১. পঠমচেতোৱিমুত্তিফলসুত্তৱণ্ণনা

৭১. ততিযস্স পঠমে যতো খো, ভিক্খৱেতি হেট্ঠা ৱুত্তনযেন ৱিপস্সনং ৱড্ঢেত্ৱা অৰহত্তং পত্তস্স ভিক্খুনো ইদানি ৱণ্ণভণনত্থং ইদং আৰদ্ধং. তত্থ যতো খোতি যদা খো. উক্খিত্তপলিঘোতি অৱিজ্জাপলিঘং উক্খিপিত্ৱা অপনেত্ৱা ঠিতো. সংকিণ্ণপৰিখোতি সংসাৰপৰিখং সংকিৰিত্ৱা ৱিনাসেত্ৱা ঠিতো. অব্বূড়্হেসিকোতি তণ্হাসঙ্খাতং এসিকাথম্ভং অব্বুয্হ লুঞ্চিত্ৱা ঠিতো. নিৰগ্গড়োতি নীৱৰণকৱাটং উগ্ঘাটেত্ৱা ঠিতো. পন্নদ্ধজো পন্নভাৰোতি মানদ্ধজঞ্চ খন্ধাভিসঙ্খাৰকিলেসভাৰঞ্চ পাতেত্ৱা ওতাৰেত্ৱা ঠিতো. ৱিসংযুত্তোতি ৱট্টেন ৱিসংযুত্তো. সেসং পাড়িনযেনেৱ ৱেদিতব্বং. এত্তাৱতা ভগৱতা মগ্গেন কিলেসে খেপেত্ৱা নিৰোধসযনৱৰগতস্স নিব্বানাৰম্মণং ফলসমাপত্তিং অপ্পেত্ৱা ৱিহৰতো খীণাসৱস্স কালো দস্সিতো.

যথা হি দ্ৱে নগৰানি একং চোৰনগৰং একং খেমনগৰং. অথ একস্স মহাযোধস্স এৱং ভৱেয্য – ‘‘যাৱিমং চোৰনগৰং তিট্ঠতি, তাৱ খেমনগৰং ভযতো ন মুচ্চতি, চোৰনগৰং অনগৰং কৰিস্সামী’’তি সন্নাহং কত্ৱা খগ্গং গহেত্ৱা চোৰনগৰং উপসঙ্কমিত্ৱা নগৰদ্ৱাৰে উস্সাপিতে এসিকাথম্ভে খগ্গেন ছিন্দিত্ৱা সদ্ধিং দ্ৱাৰবাহাহি কৱাটং ভিন্দিত্ৱা পলিঘং উক্খিপিত্ৱা পাকাৰং ভিন্দিত্ৱা পৰিখং ৱিকিৰিত্ৱা নগৰসোভত্থায উস্সিতে ধজে পাতেত্ৱা নগৰং অগ্গিনা ঝাপেত্ৱা খেমনগৰং পৱিসিত্ৱা পাসাদং আৰুয্হ ঞাতিগণপৰিৱুতো সুৰসভোজনং ভুঞ্জেয্য. এৱং চোৰনগৰং ৱিয সক্কাযো, খেমনগৰং ৱিয নিব্বানং, মহাযোধো ৱিয যোগাৱচৰো. তস্সেৱং হোতি – ‘‘যাৱ সক্কাযৱট্টং ৱট্টতি, তাৱ দ্ৱত্তিংসকম্মকাৰণাঅট্ঠনৱুতিৰোগপঞ্চৱীসতিমহাভযেহি পৰিমুচ্চনং নত্থী’’তি. সো মহাযোধো সন্নাহং ৱিয সীলসন্নাহং কত্ৱা পঞ্ঞাখগ্গং গহেত্ৱা খগ্গেন এসিকাথম্ভে ৱিয অৰহত্তমগ্গেন তণ্হেসিকং লুঞ্চিত্ৱা, সো যোধো সদ্ৱাৰবাহকং নগৰকৱাটং ৱিয পঞ্চোৰম্ভাগিযসংযোজনঅগ্গড়ং উগ্ঘাটেত্ৱা, সো যোধো পলিঘং ৱিয অৱিজ্জাপলিঘং উক্খিপিত্ৱা, সো যোধো পাকাৰং ভিন্দন্তো পৰিখং ৱিয কম্মাভিসঙ্খাৰং ভিন্দন্তো জাতিসংসাৰপৰিখং ৱিকিৰিত্ৱা, সো যোধো নগৰং সোভত্থায উস্সাপিতদ্ধজে ৱিয মানদ্ধজে পাতেত্ৱা সক্কাযনগৰং ঝাপেত্ৱা, সো যোধো খেমনগৰে উপৰিপাসাদে সুভোজনং ৱিয কিলেসপৰিনিব্বাননগৰং পৱিসিত্ৱা অমতং নিৰোধাৰম্মণং ফলসমাপত্তিসুখং অনুভৱমানো কালং ৱীতিনামেতি.