুভাৱায গচ্ছতীতি অত্থো. য্ৱাযন্তি যো অযং. অক্খাতোতি কথিতো দীপিতো. ব্ৰাহ্মণেন পোক্খৰসাতিনাতি অত্তনো আচৰিযং অপদিসতি. ইতি ৱাসেট্ঠো সকমেৱ আচৰিযৱাদং থোমেত্ৱা পগ্গণ্হিত্ৱা ৱিচৰতি. ভাৰদ্ৱাজোপি সকমেৱাতি. তেন ৱুত্তং ‘‘নেৱ খো অসক্খি ৱাসেট্ঠো’’তিআদি.

ততো ৱাসেট্ঠো ‘‘উভিন্নম্পি অম্হাকং কথা অনিয্যানিকাৱ, ইমস্মিঞ্চ লোকে মগ্গকুসলো নাম ভোতা গোতমেন সদিসো নত্থি, ভৱঞ্চ গোতমো অৱিদূৰে ৱসতি, সো নো তুলং গহেত্ৱা নিসিন্নৱাণিজো ৱিয কঙ্খং ছিন্দিস্সতী’’তি চিন্তেত্ৱা তমত্থং ভাৰদ্ৱাজস্স আৰোচেত্ৱা উভোপি গন্ত্ৱা অত্তনো কথং ভগৱতো আৰোচেসুং. তেন ৱুত্তং ‘‘অথ খো ৱাসেট্ঠো…পে… য্ৱাযং অক্খাতো ব্ৰাহ্মণেন তাৰুক্খেনা’’তি.

৫২২. এত্থ ভো গোতমাতি এতস্মিং মগ্গামগ্গে. ৱিগ্গহো ৱিৱাদোতিআদীসু পুব্বুপ্পত্তিকো ৱিগ্গহো. অপৰভাগে ৱিৱাদো. দুৱিধোপি এসো নানাআচৰিযানং ৱাদতো নানাৱাদো.

৫২৩. অথ কিস্মিং পন ৱোতি ত্ৱম্পি অযমেৱ মগ্গোতি অত্তনো আচৰিযৱাদমেৱ পগ্গয্হ তিট্ঠসি, ভাৰদ্ৱাজোপি অত্তনো আচৰিযৱাদমেৱ, একস্সাপি একস্মিং সংসযো নত্থি. এৱং সতি কিস্মিং ৱো ৱিগ্গহোতি পুচ্ছতি.

৫২৪. মগ্গামগ্গে, ভো গোতমাতি মগ্গে ভো গোতম অমগ্গে চ, উজুমগ্গে চ অনুজুমগ্গে চাতি অত্থো. এস কিৰ একব্ৰাহ্মণস্সাপি মগ্গং ‘‘ন মগ্গো’’তি ন ৱদতি. যথা পন অত্তনো আচৰিযস্স মগ্গো উজুমগ্গো, ন এৱং অঞ্ঞেসং অনুজানাতি, তস্মা তমেৱত্থং দীপেন্তো ‘‘কিঞ্চাপি ভো গোতমা’’তিআদিমাহ.

সব্বানি তানীতি লিঙ্গৱিপল্লাসেন ৱদতি, সব্বে তেতি ৱুত্তং হোতি. বহূনীতি অট্ঠ ৱা দস ৱা. নানামগ্গানীতি মহন্তামহন্তজঙ্ঘমগ্গসকটমগ্গাদিৱসেন নানাৱিধানি সামন্তা গামনদীতড়াকখেত্তাদীহি আগন্ত্ৱা গামং পৱিসনমগ্গানি.

৫২৫-৫২৬. ‘‘নিয্যন্তীতি ৱাসেট্ঠ ৱদেসী’’তি ভগৱা তিক্খত্তুং ৱচীভেদং কত্ৱা পটিঞ্ঞং কাৰাপেসি. কস্মা? তিত্থিযা হি পটিজানিত্ৱা পচ্ছা নিগ্গয্হমানা অৱজানন্তি. সো তথা কাতুং ন সক্খিস্সতীতি.

৫২৭-৫২৯. তেৱ তেৱিজ্জাতি তে তেৱিজ্জা. ৱকাৰো আগমসন্ধিমত্তং. অন্ধৱেণীতি অন্ধপৱেণী, একেন চক্খুমতা গহিতযট্ঠিযা কোটিং একো অন্ধো গণ্হতি, তং অন্ধং অঞ্ঞো তং অঞ্ঞোতি এৱং পণ্ণাসসট্ঠি অন্ধা পটিপাটিযা ঘটিতা অন্ধৱেণীতি ৱুচ্চতি. পৰম্পৰসংসত্তাতি অঞ্ঞমঞ্ঞং লগ্গা, যট্ঠিগাহকেনপি চক্খুমতা ৱিৰহিতাতি অত্থো. একো কিৰ ধুত্তো অন্ধগণং দিস্ৱা ‘‘অসুকস্মিং নাম গামে খজ্জভোজ্জং সুলভ’’ন্তি উস্সাহেত্ৱা ‘‘তেন হি তত্থ নো সামি নেহি, ইদং নাম তে দেমা’’তি ৱুত্তে, লঞ্জং গহেত্ৱা অন্তৰামগ্গে মগ্গা ওক্কম্ম মহন্তং গচ্ছং অনুপৰিগন্ত্ৱা পুৰিমস্স হত্থেন পচ্ছিমস্স কচ্ছং গণ্হাপেত্ৱা ‘‘কিঞ্চি কম্মং অত্থি, গচ্ছথ তাৱ তুম্হে’’তি ৱত্ৱা পলাযি, তে দিৱসম্পি গন্ত্ৱা মগ্গং অৱিন্দমানা ‘‘কুহিং নো চক্খুমা, কুহিং মগ্গো’’তি পৰিদেৱিত্ৱা মগ্গং অৱিন্দমানা তত্থেৱ মৰিংসু. তে সন্ধায ৱুত্তং ‘‘পৰম্পৰসংসত্তা’’তি. পুৰিমোপীতি পুৰিমেসু দসসু ব্ৰাহ্মণেসু একোপি. মজ্ঝিমোপীতি মজ্ঝিমেসু আচৰিযপাচৰিযেসু একোপি. পচ্ছিমোপীতি ইদানি তেৱিজ্জেসু ব্ৰাহ্মণেসু একোপি. হস্সকঞ্ঞেৱাতি হসিতব্বমেৱ. নামকঞ্ঞেৱাতি লামকংযেৱ. তদেতং অত্থাভাৱেন ৰিত্তকং, ৰিত্তকত্তাযেৱ তুচ্ছকং. ইদানি ব্ৰহ্মলোকো তাৱ তিট্ঠতু, যো তেৱিজ্জেহি ন দিট্ঠপুব্বোৱ. যেপি চন্দিমসূৰিযে তেৱিজ্জা পস্সন্তি, তেসম্পি সহব্যতায মগ্গং দেসেতুং নপ্পহোন্তীতি দস্সনত্থং ‘‘তং কিং মঞ্ঞসী’’তিআদিমাহ.

৫৩০. তত্থ যতো চন্দিমসূৰিযা উগ্গচ্ছন্তীতি যস্মিং কালে উগ্গচ্ছন্তি. যত্থ চ ওগ্গচ্ছন্তীতি যস্মিং কালে অত্থমেন্তি, উগ্গমনকালে চ অত্থঙ্গমনকালে চ পস্সন্তীতি অত্থো. আযাচন্তীতি ‘‘উদেহি ভৱং চন্দ, উদেহি ভৱং সূৰিযা’’তি এৱং আযাচন্তি. থোমযন্তীতি ‘‘সোম্মো চন্দো, পৰিমণ্ডলো চন্দো, সপ্পভো চন্দো’’তিআদীনি ৱদন্তা পসংসন্তি. পঞ্জলিকাতি পগ্গহিতঅঞ্জলিকা. নমস্সমানাতি ‘‘নমো নমো’’তি ৱদমানা.

৫৩১-৫৩২. যং পস্সন্তীতি এত্থ যন্তি নিপাতমত্তং. কিং পন ন কিৰাতি এত্থ ইধ পন কিং ৱত্তব্বং. যত্থ কিৰ তেৱিজ্জেহি ব্ৰাহ্মণেহি ন ব্ৰহ্মা সক্খিদিট্ঠোতি এৱমত্থো দট্ঠব্বো.

অচিৰৱতীনদীউপমাকথা

৫৪২. সমতিত্তিকাতি সমভৰিতা. কাকপেয্যাতি যত্থ কত্থচি তীৰে ঠিতেন কাকেন সক্কা পাতুন্তি কাকপেয্যা. পাৰং তৰিতুকামোতি নদিং অতিক্কমিত্ৱা পৰতীৰং গন্তুকামো. অৱ্হেয্যাতি পক্কোসেয্য. এহি পাৰাপাৰন্তি অম্ভো পাৰ অপাৰং এহি, অথ মং সহসাৱ গহেত্ৱা গমিস্সসি, অত্থি মে অচ্চাযিককম্মন্তি অত্থো.

৫৪৪. যে ধম্মা ব্ৰাহ্মণকাৰকাতি এত্থ পঞ্চসীলদসকুসলকম্মপথভেদা ধম্মা ব্ৰাহ্মণকাৰকাতি ৱেদিতব্বা, তব্বিপৰীতা অব্ৰাহ্মণকাৰকা. ইন্দমৱ্হাযামাতি ইন্দং অৱ্হাযাম পক্কোসাম. এৱং ব্ৰাহ্মণানং অৱ্হাযনস্স নিৰত্থকতং দস্সেত্ৱা পুনপি ভগৱা অণ্ণৱকুচ্ছিযং সূৰিযো ৱিয জলমানো পঞ্চসতভিক্খুপৰিৱুতো অচিৰৱতিযা তীৰে নিসিন্নো অপৰম্পি নদীউপমংযেৱ আহৰন্তো ‘‘সেয্যথাপী’’তিআদিমাহ.

৫৪৬. কামগুণাতি কামযিতব্বট্ঠেন কামা, বন্ধনট্ঠেন গুণা. ‘‘অনুজানামি ভিক্খৱে, অহতানং ৱত্থানং দিগুণং সঙ্ঘাটি’’ন্তি (মহাৱ. ৩৪৮) এত্থ হি পটলট্ঠো গুণট্ঠো. ‘‘অচ্চেন্তি কালা তৰযন্তি ৰত্তিযো, ৱযোগুণা অনুপুব্বং জহন্তী’’তি এত্থ ৰাসট্ঠো গুণট্ঠো. ‘‘সতগুণা দক্খিণা পাটিকঙ্খিতব্বা’’তি (ম. নি. ৩.৩৭৯) এত্থ আনিসংসট্ঠো গুণট্ঠো. ‘‘অন্তং অন্তগুণং (খু. পা. ৩.১) কযিৰা মালাগুণে বহূ’’তি (ধ. প. ৫৩) চ এত্থ বন্ধনট্ঠো গুণট্ঠো. ইধাপি এসেৱ অধিপ্পেতো. তেন ৱুত্তং ‘‘বন্ধনট্ঠেন গুণা’’তি. চক্খুৱিঞ্ঞেয্যাতি চক্খুৱিঞ্ঞাণেন পস্সিতব্বা. এতেনুপাযেন সোতৱিঞ্ঞেয্যাদীসুপি অত্থো ৱেদিতব্বো. ইট্ঠাতি পৰিযিট্ঠা ৱা হোন্তু, মা ৱা, ইট্ঠাৰম্মণভূতাতি অত্থো. কন্তাতি কামনীযা. মনাপাতি মনৱড্ঢনকা. পিযৰূপাতি পিযজাতিকা. কামূপসঞ্হিতাতি আৰম্মণং কত্ৱা উপ্পজ্জমানেন কামেন উপসঞ্হিতা. ৰজনীযাতি ৰঞ্জনীযা, ৰাগুপ্পত্তিকাৰণভূতাতি অত্থো.

গধিতাতি গেধেন অভিভূতা হুত্ৱা. মুচ্ছিতাতি মুচ্ছাকাৰপ্পত্তায অধিমত্তকায তণ্হায অভিভূতা. অজ্ঝোপন্নাতি অধিওপন্না ওগাড়্হা ‘‘ইদং সাৰ’’ন্তি পৰিনিট্ঠানপ্পত্তা হুত্ৱা. অনাদীনৱদস্সাৱিনোতি আদীনৱং অপস্সন্তা. অনিস্সৰণপঞ্ঞাতি ইদমেত্থ নিস্সৰণন্তি, এৱং পৰিজাননপঞ্ঞাৱিৰহিতা, পচ্চৱেক্খণপৰিভোগৱিৰহিতাতি অত্থো.

৫৪৮. আৱৰণাতিআদীসু আৱৰন্তীতি আৱৰণা. নিৱাৰেন্তীতি নীৱৰণা. ওনন্ধন্তীতি ওনাহনা. পৰিযোনন্ধন্তীতি পৰিযোনাহনা. কামচ্ছন্দাদীনং ৱিত্থাৰকথা ৱিসুদ্ধিমগ্গতো গহেতব্বা.

৫৪৯-৫৫০. আৱুতা নিৱুতা ওনদ্ধা পৰিযোনদ্ধাতি পদানি আৱৰণাদীনং ৱসেন ৱুত্তানি. সপৰিগ্গহোতি ইত্থিপৰিগ্গহেন সপৰিগ্গহোতি পুচ্ছতি. অপৰিগ্গহো ভো গোতমাতিআদীসুপি কামচ্ছন্দস্স অভাৱতো ইত্থিপৰিগ্গহেন অপৰিগ্গহো. ব্যাপাদস্স অভাৱতো কেনচি সদ্ধিং ৱেৰচিত্তেন অৱেৰো. থিনমিদ্ধস্স অভাৱতো চিত্তগেলঞ্ঞসঙ্খাতেন ব্যাপজ্জেন অব্যাপজ্জো. উদ্ধচ্চকুক্কুচ্চাভাৱতো উদ্ধচ্চকুক্কুচ্চাদীহি সংকিলেসেহি অসংকিলিট্ঠচিত্তো সুপৰিসুদ্ধমানসো. ৱিচিকিচ্ছায অভাৱতো চিত্তং ৱসে ৱত্তেতি. যথা চ ব্ৰাহ্মণা চিত্তগতিকা হোন্তীতি, চিত্তস্স ৱসেন ৱত্তন্তি, ন তাদিসোতি ৱসৱত্তী.

৫৫২. ইধ খো পনাতি ইধ ব্ৰহ্মলোকমগ্গে. আসীদিত্ৱাতি অমগ্গমেৱ ‘‘মগ্গো’’তি উপগন্ত্ৱা. সংসীদন্তীতি ‘‘সমতল’’ন্তি সঞ্ঞায পঙ্কং ওতিণ্ণা ৱিয অনুপ্পৱিসন্তি. সংসীদিত্ৱা ৱিসাৰং পাপুণন্তীতি এৱং পঙ্কে ৱিয সংসীদিত্ৱা ৱিসাৰং অঙ্গমঙ্গসংভঞ্জনং পাপুণন্তি. সুক্খতৰং মঞ্ঞে তৰন্তীতি মৰীচিকায ৱঞ্চেত্ৱা ‘‘কাকপেয্যা নদী’’তি সঞ্ঞায ‘‘তৰিস্সামা’’তি হত্থেহি চ পাদেহি চ ৱাযমমানা সুক্খতৰণং মঞ্ঞে তৰন্তি. তস্মা যথা হত্থপাদাদীনং সংভঞ্জনং পৰিভঞ্জনং, এৱং অপাযেসু সংভঞ্জনং পৰিভঞ্জনং পাপুণন্তি. ইধেৱ চ সুখং ৱা সাতং ৱা ন লভন্তি. তস্মা ইদং তেৱিজ্জানং ব্ৰাহ্মণানন্তি তস্মা ইদং ব্ৰহ্মসহব্যতায মগ্গদীপকং তেৱিজ্জকং পাৱচনং তেৱিজ্জানং ব্ৰাহ্মণানং. তেৱিজ্জাইৰিণন্তি তেৱিজ্জাঅৰঞ্ঞং ইৰিণন্তি হি অগামকং মহাঅৰঞ্ঞং ৱুচ্চতি. তেৱিজ্জাৱিৱনন্তি পুপ্ফফলেহি অপৰিভোগৰুক্খেহি সঞ্ছন্নং নিৰুদকং অৰঞ্ঞং. যত্থ মগ্গতো উক্কমিত্ৱা পৰিৱত্তিতুম্পি ন সক্কা হোন্তি, তং সন্ধাযাহ ‘‘তেৱিজ্জাৱিৱনন্তিপি ৱুচ্চতী’’তি. তেৱিজ্জাব্যসনন্তি তেৱিজ্জানং পঞ্চৱিধব্যসনসদিসমেতং. যথা হি ঞাতিৰোগভোগ দিট্ঠি সীলব্যসনপ্পত্তস্স সুখং নাম নত্থি, এৱং তেৱিজ্জানং তেৱিজ্জকং পাৱচনং আগম্ম সুখং নাম নত্থীতি দস্সেতি.

৫৫৪. জাতসংৱড্ঢোতি জাতো চ ৱড্ঢিতো চ, যো হি কেৱলং তত্থ জাতোৱ হোতি, অঞ্ঞত্থ ৱড্ঢিতো, তস্স সমন্তা গামমগ্গা ন সব্বসো পচ্চক্খা হোন্তি, তস্মা জাতসংৱড্ঢোতি আহ. জাতসংৱড্ঢোপি যো চিৰনিক্খন্তো, তস্স ন সব্বসো পচ্চক্খা হোন্তি. তস্মা ‘‘তাৱদেৱ অৱসট’’ন্তি আহ, তঙ্খণমেৱ নিক্খন্তন্তি অত্থো. দন্ধাযিতত্তন্তি অযং নু খো মগ্গো, অযং ন নুখোতি কঙ্খাৱসেন চিৰাযিতত্তং. ৱিত্থাযিতত্তন্তি যথা সুখুমং অত্থজাতং সহসা পুচ্ছিতস্স কস্সচি সৰীৰং থদ্ধভাৱং গণ্হাতি, এৱং থদ্ধভাৱগ্গহণং. ন ত্ৱেৱাতি ইমিনা সব্বঞ্ঞুতঞ্ঞাণস্স অপ্পটিহতভাৱং দস্সেতি. তস্স হি পুৰিসস্স মাৰাৱট্টনাদিৱসেন সিযা ঞাণস্স পটিঘাতো. তেন সো দন্ধাযেয্য ৱা ৱিত্থাযেয্য ৱা. সব্বঞ্ঞুতঞ্ঞাণং পন অপ্পটিহতং, ন সক্কা তস্স কেনচি অন্তৰাযো কাতুন্তি দীপেতি.

৫৫৫. উল্লুম্পতু ভৱং গোতমোতি উদ্ধৰতু ভৱং গোতমো. ব্ৰাহ্মণিং পজন্তি ব্ৰাহ্মণদাৰকং, ভৱং গোতমো মম ব্ৰাহ্মণপুত্তং অপাযমগ্গতো উদ্ধৰিত্ৱা ব্ৰহ্মলোকমগ্গে পতিট্ঠপেতূতি অত্থো. অথস্স ভগৱা বুদ্ধুপ্পাদং দস্সেত্ৱা সদ্ধিং পুব্বভাগপটিপদায মেত্তাৱিহাৰাদিব্ৰহ্মলোকগামিমগ্গং দেসেতুকামো ‘‘তেন হি ৱাসেট্ঠা’’তিআদিমাহ. তত্থ ‘‘ইধ তথাগতো’’তিআদি সামঞ্ঞফলে ৱিত্থাৰিতং. মেত্তাসহগতেনাতিআদীসু যং ৱত্তব্বং, তং সব্বং ৱিসুদ্ধিমগ্গে ব্ৰহ্মৱিহাৰকম্মট্ঠানকথাযং ৱুত্তং. সেয্যথাপি ৱাসেট্ঠ বলৱা সঙ্খধমোতিআদি পন ইধ অপুব্বং. তত্থ বলৱাতি বলসম্পন্নো. সঙ্খধমোতি সঙ্খধমকো. অপ্পকসিৰেনাতি অকিচ্ছেন অদুক্খেন. দুব্বলো হি সঙ্খধমো সঙ্খং ধমন্তোপি ন সক্কোতি চতস্সো দিসা সৰেন ৱিঞ্ঞাপেতুং, নাস্স সঙ্খসদ্দো সব্বতো ফৰতি. বলৱতো পন ৱিপ্ফাৰিকো হোতি, তস্মা ‘‘বলৱা’’তিআদিমাহ. মেত্তায চেতোৱিমুত্তিযাতি এত্থ মেত্তাতি ৱুত্তে উপচাৰোপি অপ্পনাপি ৱট্টতি, ‘‘চেত্তোৱিমুত্তী’’তি ৱুত্তে পন অপ্পনাৱ ৱট্টতি. যং পমাণকতং কম্মন্তি পমাণকতং কম্মং নাম কামাৱচৰং ৱুচ্চতি. অপ্পমাণকতং কম্মং নাম ৰূপাৰূপাৱচৰং. তঞ্হি পমাণং অতিক্কমিত্ৱা ওদিস্সকঅনোদিস্সকদিসাফৰণৱসেন ৱড্ঢেত্ৱা কতত্তা অপ্পমাণকতন্তি ৱুচ্চতি. ন তং তত্ৰাৱসিস্সতি ন তং তত্ৰাৱতিট্ঠতীতি তং কামাৱচৰকম্মং তস্মিং ৰূপাৱচৰাৰূপাৱচৰকম্মে ন ওহীযতি, ন তিট্ঠতি. কিং ৱুত্তং হোতি – তং কামাৱচৰকম্মং তস্স ৰূপাৰূপাৱচৰকম্মস্স অন্তৰা লগ্গিতুং ৱা ঠাতুং ৱা ৰূপাৰূপাৱচৰকম্মং ফৰিত্ৱা পৰিযাদিযিত্ৱা অত্তনো ওকাসং গহেত্ৱা পতিট্ঠাতুং ন সক্কোতি. অথ খো ৰূপাৱচৰাৰূপাৱচৰকম্মমেৱ কামাৱচৰং মহোঘো ৱিয পৰিত্তং উদকং ফৰিত্ৱা পৰিযাদিযিত্ৱা অত্তনো ওকাসং গহেত্ৱা তিট্ঠতি. তস্স ৱিপাকং পটিবাহিত্ৱা সযমেৱ ব্ৰহ্মসহব্যতং উপনেতীতি. এৱংৱিহাৰীতি এৱং মেত্তাদিৱিহাৰী.

৫৫৯. এতে মযং ভৱন্তং গোতমন্তি ইদং তেসং দুতিযং সৰণগমনং. পঠমমেৱ হেতে মজ্ঝিমপণ্ণাসকে ৱাসেট্ঠসুত্তং সুত্ৱা সৰণং গতা, ইমং পন তেৱিজ্জসুত্তং সুত্ৱা দুতিযম্পি সৰণং গতা. কতিপাহচ্চযেন পব্বজিত্ৱা অগ্গঞ্ঞসুত্তে উপসম্পদঞ্চেৱ অৰহত্তঞ্চ অলত্থুং. সেসং সব্বত্থ উত্তানমেৱাতি.

ইতি সুমঙ্গলৱিলাসিনিযা দীঘনিকাযট্ঠকথাযং

তেৱিজ্জসুত্তৱণ্ণনা নিট্ঠিতা.