৭-১২. পচ্চনীযপট্ঠানৱণ্ণনা

১. ইদানি কুসলাদীনং পদানং পটিক্খেপৱসেন ধম্মানং পচ্চনীযতায লদ্ধনামং পচ্চনীযপট্ঠানং দস্সেতুং নকুসলং ধম্মং পটিচ্চ নকুসলো ধম্মো উপ্পজ্জতি হেতুপচ্চযাতিআদি আৰদ্ধং. তত্থ নকুসলং ধম্মং পটিচ্চাতি কুসলস্স পচ্চযভাৱং ৱাৰেতি. নকুসলো ধম্মো উপ্পজ্জতীতি কুসলস্স উপ্পত্তিং ৱাৰেতি, তস্মা ‘‘অকুসলাব্যাকতং একং খন্ধং পটিচ্চ অকুসলাব্যাকতা তযো খন্ধা চিত্তসমুট্ঠানঞ্চ ৰূপ’’ন্তি এৱমাদিনা নযেনেত্থ পঞ্হং ৱিস্সজ্জিতব্বং. তস্মিং তস্মিং পচ্চযে লদ্ধগণনা পন পাড়িযং ৱুত্তাযেৱ. যেপি ৱাৰা সদিসৱিস্সজ্জনা, তেপি তত্থেৱ দস্সিতা. তস্মা সব্বমেত্থ হেট্ঠা ৱুত্তনযানুসাৰেন পাড়িং উপপৰিক্খিত্ৱা ৱেদিতব্বং. যথা চেত্থ, এৱং দুকপট্ঠানে, দুকতিকপট্ঠানে, তিকদুকপট্ঠানে তিকতিকপট্ঠানে, দুকদুকপট্ঠানে চ.

এত্তাৱতা –

তিকঞ্চ পট্ঠানৱৰং দুকুত্তমং,

দুকং তিকঞ্চেৱ তিকং দুকঞ্চ;

তিকং তিকঞ্চেৱ, দুকং দুকঞ্চ,

ছ পচ্চনীযম্হি নযা সুগম্ভীৰাতি. –

অট্ঠকথাযং ৱুত্তগাথায দীপিতা. ধম্মপচ্চনীযপট্ঠানে ছ নযা নিদ্দিট্ঠা হোন্তি. পচ্চযৱসেন পনেত্থ একেকস্মিং পট্ঠানে অনুলোমাদযো চত্তাৰো চত্তাৰো নযাতি একেন পৰিযাযেন চতুৱীসতিনযপটিমণ্ডিতং পচ্চনীযপট্ঠানঞ্ঞেৱ ৱেদিতব্বং.

পচ্চনীযপট্ঠানৱণ্ণনা.