(৭) ২. সঞ্ঞাৱগ্গো

১-২. সঞ্ঞাসুত্তদ্ৱযৱণ্ণনা

৬১-৬২. দুতিযস্স পঠমে মহপ্ফলাতি ৱিপাকফলেন মহপ্ফলা. ৱিপাকানিসংসেনেৱ মহানিসংসা. অমতোগধাতি নিব্বানপতিট্ঠা. সব্বলোকে অনভিৰতিসঞ্ঞাতি সব্বস্মিং তেধাতুসন্নিৱেসে লোকে উক্কণ্ঠিতস্স উপ্পজ্জনকসঞ্ঞা. দুতিযং উত্তানত্থমেৱ.

৩-৪. ৱড্ঢসুত্তদ্ৱযৱণ্ণনা

৬৩-৬৪. ততিযে ৱৰাদাযীতি উত্তমস্স ৱৰস্স আদাযকো. সেসমেত্থ চতুত্থে চ উত্তানত্থমেৱাতি.

৫. সাকচ্ছসুত্তৱণ্ণনা

৬৫. পঞ্চমে অলংসাকচ্ছোতি সাকচ্ছায যুত্তো. আগতং পঞ্হন্তি পুচ্ছিতং পঞ্হং. ব্যাকত্তা হোতীতি ৱিস্সজ্জিতা হোতি.

৬. সাজীৱসুত্তৱণ্ণনা

৬৬. ছট্ঠে অলংসাজীৱোতি সাজীৱায যুত্তো. সাজীৱোতি পঞ্হপুচ্ছনঞ্চেৱ পঞ্হৱিস্সজ্জনঞ্চ. সব্বেপি হি সব্ৰহ্মচাৰিনো পঞ্হং উপজীৱন্তি, তেনেতং পঞ্হপুচ্ছনৱিস্সজ্জনং সমানাজীৱতায সাজীৱোতি ৱুত্তং. কতং পঞ্হন্তি অভিসঙ্খতং পঞ্হং.

৭-১০. পঠমইদ্ধিপাদসুত্তাদিৱণ্ণনা

৬৭-৭০. সত্তমে উস্সোড়্হীতি অধিমত্তৱীৰিযং. অট্ঠমে অত্তনো বোধিমণ্ডে পটিৱিদ্ধে আগমনইদ্ধিপাদে কথেত্ৱা উপৰি অত্তনোৱ ছ অভিঞ্ঞা কথেসীতি. নৱমদসমেসু ৱিপস্সনা কথিতা. সেসং সব্বত্থ উত্তানমেৱাতি.

সঞ্ঞাৱগ্গো দুতিযো.