২. দুকপট্ঠানৱণ্ণনা

দুকপট্ঠানেপি সব্বদুকেসু পঞ্হাৱিস্সজ্জনানি চেৱ গণনা চ পাড়িযং আগতনযেনেৱ ৱেদিতব্বা. অপিচেত্থ সহেতুকহেতুসম্পযুত্তদুকানং ৱিস্সজ্জনং হেতুদুকৱিস্সজ্জনসদিসং; তথা হেতূচেৱসহেতুকহেতূচেৱহেতুসম্পযুত্তদুকানং, তথা সপ্পচ্চযসঙ্খতদুকানং. ইদং দুকং যথা সপ্পচ্চযদুকং, এৱং কাতব্বন্তি ইদং যস্মা সপ্পচ্চযো ৱিয অপ্পচ্চযেন সঙ্খতোপি, অসঙ্খতেন সদ্ধিং যোজনং ন লব্ভতি, তস্মা ৱুত্তং. সাৰম্মণচিত্তসম্পযুত্তসংসট্ঠদুকাপি সদিসৱিস্সজ্জনাযেৱ; তথা আসৱওঘযোগগোচ্ছকা. এতে হি তযো অঞ্ঞমঞ্ঞং সদিসৱিস্সজ্জনাযেৱ. অপিচ লোকিযসাসৱসংযোজনিযগন্থনিযনীৱৰণিযপৰামট্ঠসঙ্কিলেসিকদুকা আসৱৱিপ্পযুত্তসাসৱসংযোজনৱিপ্পযুত্তসংযোজনিযগন্থৱিপ্পযুত্তগন্থনিযনীৱৰণৱিপ্পযুত্তনীৱৰণিযপৰামাসৱিপ্পযুত্তপৰামট্ঠকিলেসৱিপ্পযুত্তসঙ্কিলেসিকপৰিযাপন্নসউত্তৰদুকাত ইমেপি দুকা সমানা.

কিলেসদুকং সংযোজনদুকসদিসং. সঙ্কিলিট্ঠকিলেসসম্পযুত্তনীৱৰণসম্পযুত্তদস্সনেনপহাতব্বসৰণদুকাপি সমানা. তথাকিলেসা চেৱ সঙ্কিলিট্ঠনীৱৰণা চেৱ নীৱৰণসম্পযুত্তকিলেসা চেৱ কিলেসসম্পযুত্তদুকা. ইমিনা নযেন সব্বেসং অত্থতো সদিসানং দুকানং ৱিস্সজ্জনানি সদিসানেৱ হোন্তীতি ৱেদিতব্বানি. সব্বস্মিম্পি পন পট্ঠানে কেনচিৱিঞ্ঞেয্যদুকং ন লব্ভতি. আসৱা চেৱ আসৱসম্পযুত্তা চ, সংযোজনা চেৱ সংযোজনসম্পযুত্তা চ, গন্থা চেৱ গন্থসম্পযুত্তা চ, নীৱৰণা চেৱ নীৱৰণসম্পযুত্তা চ, কিলেসা চেৱ সঙ্কিলিট্ঠা চাতি এৱৰূপেসু দুকেসু ৱিপাকপচ্চযো চেৱ নানাক্খণিককম্মপচ্চযো চ ন লব্ভতি. নহেতুসহেতুকনহেতুঅহেতুকেসু হেতুপচ্চযো নত্থি. হেতূ চেৱ হেতুসম্পযুত্তা চ, আসৱা চেৱ আসৱসম্পযুত্তা চ, গন্থা চেৱ গন্থসম্পযুত্তা চাতি ইমেসু দুকেসু নহেতুনঝাননমগ্গা ন লব্ভন্তি. সংযোজনা চেৱ সংযোজনসম্পযুত্তা চ, নীৱৰণা চেৱ নীৱৰণসম্পযুত্তা চ, কিলেসা চেৱ কিলেসসম্পযুত্তা চ, কিলেসা চেৱ সঙ্কিলিট্ঠা চাতি ইমেসু পন ৱিচিকিচ্ছুদ্ধচ্চসহগতস্স মোহস্স ৱসেন নহেতুপচ্চযো লব্ভতি; নঝাননমগ্গপচ্চযা ন লব্ভন্তীতি এৱং সব্বদুকেসু লব্ভমানালব্ভমানং উপপৰিক্খিত্ৱা পাড়িৱসেনেৱ ৱাৰগণনা ৱেদিতব্বাতি.

দুকপট্ঠানৱণ্ণনা.