৫. পাৰিচ্ছত্তকসুত্তৱণ্ণনা

৬৯. পঞ্চমে পন্নপলাসোতি পতিতপলাসো. জালকজাতোতি সঞ্জাতপত্তপুপ্ফজালো. তস্স হি পত্তজালঞ্চ পুপ্ফজালঞ্চ সহেৱ নিক্খমতি. খাৰকজাতোতি পাটিযেক্কং সঞ্জাতেন সুৱিভত্তেন পত্তজালকেন চ পুপ্ফজালকেন চ সমন্নাগতো. কুটুমলকজাতোতি সঞ্জাতমকুড়ো. কোৰকজাতোতি অৱিকসিতেহি মহাকুচ্ছীহি সম্ভিন্নমুখেহি পুপ্ফেহি সমন্নাগতো. সব্বপালিফুল্লোতি সব্বাকাৰেন সুপুপ্ফিতো. দিব্বে চত্তাৰো মাসেতি দিব্বেন আযুনা চত্তাৰো মাসে. মনুস্সগণনায পন তানি দ্ৱাদস ৱস্সসহস্সানি হোন্তি. পৰিচাৰেন্তীতি ইতো চিতো চ ইন্দ্ৰিযানি চাৰেন্তি, কীড়ন্তি ৰমন্তীতি অত্থো.

আভায ফুটং হোতীতি তত্তকং ঠানং ওভাসেন ফুটং হোতি. তেসঞ্হি পুপ্ফানং বালসূৰিযস্স ৱিয আভা হোতি, পত্তানি পণ্ণচ্ছত্তপ্পমাণানি, অন্তো মহাতুম্বমত্তা ৰেণু হোতি. পুপ্ফিতে পন পাৰিচ্ছত্তকে আৰোহনকিচ্চং ৱা অঙ্কুসকং গহেত্ৱা নমনকিচ্চং ৱা পুপ্ফাহৰণত্থং চঙ্গোটককিচ্চং ৱা নত্থি, কন্তনকৱাতো উট্ঠহিত্ৱা পুপ্ফানি ৱণ্টতো কন্ততি, সম্পটিচ্ছনকৱাতো সম্পটিচ্ছতি, পৱেসনকৱাতো সুধম্মং দেৱসভং পৱেসেতি, সম্মজ্জনকৱাতো পুৰাণপুপ্ফানি নীহৰতি, সন্থৰণকৱাতো পত্তকণ্ণিককেসৰানি ৰঞ্জেন্তো সন্থৰতি. মজ্ঝট্ঠানে ধম্মাসনং হোতি যোজনপ্পমাণো ৰতনপল্লঙ্কো উপৰি তিযোজনেন সেতচ্ছত্তেন ধাৰিযমানেন, তদনন্তৰং সক্কস্স দেৱৰঞ্ঞো আসনং অত্থৰিযতি, ততো তেত্তিংসায দেৱপুত্তানং, ততো অঞ্ঞেসং মহেসক্খানং দেৱানং, অঞ্ঞতৰদেৱতানং পুপ্ফকণ্ণিকাৱ আসনং হোতি. দেৱা দেৱসভং পৱিসিত্ৱা নিসীদন্তি. ততো পুপ্ফেহি ৰেণুৱট্টি উগ্গন্ত্ৱা উপৰিকণ্ণিকং আহচ্চ নিপতমানা দেৱতানং তিগাৱুতপ্পমাণং অত্তভাৱং লাখাৰসপৰিকম্মসজ্জিতং ৱিয সুৱণ্ণচুণ্ণপিঞ্জৰং ৱিয কৰোতি. একচ্চে দেৱা একেকং পুপ্ফং গহেত্ৱা অঞ্ঞমঞ্ঞং পহৰন্তাপি কীড়ন্তিযেৱ. পহৰণকালেপি মহাতুম্বপ্পমাণা ৰেণু নিক্খমিত্ৱা সৰীৰং পভাসম্পন্নেহি গন্ধচুণ্ণেহি সঞ্জতমনোসিলাৰাগং ৱিয কৰোতি. এৱং সা কীড়া চতূহি মাসেহি পৰিযোসানং গচ্ছতি. অযমানুভাৱোতি অযং অনুফৰিতুং আনুভাৱো.

ইদানি যস্মা ন সত্থা পাৰিচ্ছত্তকেন অত্থিকো, তেন পন সদ্ধিং উপমেত্ৱা সত্ত অৰিযসাৱকে দস্সেতুকামো, তস্মা তে দস্সেতুং এৱমেৱ খোতিআদিমাহ. তত্থ পব্বজ্জায চেতেতীতি পব্বজিস্সামীতি চিন্তেতি. দেৱানংৱাতি দেৱানং ৱিয. যাৱ ব্ৰহ্মলোকা সদ্দো অব্ভুগ্গচ্ছতীতি পথৱিতলতো যাৱ ব্ৰহ্মলোকা সাধুকাৰসদ্দেন সব্বং একসদ্দমেৱ হোতি. অযমানুভাৱোতি অযং খীণাসৱস্স ভিক্খুনো অনুফৰণানুভাৱো. ইমস্মিং সুত্তে চতুপাৰিসুদ্ধিসীলং পব্বজ্জানিস্সিতং হোতি, কসিণপৰিকম্মং পঠমজ্ঝানসন্নিস্সিতং, ৱিপস্সনায সদ্ধিং তযো মগ্গা তীণি চ ফলানি অৰহত্তমগ্গসন্নিস্সিতানি হোন্তি. দেসনায হেট্ঠতো ৱা উপৰিতো ৱা উভযতো ৱা পৰিচ্ছেদো হোতি, ইধ পন উভযতো পৰিচ্ছেদো. তেনেতং ৱুত্তং. সঙ্খেপতো পনেত্থ ৱট্টৱিৱট্টং কথিতন্তি ৱেদিতব্বং.