৪. মালুক্যপুত্তসুত্তৱণ্ণনা

২৫৭. চতুত্থে মালুক্যপুত্তোতি মালুক্যব্ৰাহ্মণিযা পুত্তো. এত্থাতি এতস্মিং তৱ ওৱাদযাচনে. ইমিনা থেৰং অপসাদেতিপি উস্সাদেতিপি. কথং? অযং কিৰ দহৰকালে পচ্চযেসু লগ্গো হুত্ৱা পচ্ছা মহল্লককালে অৰঞ্ঞৱাসং পত্থেন্তো কম্মট্ঠানং যাচতি. অথ ভগৱা ‘‘এত্থ দহৰে কিং ৱক্খাম, মালুক্যপুত্তো ৱিয তুম্হেপি তৰুণকালে পচ্চযেসু লগ্গিত্ৱা মহল্লককালে অৰঞ্ঞং পৱিসিত্ৱা সমণধম্মং কৰেয্যাথা’’তি ইমিনা অধিপ্পাযেন ভণন্তো থেৰং অপসাদেতি নাম. যস্মা পন থেৰো মহল্লককালেৱ অৰঞ্ঞং পৱিসিত্ৱা সমণধম্মং কাতুকামো, তস্মা ভগৱা ‘‘এত্থ দহৰে কিং ৱক্খাম, অযং অম্হাকং মালুক্যপুত্তো মহল্লককালেপি অৰঞ্ঞং পৱিসিত্ৱা সমণধম্মং কাতুকামো কম্মট্ঠানং যাচতি. তুম্হে তাৱ তৰুণকালেপি ৱীৰিযং ন কৰোথা’’তি ইমিনা অধিপ্পাযেন ভণন্তো থেৰং উস্সাদেতি নামাতি যোজনা.