(২৬) ৬. উপসম্পদাৱগ্গো

১-৩. উপসম্পাদেতব্বসুত্তাদিৱণ্ণনা

২৫১-২৫৩. ছট্ঠস্স পঠমে উপসম্পাদেতব্বন্তি উপজ্ঝাযেন হুত্ৱা উপসম্পাদেতব্বং. দুতিযে নিস্সযো দাতব্বোতি আচৰিযেন হুত্ৱা নিস্সযো দাতব্বো. ততিযে সামণেৰো উপট্ঠাপেতব্বোতি উপজ্ঝাযেন হুত্ৱা সামণেৰো গহেতব্বো. ইতি ইমানি তীণিপি সুত্তানি পঠমবোধিযং খীণাসৱৱসেন ৱুত্তানি. চতুত্থাদীনি অনুপদৱণ্ণনাতো উত্তানত্থানেৱ.

১. সম্মুতিপেয্যালাদিৱণ্ণনা

২৭২. ভত্তুদ্দেসকাদীনং ৱিনিচ্ছযকথা সমন্তপাসাদিকায ৱিনযট্ঠকথাযং (চূড়ৱ. অট্ঠ. ৩২৫) ৱুত্তনযেন ৱেদিতব্বাতি. সম্মতো ন পেসেতব্বোতি পকতিযা সম্মতো ‘‘গচ্ছ ভত্তানি উদ্দিসাহী’’তি ন পেসেতব্বো.

২৭৩-২৮৫. সাটিযগ্গাহাপকোতি ৱস্সিকসাটিকায গাহাপকো. পত্তগ্গাহাপকোতি ‘‘যো চ তস্সা ভিক্খুপৰিসায পত্তপৰিযন্তো, সো তস্স ভিক্খুনো পদাতব্বো’’তি এত্থ ৱুত্তপত্তগ্গাহাপকো.

২৯৩-৩০২. আজীৱকোতি নগ্গপৰিব্বাজকো. নিগণ্ঠোতি পুৰিমভাগপ্পটিচ্ছন্নো. মুণ্ডসাৱকোতি নিগণ্ঠসাৱকো. জটিলকোতি তাপসো. পৰিব্বাজকোতি ছন্নপৰিব্বাজকো. মাগণ্ডিকাদযোপি তিত্থিযা এৱ. এতেসং পন সীলেসু পৰিপূৰকাৰিতায অভাৱেন সুক্কপক্খো ন গহিতো. সেসমেত্থ উত্তানমেৱাতি.

মনোৰথপূৰণিযা অঙ্গুত্তৰনিকায-অট্ঠকথায