৫. পঞ্চমপণ্ণাসকং

(২১) ১. কিমিলৱগ্গো

১. কিমিলসুত্তৱণ্ণনা

২০১. পঞ্চমস্স পঠমে কিমিলাযন্তি এৱংনামকে নগৰে. নিচুলৱনেতি মুচলিন্দৱনে. এতদৱোচাতি অযং কিৰ থেৰো তস্মিংযেৱ নগৰে সেট্ঠিপুত্তো সত্থু সন্তিকে পব্বজিত্ৱা পুব্বেনিৱাসঞাণং পটিলভি. সো অত্তনা নিৱুত্থং খন্ধসন্তানং অনুস্সৰন্তো কস্সপদসবলস্স সাসনোসক্কনকালে পব্বজিত্ৱা চতূসু পৰিসাসু সাসনে অগাৰৱং কৰোন্তীসু নিস্সেণিং বন্ধিত্ৱা পব্বতং আৰুয্হ তত্থ সমণধম্মং কত্ৱা অত্তনো নিৱুত্থভাৱং অদ্দস. সো ‘‘সত্থাৰং উপসঙ্কমিত্ৱা তং কাৰণং পুচ্ছিস্সামী’’তি এতং ‘‘কো নু খো, ভন্তে’’তিআদিৱচনং অৱোচ.

সত্থৰি অগাৰৱা ৱিহৰন্তি অপ্পতিস্সাতি সত্থৰি গাৰৱঞ্চেৱ জেট্ঠকভাৱঞ্চ অনুপট্ঠপেত্ৱা ৱিহৰন্তি. সেসেসুপি এসেৱ নযো. তত্থ চেতিযঙ্গণাদীসু ছত্তং ধাৰেত্ৱা উপাহনা আৰুয্হ ৱিচৰন্তো নানপ্পকাৰঞ্চ নিৰত্থককথং কথেন্তো সত্থৰি অগাৰৱো ৱিহৰতি নাম. ধম্মস্সৱনগ্গে পন নিসীদিত্ৱা নিদ্দাযন্তো চেৱ নানপ্পকাৰঞ্চ নিৰত্থককথং কথেন্তো ধম্মে অগাৰৱো ৱিহৰতি নাম. সঙ্ঘমজ্ঝে বাহাৱিক্খেপকং নানত্তকথং কথেন্তো থেৰনৱমজ্ঝিমেসু চ চিত্তীকাৰং অকৰোন্তো সঙ্ঘে অগাৰৱো ৱিহৰতি নাম. সিক্খং অপৰিপূৰেন্তো সিক্খায অগাৰৱো ৱিহৰতি নাম. অঞ্ঞমঞ্ঞং কলহভণ্ডনাদীনি কৰোন্তো অঞ্ঞমঞ্ঞং অগাৰৱো ৱিহৰতি নাম. দুতিযং উত্তানত্থমেৱ.

৩. অস্সাজানীযসুত্তৱণ্ণনা

২০৩-২০৪. ততিযে অজ্জৱেনাতি উজুভাৱেন অৱঙ্কগমনেন. জৱেনাতি পদজৱেন. মদ্দৱেনাতি সৰীৰমুদুতায. খন্তিযাতি অধিৱাসনক্খন্তিযা. সোৰচ্চেনাতি সুচিসীলতায. ভিক্খুৱাৰে অজ্জৱন্তি ঞাণস্স উজুকগমনং. জৱোতি সূৰং হুত্ৱা ঞাণস্স গমনভাৱো. মদ্দৱন্তি সীলমদ্দৱং. খন্তীতি অধিৱাসনক্খন্তিযেৱ. সোৰচ্চং সুচিসীলতাযেৱ. চতুত্থে পঞ্চ বলানি মিস্সকানি কথিতানি.

৫. চেতোখিলসুত্তৱণ্ণনা

২০৫. পঞ্চমে চেতোখিলাতি চিত্তস্স থদ্ধভাৱা, কচৱৰভাৱা, খাণুকভাৱা. সত্থৰি কঙ্খতীতি সত্থু সৰীৰে ৱা গুণে ৱা কঙ্খতি. সৰীৰে কঙ্খমানো ‘‘দ্ৱত্তিংসৱৰপুৰিসলক্খণপটিমণ্ডিতং নাম সৰীৰং অত্থি নু খো নত্থী’’তি কঙ্খতি, গুণে কঙ্খমানো ‘‘অতীতানাগতপচ্চুপ্পন্নজাননসমত্থং সব্বঞ্ঞুতঞ্ঞাণং অত্থি নু খো নত্থী’’তি কঙ্খতি. ৱিচিকিচ্ছতীতি ৱিচিনন্তো কিচ্ছতি, দুক্খং আপজ্জতি, ৱিনিচ্ছেতুং ন সক্কোতি. নাধিমুচ্চতীতি এৱমেতন্তি অধিমোক্খং ন পটিলভতি. ন সম্পসীদতীতি গুণেসু ওতৰিত্ৱা নিব্বিচিকিচ্ছভাৱেন পসীদিতুং অনাৱিলো ভৱিতুং ন সক্কোতি. আতপ্পাযাতি কিলেসসন্তাপকৱীৰিযকৰণত্থায. অনুযোগাযাতি পুনপ্পুনং যোগায. সাতচ্চাযাতি সততকিৰিযায. পধানাযাতি পদহনত্থায. অযং পঠমো চেতোখিলোতি অযং সত্থৰি ৱিচিকিচ্ছাসঙ্খাতো পঠমো চিত্তস্স থদ্ধভাৱো এৱমেতস্স ভিক্খুনো অপ্পহীনো হোতি.

ধম্মেতি পৰিযত্তিধম্মে চ পটিৱেধধম্মে চ. পৰিযত্তিধম্মে কঙ্খমানো ‘‘তেপিটকং বুদ্ধৱচনং চতুৰাসীতিধম্মক্খন্ধসহস্সানীতি ৱদন্তি, অত্থি নু খো এতং নত্থী’’তি কঙ্খতি. পটিৱেধধম্মে কঙ্খমানো ‘‘ৱিপস্সনানিস্সন্দো মগ্গো নাম, মগ্গনিস্সন্দং ফলং নাম, সব্বসঙ্খাৰপটিনিস্সগ্গো নিব্বানং নামাতি ৱদন্তি, তং অত্থি নু খো নত্থী’’তি কঙ্খতি. সঙ্ঘে কঙ্খতীতি ‘‘উজুপ্পটিপন্নো’’তিআদীনং পদানং ৱসেন ‘‘এৱৰূপং পটিপদং পটিপন্নো চত্তাৰো মগ্গট্ঠা চত্তাৰো ফলট্ঠাতি অট্ঠন্নং পুগ্গলানং সমূহভূতো সঙ্ঘো নাম অত্থি নু খো নত্থী’’তি কঙ্খতি. সিক্খায কঙ্খমানো ‘‘অধিসীলসিক্খা নাম অধিচিত্তঅধিপঞ্ঞাসিক্খা নামাতি ৱদন্তি, সা অত্থি নু খো নত্থী’’তি কঙ্খতি. অযং পঞ্চমোতি অযং সব্ৰহ্মচাৰীসু কোপসঙ্খাতো পঞ্চমো চিত্তস্স থদ্ধভাৱো কচৱৰভাৱো খাণুকভাৱো.

৬. ৱিনিবন্ধসুত্তৱণ্ণনা

২০৬. ছট্ঠে চেতসোৱিনিবন্ধাতি চিত্তং ৱিনিবন্ধিত্ৱা মুট্ঠিযং কত্ৱা ৱিয গণ্হন্তীতি চেতসোৱিনিবন্ধা. কামেতি ৱত্থুকামেপি কিলেসকামেপি. কাযেতি অত্তনো কাযে. ৰূপেতি বহিদ্ধাৰূপে. যাৱদত্থন্তি যত্তকং ইচ্ছতি, তত্তকং. উদৰাৱদেহকন্তি উদৰপূৰং. তঞ্হি উদৰং অৱদেহনতো উদৰাৱদেহকন্তি ৱুচ্চতি. সেয্যসুখন্তি মঞ্চপীঠসুখং, উতুসুখং ৱা. পস্সসুখন্তি যথা সম্পৰিৱত্তকং সযন্তস্স দক্খিণপস্স ৱামপস্সানং সুখং হোতি, এৱং উপ্পন্নসুখং. মিদ্ধসুখন্তি নিদ্দাসুখং. অনুযুত্তোতি যুত্তপ্পযুত্তো ৱিহৰতি. পণিধাযাতি পত্থযিত্ৱা. সীলেনাতিআদীসু সীলন্তি চতুপাৰিসুদ্ধিসীলং. ৱতন্তি ৱতসমাদানং. তপোতি তপচৰণং. ব্ৰহ্মচৰিযন্তি মেথুনৱিৰতি. দেৱো ৱা ভৱিস্সামীতি মহেসক্খদেৱো ৱা ভৱিস্সামি. দেৱঞ্ঞতৰো ৱাতি অপ্পেসক্খদেৱেসু ৱা অঞ্ঞতৰোতি.

৭-৮. যাগুসুত্তাদিৱণ্ণনা

২০৭-২০৮. সত্তমে ৱাতং অনুলোমেতীতি ৱাতং অনুলোমেত্ৱা হৰতি. ৱত্থিং সোধেতীতি ধমনিযো সুদ্ধা কৰোতি. আমাৱসেসং পাচেতীতি সচে আমাৱসেসকং হোতি, তং পাচেতি. অট্ঠমে অচক্খুস্সন্তি ন চক্খূনং হিতং, চক্খুং ৱিসুদ্ধং ন কৰোতি.

৯. গীতস্সৰসুত্তৱণ্ণনা

২০৯. নৱমে আযতকেনাতি দীঘেন, পৰিপুণ্ণপদব্যঞ্জনকং গাথাৱত্তঞ্চ ৱিনাসেত্ৱা পৱত্তেন. সৰকুত্তিম্পি নিকামযমানস্সাতি এৱং গীতস্সৰো কাতব্বোতি সৰকিৰিযং পত্থযমানস্স. সমাধিস্স ভঙ্গো হোতীতি সমথৱিপস্সনাচিত্তস্স ৱিনাসো হোতি.

১০. মুট্ঠস্সতিসুত্তৱণ্ণনা

২১০. দসমে দুক্খং সুপতীতি নানাৱিধং সুপিনং পস্সন্তো দুক্খং সুপতি. দুক্খং পটিবুজ্ঝতীতি পটিবুজ্ঝন্তোপি উত্তসিত্ৱা সলোমহংসো পটিবুজ্ঝতি. ইমস্মিং সুত্তে সতিসম্পজঞ্ঞং মিস্সকং কথিতং.

কিমিলৱগ্গো পঠমো.

(২২) ২. অক্কোসকৱগ্গো

১. অক্কোসকসুত্তৱণ্ণনা

২১১. দুতিযস্স পঠমে অক্কোসকপৰিভাসকোতি দসহি অক্কোসৱত্থূহি অক্কোসকো, ভযদস্সনেন পৰিভাসকো. ছিন্নপৰিপন্থোতি লোকুত্তৰপৰিপন্থস্স ছিন্নত্তা ছিন্নপৰিপন্থো. ৰোগাতঙ্কন্তি ৰোগোযেৱ কিচ্ছজীৱিকাযাৱহনতো ৰোগাতঙ্কো নাম.

২. ভণ্ডনকাৰকসুত্তৱণ্ণনা

২১২. দুতিযে অধিকৰণকাৰকোতি চতুন্নং অধিকৰণানং অঞ্ঞতৰস্স কাৰকো. অনধিগতন্তি পুব্বে অপ্পত্তৱিসেসং.

৩. সীলসুত্তৱণ্ণনা

২১৩. ততিযে দুস্সীলোতি অসীলো নিস্সীলো. সীলৱিপন্নোতি ৱিপন্নসীলো ভিন্নসংৱৰো. পমাদাধিকৰণন্তি পমাদকাৰণা. ইদঞ্চ সুত্তং গহট্ঠানং ৱসেন আগতং, পব্বজিতানম্পি পন লব্ভতেৱ. গহট্ঠো হি যেন যেন সিপ্পট্ঠানেন জীৱিকং কপ্পেতি, যদি কসিযা, যদি ৱণিজ্জায, পাণাতিপাতাদিৱসেন পমত্তো তং তং যথাকালং সম্পাদেতুং ন সক্কোতি, অথস্স মূলং ৱিনস্সতি. মাঘাতকালেপি পাণাতিপাতং অদিন্নাদানাদীনি চ কৰোন্তো দণ্ডৱসেন মহতিং ভোগজানিং নিগচ্ছতি. পব্বজিতো দুস্সীলো পমাদকাৰণা সীলতো বুদ্ধৱচনতো ঝানতো সত্তঅৰিযধনতো চ জানিং নিগচ্ছতি. গহট্ঠস্স ‘‘অসুকো অসুককুলে জাতো দুস্সীলো পাপধম্মো পৰিচ্চত্তইধলোকপৰলোকো সলাকভত্তমত্তম্পি ন দেতী’’তি চতুপৰিসমজ্ঝে পাপকো কিত্তিসদ্দো অব্ভুগ্গচ্ছতি. পব্বজিতস্স ‘‘অসুকো নাসক্খি সীলং ৰক্খিতুং বুদ্ধৱচনং গহেতুং, ৱেজ্জকম্মাদীহি জীৱতি, ছহি অগাৰৱেহি সমন্নাগতো’’তি এৱং অব্ভুগ্গচ্ছতি.

অৱিসাৰদোতি গহট্ঠো তাৱ ‘‘অৱস্সং বহূনং সন্নিপাতট্ঠানে কোচি মম কম্মং জানিস্সতি, অথ মং নিগ্গণ্হিস্সন্তি ৱা, ৰাজকুলস্স ৱা দস্সন্তী’’তি সভযো উপসঙ্কমতি. মঙ্কুভূতো চ পতিতক্খন্ধো অধোমুখো অঙ্গুট্ঠকেন ভূমিং কসন্তো নিসীদতি, ৱিসাৰদো হুত্ৱা কথেতুং ন সক্কোতি. পব্বজিতোপি ‘‘বহূ ভিক্খূ সন্নিপতিতা, অৱস্সং কোচি মম কম্মং জানিস্সতি, অথ মে উপোসথম্পি পৱাৰণম্পি ঠপেত্ৱা সামঞ্ঞা চাৱেত্ৱা নিক্কড্ঢিস্সন্তী’’তি সভযো উপসঙ্কমতি, ৱিসাৰদো হুত্ৱা কথেতুং ন সক্কোতি. একচ্চো পন দুস্সীলোপি দপ্পিতো ৱিয চৰতি, সোপি অজ্ঝাসযেন মঙ্কু হোতিযেৱ.

সম্মূড়্হো কালং কৰোতীতি তস্স হি মৰণমঞ্চে নিপন্নস্স দুস্সীলকম্মং সমাদায ৱত্তিতট্ঠানং আপাথং আগচ্ছতি. সো উম্মীলেত্ৱা ইধলোকং পস্সতি, নিম্মীলেত্ৱা পৰলোকং. তস্স চত্তাৰো অপাযা উপট্ঠহন্তি, সত্তিসতেন সীসে পহৰিযমানো ৱিয হোতি. সো ‘‘ৱাৰেথ ৱাৰেথা’’তি ৱিৰৱন্তো মৰতি. তেন ৱুত্তং – ‘‘সম্মূড়্হো কালং কৰোতী’’তি. পঞ্চমপদং উত্তানমেৱ. আনিসংসকথা ৱুত্তৱিপৰিযাযেন ৱেদিতব্বা.

৪. বহুভাণিসুত্তৱণ্ণনা

২১৪. চতুত্থে বহুভাণিস্মিন্তি পঞ্ঞায অপৰিচ্ছিন্দিত্ৱা বহুং ভণন্তে. মন্তভাণিস্মিন্তি মন্তা ৱুচ্চতি পঞ্ঞা, তায পৰিচ্ছিন্দিত্ৱা ভণন্তে.

৫. পঠমঅক্খন্তিসুত্তৱণ্ণনা

২১৫. পঞ্চমে ৱেৰবহুলোতি পুগ্গলৱেৰেনপি অকুসলৱেৰেনপি বহুৱেৰো. ৱজ্জবহুলোতি দোসবহুলো.

৬. দুতিযঅক্খন্তিসুত্তৱণ্ণনা

২১৬. ছট্ঠে লুদ্দোতি দাৰুণো কক্খড়ো. ৱিপ্পটিসাৰীতি মঙ্কুভাৱেন সমন্নাগতো.

৭.পঠমঅপাসাদিকসুত্তৱণ্ণনা

২১৭. সত্তমে অপাসাদিকেতি অপাসাদিকেহি কাযকম্মাদীহি সমন্নাগতে. পাসাদিকেতি পসাদাৱহে পৰিসুদ্ধসমাচাৰে. অট্ঠমনৱমানি উত্তানত্থানেৱ.

১০. মধুৰাসুত্তৱণ্ণনা

২২০. দসমে পঞ্চিমে, ভিক্খৱে, আদীনৱা মধুৰাযন্তি একং সমযং ভগৱা ভিক্খুসঙ্ঘপৰিৱুতো চাৰিকং চৰমানো মধুৰানগৰং সম্পাপুণিত্ৱা অন্তোনগৰং পৱিসিতুং আৰভি. অথেকা মিচ্ছাদিট্ঠিকা যক্খিনী অচেলা হুত্ৱা দ্ৱে হত্থে পসাৰেত্ৱা জিৱ্হং নিল্লালেত্ৱা দসবলস্স পুৰতো অট্ঠাসি. সত্থা অন্তোনগৰং অপ্পৱিসিত্ৱা ততোৱ নিক্খমিত্ৱা ৱিহাৰং অগমাসি. মহাজনো খাদনীযভোজনীযঞ্চেৱ সক্কাৰসম্মানঞ্চ আদায ৱিহাৰং গন্ত্ৱা বুদ্ধপ্পমুখস্স ভিক্খুসঙ্ঘস্স দানং অদাসি. সত্থা তস্স নগৰস্স নিগ্গণ্হনত্থায ইমং সুত্তং আৰভি. তত্থ ৱিসমাতি ন সমতলা. বহুৰজাতি ৱাতপহৰণকালে উদ্ধতেন ৰজক্খন্ধেন পৰিযোনদ্ধা ৱিয হোতি. সেসং সব্বত্থ উত্তানমেৱাতি.

অক্কোসকৱগ্গো দুতিযো.

(২৩) ৩. দীঘচাৰিকৱগ্গো

১. পঠমদীঘচাৰিকসুত্তৱণ্ণনা

২২১. ততিযস্স পঠমে অনৱত্থচাৰিকন্তি অৱৱত্থিতচাৰিকং. সুতং ন পৰিযোদপেতীতি যম্পিস্স সুতং অত্থি, তং পৰিযোদপেতুং ন সক্কোতি. সুতেনেকচ্চেন অৱিসাৰদো হোতীতি থোকথোকেন সুতেন ৱিজ্জমানেনাপি ঞাণেন সোমনস্সপ্পত্তো ন হোতি. সমৱত্থচাৰেতি সমৱত্থিতচাৰে. দুতিযং উত্তানত্থমেৱ.

৩-৪. অতিনিৱাসসুত্তাদিৱণ্ণনা

২২৩-২২৪. ততিযে বহুভণ্ডোতি বহুপৰিক্খাৰো. বহুভেসজ্জোতি সপ্পিনৱনীতাদীনং বহুতায বহুভেসজ্জো. ব্যত্তোতি ব্যাসত্তো. সংসট্ঠোতি পঞ্চৱিধেন সংসগ্গেন সংসট্ঠো হুত্ৱা. অননুলোমিকেনাতি সাসনস্স অননুচ্ছৱিকেন. চতুত্থে ৱণ্ণমচ্ছৰীতি গুণমচ্ছৰী. ধম্মমচ্ছৰীতি পৰিযত্তিমচ্ছৰী.

৫-৬. কুলূপকসুত্তাদিৱণ্ণনা

২২৫-২২৬. পঞ্চমে অনামন্তচাৰে আপজ্জতীতি ‘‘নিমন্তিতো সভত্তো সমানো সন্তং ভিক্খুং অনাপুচ্ছা পুৰেভত্তং ৱা পচ্ছাভত্তং ৱা কুলেসু চাৰিত্তং আপজ্জেয্যা’’তি সিক্খাপদে (পাৰা. ২৯৪) ৱুত্তং আপত্তিং আপজ্জতি. ৰহো নিসজ্জাযাতিআদীনিপি তেসং তেসং সিক্খাপদানং ৱসেন ৱেদিতব্বানি. ছট্ঠে অতিৱেলন্তি অতিক্কন্তপমাণকালং. সত্তমং উত্তানমেৱ.

৮. উস্সূৰভত্তসুত্তৱণ্ণনা

২২৮. অট্ঠমে উস্সূৰভত্তেতি অতিদিৱাপচনভত্তে. ন কালেন পটিপূজেন্তীতি যাগুকালে যাগুং, খজ্জককালে খজ্জকং, ভোজনকালে ভোজনং অপচন্তা যুত্তপ্পযুত্তকালস্স অতিনামিতত্তা ন কালেন পটিপূজেন্তি, অত্তনো চিত্তেনেৱ দেন্তি নাম. ততো তেপি তেসু অত্তনো গেহং আগতেসু তথেৱ কৰোন্তি. কুলপৱেণিযা আগতা বলিপটিগ্গাহিকা দেৱতাপি যুত্তপ্পযুত্তকালেন লাভং লভমানাযেৱ ৰক্খন্তি গোপযন্তি পীড়ং অকত্ৱা. অকালে লভমানা পন ‘‘ইমে অম্হেসু অনাদৰা’’তি আৰক্খং ন কৰোন্তি.

সমণব্ৰাহ্মণাপি ‘‘এতেসং গেহে ভোজনৱেলায ভোজনং ন হোতি, ঠিতমজ্ঝন্হিকে দেন্তী’’তি মঙ্গলামঙ্গলেসু কাতব্বং ন কৰোন্তি. ৱিমুখা কম্মং কৰোন্তীতি ‘‘পাতো কিঞ্চি ন লভাম, খুদায পটিপীড়িতা কম্মং কাতুং ন সক্কোমা’’তি কম্মং ৱিস্সজ্জেত্ৱা নিসীদন্তি. অনোজৱন্তং হোতীতি অকালে ভুত্তং ওজং হৰিতুং ন সক্কোতি. সুক্কপক্খো ৱুত্তৱিপল্লাসেন ৱেদিতব্বো.

৯. পঠমকণ্হসপ্পসুত্তৱণ্ণনা

২২৯. নৱমে সভীৰূতি সনিদ্দো মহানিদ্দং নিদ্দাযতি. সপ্পটিভযোতি তং নিস্সায ভযং উপ্পজ্জতি, তস্মা সপ্পটিভযো. মিত্তদুব্ভীতি পানভোজনদাযকম্পি মিত্তং দুব্ভতি হিংসতি. মাতুগামেপি এসেৱ নযো.

১০. দুতিযকণ্হসপ্পসুত্তৱণ্ণনা

২৩০. দসমে ঘোৰৱিসোতি কক্খড়ৱিসো. দুজ্জিৱ্হোতি দ্ৱিধা ভিন্নজিৱ্হো. ঘোৰৱিসতাতি ঘোৰৱিসতায. সেসদ্ৱযেপি এসেৱ নযো.

দীঘচাৰিকৱগ্গো ততিযো.

(২৪) ৪. আৱাসিকৱগ্গো

১. আৱাসিকসুত্তৱণ্ণনা

২৩১. চতুত্থস্স পঠমে ন আকপ্পসম্পন্নোতি সমণাকপ্পেন সম্পন্নো. অভাৱনীযো হোতীতি ৱড্ঢনীযো ন হোতি. দুতিযং উত্তানমেৱ.

৩. সোভনসুত্তৱণ্ণনা

২৩৩. ততিযে পটিবলোতি কাযবলেন চ ঞাণবলেন চ সমন্নাগতত্তা পটিবলো.

৪. বহূপকাৰসুত্তৱণ্ণনা

২৩৪. চতুত্থে খণ্ডফুল্লন্তি পতিতট্ঠানঞ্চ ভিন্নট্ঠানঞ্চ. পটিসঙ্খৰোতীতি পটিপাকতিকং কৰোতি. আৰোচেতীতি ইদং পৱাৰিতকুলানং ৱসেন ৱুত্তং.

৫. অনুকম্পসুত্তৱণ্ণনা

২৩৫. পঞ্চমে অধিসীলেসূতি পঞ্চসু সীলেসু. ধম্মদস্সনে নিৱেসেতীতি চতুসচ্চধম্মদস্সনে পতিট্ঠাপেতি. অৰহগ্গতন্তি সব্বসক্কাৰানং অৰহে ৰতনত্তযেৱ গতং, তীসু ৱত্থূসু গৰুচিত্তীকাৰং উপট্ঠপেথাতি অত্থো. ছট্ঠং উত্তানমেৱ.

৭. দুতিযঅৱণ্ণাৰহসুত্তৱণ্ণনা

২৩৭. সত্তমে আৱাসপলিগেধীতি আৱাসং বলৱগিদ্ধিৱসেন গিলিত্ৱা ৱিয ঠিতো. সেসং সব্বং উত্তানমেৱাতি.

আৱাসিকৱগ্গো চতুত্থো.

(২৫) ৫. দুচ্চৰিতৱগ্গো

১. পঠমদুচ্চৰিতসুত্তৱণ্ণনা

২৪১. পঞ্চমস্স পঠমে দুচ্চৰিতে সুচৰিতেতি ইদং অভেদতো ৱুত্তং, কাযদুচ্চৰিতেতিআদি কাযদ্ৱাৰাদীনং ৱসেন ভেদতো. সদ্ধম্মাতি দসকুসলকম্মপথধম্মতো. অসদ্ধম্মেতি অকুসলকম্মপথসঙ্খাতে অস্সদ্ধম্মে.

৯. সিৱথিকসুত্তৱণ্ণনা

২৪৯. নৱমে সিৱথিকাযাতি সুসানে. আৰোদনাতি আৰোদনট্ঠানং. অসুচিনাতি জিগুচ্ছনীযেন.

১০. পুগ্গলপ্পসাদসুত্তৱণ্ণনা

২৫০. দসমে পুগ্গলপ্পসাদেতি একপুগ্গলস্মিং উপ্পন্নপ্পসাদে. অন্তে নিসীদাপেতীতি ভিক্খূনং আসনপৰিযন্তে নিসীদাপেতি. সেসং সব্বত্থ উত্তানত্থমেৱাতি.

দুচ্চৰিতৱগ্গো পঞ্চমো.

পঞ্চমপণ্ণাসকং নিট্ঠিতং.