(৭.) সত্তকনিদ্দেসৱণ্ণনা

৯৪৯. সত্তকনিদ্দেসে থামগতট্ঠেন অপ্পহীনট্ঠেন চ অনুসেন্তীতি অনুসযা. ৱট্টস্মিং সত্তে সংযোজেন্তি ঘটেন্তীতি সংযোজনানি. সমুদাচাৰৱসেন পৰিযুট্ঠহন্তীতি পৰিযুট্ঠানানি. কামৰাগোৱ পৰিযুট্ঠানং কামৰাগপৰিযুট্ঠানং. সেসেসুপি এসেৱ নযো.

৯৫০. অসতং ধম্মা, লামকট্ঠেন ৱা অসন্তা ধম্মাতি অসদ্ধম্মা. ৰাগাদীহি দোসেহি দুট্ঠানি চৰিতানীতি দুচ্চৰিতানি. তেন তেনাকাৰেন মঞ্ঞন্তীতি মানা.

৯৫১. দিট্ঠিনিদ্দেসে ৰূপীতি ৰূপৱা. চাতুমহাভূতিকোতি চতুমহাভূতমযো. মাতাপিতূনং এতন্তি মাতাপেত্তিকং. কিন্তং? সুক্কসোণিতং. মাতাপেত্তিকে সম্ভূতো জাতোতি মাতাপেত্তিকসম্ভৱো. ইধ ৰূপকাযসীসেন মনুস্সত্তভাৱং অত্তাতি ৱদতি. দুতিযো তং পটিক্খিপিত্ৱা দিব্বত্তভাৱং ৱদতি. দিব্বোতি দেৱলোকে সম্ভূতো. কামাৱচৰোতি ছকামাৱচৰদেৱপৰিযাপন্নো. কবড়ীকাৰং ভক্খযতীতি কবড়ীকাৰভক্খো. মনোমযোতি ঝানমনেন নিব্বত্তো. সব্বঙ্গপচ্চঙ্গীতি সব্বঙ্গপচ্চঙ্গযুত্তো. অহীনিন্দ্ৰিযোতি পৰিপুণ্ণিন্দ্ৰিযো; যানি ব্ৰহ্মলোকে অত্থি তেসং ৱসেন, ইতৰেসঞ্চ সণ্ঠানৱসেনেতং ৱুত্তং. আকাসানঞ্চাযতনূপগোতি আকাসানঞ্চাযতনভাৱং উপগতো. ইতৰেসুপি এসেৱ নযো. সেসং সব্বত্থ উত্তানত্থমেৱাতি.

সত্তকনিদ্দেসৱণ্ণনা.