২. অভিধম্মভাজনীযৱণ্ণনা

৪৭২. অভিধম্মভাজনীযে সত্তপি বোজ্ঝঙ্গে একতো পুচ্ছিত্ৱা ৱিস্সজ্জনস্স চ পাটিযেক্কং পুচ্ছিত্ৱা ৱিস্সজ্জনস্স চ ৱসেন দ্ৱে নযা. তেসং অত্থৱণ্ণনা হেট্ঠা ৱুত্তনযেনেৱ ৱেদিতব্বা.

উপেক্খাসম্বোজ্ঝঙ্গনিদ্দেসে পন উপেক্খনৱসেন উপেক্খা. উপেক্খনাকাৰো উপেক্খনা. উপেক্খিতব্বযুত্তে সমপ্পৱত্তে ধম্মে ইক্খতি, ন চোদেতীতি উপেক্খা. পুগ্গলং উপেক্খাপেতীতি উপেক্খনা. বোজ্ঝঙ্গভাৱপ্পত্তিযা লোকিযউপেক্খনায অধিকা উপেক্খনা অজ্ঝুপেক্খনা. অব্যাপাৰাপজ্জনেন মজ্ঝত্তভাৱো মজ্ঝত্ততা. সা পন চিত্তস্স, ন সত্তস্সাতি দীপেতুং মজ্ঝত্ততা চিত্তস্সাতি ৱুত্তন্তি. অযমেত্থ অনুপুব্বপদৱণ্ণনা.

নযা পনেত্থ গণেতব্বা – সত্তন্নম্পি হি বোজ্ঝঙ্গানং একতো পুচ্ছিত্ৱা ৱিস্সজ্জনে একেকমগ্গে নযসহস্সং নযসহস্সন্তি চত্তাৰি নযসহস্সানি ৱিভত্তানি. পাটিযেক্কং পুচ্ছিত্ৱা ৱিস্সজ্জনে একেকবোজ্ঝঙ্গৱসেন চত্তাৰি চত্তাৰীতি সত্ত চতুক্কা অট্ঠৱীসতি. তানি পুৰিমেহি চতূহি সদ্ধিং দ্ৱত্তিংসাতি সব্বানিপি অভিধম্মভাজনীযে দ্ৱত্তিংস নযসহস্সানি ৱিভত্তানি কুসলানেৱ. যস্মা পন ফলক্খণেপি বোজ্ঝঙ্গা লব্ভন্তি, কুসলহেতুকানি চ সামঞ্ঞফলানি, তস্মা তেসুপি বোজ্ঝঙ্গদস্সনত্থং কুসলনিদ্দেসপুব্বঙ্গমায এৱ তন্তিযা ৱিপাকনযো আৰদ্ধো. সোপি একতো পুচ্ছিত্ৱা ৱিস্সজ্জনস্স চ, পাটিযেক্কং পুচ্ছিত্ৱা ৱিস্সজ্জনস্স চ ৱসেন দুৱিধো হোতি. সেসমেত্থ হেট্ঠা ৱুত্তনযেনেৱ ৱেদিতব্বং. ৱিপাকে পন কুসলতো তিগুণা নযা কাতব্বাতি.

অভিধম্মভাজনীযৱণ্ণনা.