২. পুৰিসগতিসুত্তৱণ্ণনা

৫৫. দুতিযে পুৰিসগতিযোতি পুৰিসস্স ঞাণগতিযো. অনুপাদাপৰিনিব্বানন্তি অপচ্চযনিব্বানং. নো চস্সাতি অতীতে অত্তভাৱনিব্বত্তকং কম্মং নো চে অভৱিস্স. নো চ মে সিযাতি এতৰহি মে অযং অত্তভাৱো ন সিযা. ন ভৱিস্সতীতি এতৰহি মে অনাগতত্তভাৱনিব্বত্তকং কম্মং ন ভৱিস্সতি. ন চ মে ভৱিস্সতীতি অনাগতে মে অত্তভাৱো ন ভৱিস্সতি. যদত্থি যং ভূতন্তি যং অত্থি যং ভূতং পচ্চুপ্পন্নক্খন্ধপঞ্চকং. তং পজহামীতি উপেক্খং পটিলভতীতি তং তত্থ ছন্দৰাগপ্পহানেন পজহামীতি ৱিপস্সনুপেক্খং পটিলভতি. ভৱে ন ৰজ্জতীতি অতীতে খন্ধপঞ্চকে তণ্হাদিট্ঠীহি ন ৰজ্জতি. সম্ভৱে ন ৰজ্জতীতি অনাগতেপি তথেৱ ন ৰজ্জতি. অত্থুত্তৰি পদং সন্তন্তি উত্তৰি সন্তং নিব্বানপদং নাম অত্থি. সম্মপ্পঞ্ঞায পস্সতীতি তং সহৱিপস্সনায মগ্গপঞ্ঞায সম্মা পস্সতি. ন সব্বেন সব্বন্তি একচ্চানং কিলেসানং অপ্পহীনত্তা সচ্চপটিচ্ছাদকস্স তমস্স সব্বসো অৱিদ্ধংসিতত্তা ন সব্বাকাৰেন সব্বং. হঞ্ঞমানেতি সণ্ডাসেন গহেত্ৱা মুট্ঠিকায কোট্টিযমানে. অন্তৰাপৰিনিব্বাযীতি উপপত্তিসমনন্তৰতো পট্ঠায আযুনো ৱেমজ্ঝং অনতিক্কমিত্ৱা এত্থন্তৰে কিলেসপৰিনিব্বানেন পৰিনিব্বুতো হোতি. অনুপহচ্চ তলন্তি আকাসতলং অনুপহচ্চ অনতিক্কমিত্ৱা, ভূমিং অপ্পত্ৱা আকাসেযেৱ নিব্বাযেয্যাতি ইমাহি তীহি উপমাহি তযো অন্তৰাপৰিনিব্বাযী দস্সিতা.

উপহচ্চপৰিনিব্বাযীতি আযুৱেমজ্ঝং অতিক্কমিত্ৱা পচ্ছিমকোটিং অপ্পত্ৱা পৰিনিব্বুতো হোতি. উপহচ্চ তলন্তি জলমানা গন্ত্ৱা আকাসতলং অতিক্কমিত্ৱা পথৱীতলং ৱা উপহনিত্ৱা পথৱিযং পতিতমত্তাৱ নিব্বাযেয্য. অসঙ্খাৰেন অপ্পযোগেন কিলেসে খেপেত্ৱা পৰিনিব্বাযীতি অসঙ্খাৰপৰিনিব্বাযী. সসঙ্খাৰেন সপ্পযোগেন কিলেসে খেপেত্ৱা পৰিনিব্বাযীতি সসঙ্খাৰপৰিনিব্বাযী. গচ্ছন্তি নিৰাৰক্খং অৰঞ্ঞং. দাযন্তি সাৰক্খং অভযত্থায দিন্নং অৰঞ্ঞং. সেসমেত্থ উত্তানত্থমেৱ. ইমস্মিং সুত্তে অৰিযপুগ্গলাৱ কথিতাতি.