১১. একাদসমনযো সঙ্গহিতেনসম্পযুত্তৱিপ্পযুত্তপদৱণ্ণনা

৪০৯. ইদানি সঙ্গহিতেনসম্পযুত্তৱিপ্পযুত্তপদং ভাজেতুং সমুদযসচ্চেনাতিআদি আৰদ্ধং. তত্থ যে সঙ্গহিতেনসঙ্গহিতপদনিদ্দেসে সমুদযসচ্চাদযোৱ ধম্মা উদ্ধটা, সব্বপুচ্ছাসু তেযেৱ উদ্ধটা. সদিসৱিস্সজ্জনানং পন একতো গহিতত্তা পদানি অঞ্ঞায পটিপাটিযা আগতানি. তত্থ যে ধম্মা পুচ্ছায উদ্ধটপদেন খন্ধাদিসঙ্গহেন সঙ্গহিতা, তেসং যেহি সম্পযোগো ৱা ৱিপ্পযোগো ৱা হোতি, তেসং ৱসেন খন্ধাদিৱিভাগো ৱেদিতব্বো.

তত্ৰাযং নযো – সমুদযসচ্চেন তাৱ সঙ্খাৰক্খন্ধপৰিযাপন্না ধম্মা খন্ধাদিসঙ্গহেন সঙ্গহিতা. তে চ সেসেহি তীহি খন্ধেহি, একেন মনাযতনেন, সত্তহি ৱিঞ্ঞাণধাতূহি, সঙ্খাৰক্খন্ধে ধম্মাযতনধম্মধাতূসু চ ঠপেত্ৱা তণ্হং সেসেহি সম্পযুত্তত্তা কেহিচি সম্পযুত্তা নাম. একেন পন ৰূপক্খন্ধেন, দসহি ৰূপাযতনেহি, ৰূপধাতূহি চ ৱিপ্পযুত্তা, একস্মিং ধম্মাযতনে ধম্মধাতুযা চ, ৰূপনিব্বানেহি ৱিপ্পযুত্তত্তা কেহিচি ৱিপ্পযুত্তা নাম. ইমিনা উপাযেন সব্বত্থ অত্থো ৱেদিতব্বোতি.

সঙ্গহিতেনসম্পযুত্তৱিপ্পযুত্তপদৱণ্ণনা.