৪. সঙ্খাৰক্খন্ধনিদ্দেসো

২০. সঙ্খাৰক্খন্ধনিদ্দেসে যে কেচি সঙ্খাৰাতি চতুভূমিকসঙ্খাৰে পৰিযাদিযতি. চক্খুসম্ফস্সজা চেতনাতিআদীনি অতীতাদিৱসেন নিদ্দিট্ঠসঙ্খাৰে সভাৱতো দস্সেতুং ৱুত্তানি. চক্খুসম্ফস্সজাতিআদীনি ৱুত্তত্থানেৱ. চেতনাতি হেট্ঠিমকোটিযা পধানসঙ্খাৰৱসেন ৱুত্তং. হেট্ঠিমকোটিযা হি অন্তমসো চক্খুৱিঞ্ঞাণেন সদ্ধিং পাড়িযং আগতা চত্তাৰো সঙ্খাৰা উপ্পজ্জন্তি. তেসু চেতনা পধানা আযূহনট্ঠেন পাকটত্তা. তস্মা অযমেৱ গহিতা. তংসম্পযুত্তসঙ্খাৰা পন তায গহিতায গহিতাৱ হোন্তি. ইধাপি পুৰিমা পঞ্চ চক্খুপসাদাদিৱত্থুকাৱ. মনোসম্ফস্সজা হদযৱত্থুকাপি অৱত্থুকাপি. সব্বা চতুভূমিকচেতনা. সেসং ৱেদনাক্খন্ধসদিসমেৱাতি.

অযং সঙ্খাৰক্খন্ধনিদ্দেসো.