৩. পঠমধম্মৱিহাৰীসুত্তৱণ্ণনা

৭৩. ততিযে দিৱসং অতিনামেতীতি দিৱসং অতিক্কামেতি. ৰিঞ্চতি পটিসল্লানন্তি একীভাৱং ৱিস্সজ্জেতি. দেসেতীতি কথেতি পকাসেতি. ধম্মপঞ্ঞত্তিযাতি ধম্মস্স পঞ্ঞাপনায. ধম্মং পৰিযাপুণাতীতি নৱঙ্গৱসেন চতুসচ্চধম্মং পৰিযাপুণাতি ৱড়ঞ্জেতি কথেতি. ন ৰিঞ্চতি পটিসল্লানন্তি একীভাৱং ন ৱিস্সজ্জেতি. অনুযুঞ্জতি অজ্ঝত্তং চেতোসমথন্তি নিযকজ্ঝত্তে চিত্তসমাধিং আসেৱতি ভাৱেতি, সমথকম্মট্ঠানে যুত্তপ্পযুত্তো হোতি.

হিতেসিনাতি হিতং এসন্তেন. অনুকম্পকেনাতি অনুকম্পমানেন. অনুকম্পং উপাদাযাতি অনুকম্পং চিত্তেন পৰিগ্গহেত্ৱা, পটিচ্চাতিপি ৱুত্তং হোতি. কতং ৱো তং মযাতি তং মযা ইমে পঞ্চ পুগ্গলে দেসেন্তেন তুম্হাকং কতং. এত্তকমেৱ হি অনুকম্পকস্স সত্থু কিচ্চং যদিদং অৱিপৰীতধম্মদেসনা, ইতো পৰং পন পটিপত্তি নাম সাৱকানং কিচ্চং. তেনাহ – এতানি ভিক্খু ৰুক্খমূলানি…পে… অম্হাকং অনুসাসনীতি. তত্থ চ ৰুক্খমূলানীতি ইমিনা ৰুক্খমূলসেনাসনং দস্সেতি. সুঞ্ঞাগাৰানীতি ইমিনা জনৱিৱিত্তট্ঠানং. উভযেনাপি চ যোগানুৰূপং সেনাসনমাচিক্খতি, দাযজ্জং নিয্যাতেতি. ঝাযথাতি আৰম্মণূপনিজ্ঝানেন অট্ঠতিংসাৰম্মণানি, লক্খণূপনিজ্ঝানেন চ অনিচ্চাদিতো খন্ধাযতনাদীনি উপনিজ্ঝাযথ, সমথঞ্চ ৱিপস্সনঞ্চ ৱড্ঢেথাতি ৱুত্তং হোতি. মা পমাদত্থাতি মা পমজ্জিত্থ. মা পচ্ছা ৱিপ্পটিসাৰিনো অহুৱত্থাতি যে হি পুব্বে দহৰকালে আৰোগ্যকালে সত্তসপ্পাযাদিসম্পত্তিকালে সত্থু সম্মুখীভাৱকালে চ যোনিসোমনসিকাৰৱিৰহিতা ৰত্তিন্দিৱং মঙ্কুলভত্তা হুত্ৱা সেয্যসুখমিদ্ধসুখমনুযুত্তা পমজ্জন্তি, তে পচ্ছা জৰাকালে ৰোগকালে মৰণকালে ৱিপত্তিকালে সত্থু পৰিনিব্বানকালে চ তং পুব্বে পমাদৱিহাৰং অনুস্সৰন্তা সপ্পটিসন্ধিকালকিৰিযঞ্চ ভাৰিযং সম্পস্সমানা ৱিপ্পটিসাৰিনো হোন্তি. তুম্হে পন তাদিসা মা অহুৱত্থাতি এতমত্থং দস্সেন্তো আহ – ‘‘মা পচ্ছা ৱিপ্পটিসাৰিনো অহুৱত্থা’’তি. অযং ৱো অম্হাকং অনুসাসনীতি অযং অম্হাকং সন্তিকা ‘‘ঝাযথ মা পমাদত্থা’’তি তুম্হাকং অনুসাসনী, ওৱাদোতি ৱুত্তং হোতি.