১০. দসমনযো ৱিপ্পযুত্তেনৱিপ্পযুত্তপদৱণ্ণনা

৩৫৩. ইদানি ৱিপ্পযুত্তেনৱিপ্পযুত্তপদং ভাজেতুং ৰূপক্খন্ধেনাতিআদি আৰদ্ধং. তত্থ যে সম্পযোগৱিপ্পযোগপদনিদ্দেসে ৰূপক্খন্ধাদযো ধম্মা উদ্ধটা, সব্বপুচ্ছাসু তেযেৱ উদ্ধটা. সদিসৱিস্সজ্জনানং পন একতো গহিতত্তা পদানি অঞ্ঞায পটিপাটিযা আগতানি. তত্থ যং পদং পুচ্ছায উদ্ধটং, তং যেহি ধম্মেহি ৱিপ্পযুত্তং, তেসং ৱসেন খন্ধাদিৱিভাগো ৱেদিতব্বো. ৰূপক্খন্ধেন হি ৱেদনাদযো ৱিপ্পযুত্তা, তেহি চ ৰূপক্খন্ধো ৱিপ্পযুত্তো. নিব্বানং পন সুখুমৰূপগতিকমেৱ. সো ৰূপক্খন্ধো চতূহি খন্ধেহি, একেন মনাযতনেন সত্তহি ৱিঞ্ঞাণধাতূহি, ধম্মাযতনধম্মধাতূসু, কেহিচি ৱেদনাদীহি ধম্মেহেৱ ৱিপ্পযুত্তো. এসেৱ নযো সব্বত্থাতি.

ৱিপ্পযুত্তেনৱিপ্পযুত্তপদৱণ্ণনা.