(২৬) ৬. অভিঞ্ঞাৱগ্গো

১-৩. অভিঞ্ঞাসুত্তাদিৱণ্ণনা

২৫৪-২৫৬. ছট্ঠস্স পঠমে অভিঞ্ঞাযাতি জানিত্ৱা. সমথো চ ৱিপস্সনা চাতি চিত্তেকগ্গতা চ সঙ্খাৰপৰিগ্গহৱিপস্সনাঞাণঞ্চ. ৱিজ্জা চ ৱিমুত্তি চাতি মগ্গঞাণৱিজ্জা চ সেসা সম্পযুত্তকধম্মা চ. দুতিযে অনৰিযপৰিযেসনাতি অনৰিযানং এসনা গৱেসনা. জৰাধম্মন্তি জৰাসভাৱং. সেসেসুপি এসেৱ নযো. ততিযং উত্তানমেৱ.

৪. মালুক্যপুত্তসুত্তৱণ্ণনা

২৫৭. চতুত্থে মালুক্যপুত্তোতি মালুক্যব্ৰাহ্মণিযা পুত্তো. এত্থাতি এতস্মিং তৱ ওৱাদযাচনে. ইমিনা থেৰং অপসাদেতিপি উস্সাদেতিপি. কথং? অযং কিৰ দহৰকালে পচ্চযেসু লগ্গো হুত্ৱা পচ্ছা মহল্লককালে অৰঞ্ঞৱাসং পত্থেন্তো কম্মট্ঠানং যাচতি. অথ ভগৱা ‘‘এত্থ দহৰে কিং ৱক্খাম, মালুক্যপুত্তো ৱিয তুম্হেপি তৰুণকালে পচ্চযেসু লগ্গিত্ৱা মহল্লককালে অৰঞ্ঞং পৱিসিত্ৱা সমণধম্মং কৰেয্যাথা’’তি ইমিনা অধিপ্পাযেন ভণন্তো থেৰং অপসাদেতি নাম. যস্মা পন থেৰো মহল্লককালেৱ অৰঞ্ঞং পৱিসিত্ৱা সমণধম্মং কাতুকামো, তস্মা ভগৱা ‘‘এত্থ দহৰে কিং ৱক্খাম, অযং অম্হাকং মালুক্যপুত্তো মহল্লককালেপি অৰঞ্ঞং পৱিসিত্ৱা সমণধম্মং কাতুকামো কম্মট্ঠানং যাচতি. তুম্হে তাৱ তৰুণকালেপি ৱীৰিযং ন কৰোথা’’তি ইমিনা অধিপ্পাযেন ভণন্তো থেৰং উস্সাদেতি নামাতি যোজনা.

৫-১০. কুলসুত্তাদিৱণ্ণনা

২৫৮-২৬৩. পঞ্চমে আধিপচ্চে ঠপেন্তীতি ভণ্ডাগাৰিকট্ঠানে ঠপেন্তি. ছট্ঠে ৱণ্ণসম্পন্নোতি সৰীৰৱণ্ণেন সমন্নাগতো. বলসম্পন্নোতি কাযবলেন সমন্নাগতো. ভিক্খুৱাৰে ৱণ্ণসম্পন্নোতি গুণৱণ্ণেন সমন্নাগতো. বলসম্পন্নোতি ৱীৰিযবলেন সমন্নাগতো. জৱসম্পন্নোতি ঞাণজৱেন সমন্নাগতো. সত্তমেপি এসেৱ নযো. সেসমেত্থ উত্তানমেৱাতি.

অভিঞ্ঞাৱগ্গো ছট্ঠো.