৩. পঞ্হাপুচ্ছকৱণ্ণনা

৫০৪. পঞ্হাপুচ্ছকে পাড়িঅনুসাৰেনেৱ মগ্গঙ্গানং কুসলাদিভাৱো ৱেদিতব্বো. আৰম্মণত্তিকেসু পন সব্বানিপেতানি অপ্পমাণং নিব্বানং আৰব্ভ পৱত্তিতো অপ্পমাণাৰম্মণানেৱ, ন মগ্গাৰম্মণানি. নেৱ হি মগ্গো ন ফলং মগ্গং আৰম্মণং কৰোতি. সহজাতহেতুৱসেন পনেত্থ কুসলানি মগ্গহেতুকানি; ৱীৰিযং ৱা ৱীমংসং ৱা জেট্ঠকং কত্ৱা মগ্গভাৱনাকালে মগ্গাধিপতীনি; ছন্দচিত্তজেট্ঠিকায মগ্গভাৱনায ন ৱত্তব্বানি মগ্গাধিপতীনীতি; ফলকালেপি ন ৱত্তব্বানেৱ.

অতীতাদীসু একাৰম্মণভাৱেনপি ন ৱত্তব্বানি; নিব্বানস্স পন বহিদ্ধাধম্মত্তা বহিদ্ধাৰম্মণানি নাম হোন্তীতি এৱমেতস্মিং পঞ্হাপুচ্ছকেপি নিব্বত্তিতলোকুত্তৰানেৱ মগ্গঙ্গানি কথিতানি. সম্মাসম্বুদ্ধেন হি সুত্তন্তভাজনীযস্মিংযেৱ লোকিযলোকুত্তৰানি মগ্গঙ্গানি কথিতানি; অভিধম্মভাজনীযে পন পঞ্হাপুচ্ছকে চ লোকুত্তৰানেৱাতি এৱমযং মগ্গৱিভঙ্গোপি তেপৰিৱট্টং নীহৰিত্ৱাৱ ভাজেত্ৱা দস্সিতোতি.

সম্মোহৱিনোদনিযা ৱিভঙ্গট্ঠকথায

মগ্গঙ্গৱিভঙ্গৱণ্ণনা নিট্ঠিতা.