৬. দুতিযযোধাজীৱসুত্তৱণ্ণনা

৭৬. ছট্ঠে অসিচম্মং গহেত্ৱাতি অসিঞ্চ চম্মঞ্চ গহেত্ৱা. ধনুকলাপং সন্নয্হিত্ৱাতি ধনুঞ্চ সৰকলাপঞ্চ সন্নয্হিত্ৱা. ৱিযূড়্হন্তি যুদ্ধসন্নিৱেসৱেসেন ঠিতং. সঙ্গামং ওতৰতীতি মহাযুদ্ধং ওতৰতি. উস্সহতি ৱাযমতীতি উস্সাহঞ্চ ৱাযামঞ্চ কৰোতি. হনন্তীতি ঘাতেন্তি. পৰিযাপাদেন্তীতি পৰিযাপাদযন্তি. উপলিক্খন্তীতি ৱিজ্ঝন্তি. অপনেন্তীতি সকসেনং গহেত্ৱা গচ্ছন্তি. অপনেত্ৱা ঞাতকানং নেন্তীতি সকসেনং নেত্ৱা ততো ঞাতকানং সন্তিকং নেন্তি. নীযমানোতি অত্তনো গেহং ৱা সেসঞাতিসন্তিকং ৱা নিয্যমানো. উপট্ঠহন্তি পৰিচৰন্তীতি পহাৰসোধনৱণকপ্পনাদীনি কৰোন্তা জগ্গন্তি গোপযন্তি.

অৰক্খিতেনেৱ কাযেনাতি অৰক্খিতেন কাযদ্ৱাৰেন. অৰক্খিতায ৱাচাযাতি অৰক্খিতেন ৱচীদ্ৱাৰেন. অৰক্খিতেন চিত্তেনাতি অৰক্খিতেন মনোদ্ৱাৰেন. অনুপট্ঠিতায সতিযাতি সতিং সুপট্ঠিতং অকত্ৱা. অসংৱুতেহি ইন্দ্ৰিযেহীতি মনচ্ছট্ঠেহি ইন্দ্ৰিযেহি অপিহিতেহি অগোপিতেহি. ৰাগো চিত্তং অনুদ্ধংসেতীতি ৰাগো উপ্পজ্জমানোৱ সমথৱিপস্সনাচিত্তং ধংসেতি, দূৰে খিপতি. ৰাগপৰিযুট্ঠিতোম্হি, আৱুসো, ৰাগপৰেতোতি অহং, আৱুসো, ৰাগেন ৰত্তো, ৰাগেন অনুগতো.

অট্ঠিকঙ্কলূপমাতিআদীসু অট্ঠিকঙ্কলূপমা অপ্পস্সাদট্ঠেন. মংসপেসূপমা বহুসাধাৰণট্ঠেন. তিণুক্কূপমা অনুদহনট্ঠেন. অঙ্গাৰকাসূপমা মহাভিতাপট্ঠেন. সুপিনকূপমা ইত্তৰপচ্চুপট্ঠানট্ঠেন. যাচিতকূপমা তাৱকালিকট্ঠেন. ৰুক্খফলূপমা সব্বঙ্গপচ্চঙ্গপলিভঞ্জনট্ঠেন. অসিসূনূপমা অধিকুট্টনট্ঠেন. সত্তিসূলূপমা ৱিনিৱিজ্ঝনট্ঠেন. সপ্পসিৰূপমা সাসঙ্কসপ্পটিভযট্ঠেন. উস্সহিস্সামীতি উস্সাহং কৰিস্সামি. ধাৰযিস্সামীতি সমণভাৱং ধাৰযিস্সামি. অভিৰমিস্সামীতি অভিৰতিং উপ্পাদেস্সামি ন উক্কণ্ঠিস্সামি. সেসমেত্থ উত্তানত্থমেৱ. ইমস্মিং সুত্তে ৱট্টৱিৱট্টং কথিতন্তি.