(২১) ১. সপ্পুৰিসৱগ্গো

১-৬. সিক্খাপদসুত্তৱণ্ণনা

২০১. পঞ্চমস্স পঠমে অসপ্পুৰিসন্তি লামকপুৰিসং তুচ্ছপুৰিসং মূড়্হপুৰিসং অৱিজ্জায অন্ধীকতং বালং. অসপ্পুৰিসতৰন্তি অতিৰেকেন অসপ্পুৰিসং. ইতৰে দ্ৱে ৱুত্তপটিপক্খৱসেন ৱেদিতব্বা. সেসমেত্থ উত্তানত্থমেৱ. যথা চেত্থ, এৱং ইতো পৰেসু পঞ্চসু. এতেসু হি পঠমং পঞ্চৱেৰৱসেন দেসিতং, দুতিযং অস্সদ্ধম্মৱসেন, ততিযং কাযৱচীদ্ৱাৰৱসেন, চতুত্থং মনোদ্ৱাৰৱসেন, পঞ্চমং অট্ঠমিচ্ছত্তৱসেন, ছট্ঠং দসমিচ্ছত্তৱসেন.

৭-১০. পাপধম্মসুত্তচতুক্কৱণ্ণনা

২০৭-২১০. সত্তমে পাপন্তি লামকং সংকিলিট্ঠপুগ্গলং. কল্যাণন্তি ভদ্দকং অনৱজ্জপুগ্গলং. সেসমেত্থ উত্তানত্থমেৱ. অট্ঠমেপি এসেৱ নযো. নৱমে পাপধম্মন্তি লামকধম্মং. কল্যাণধম্মন্তি অনৱজ্জধম্মং. সেসমেত্থ উত্তানত্থমেৱ. দসমেপি এসেৱ নযো. ইমস্মিং ৱগ্গে দসসুপি সুত্তেসু অগাৰিযপ্পটিপদা কথিতা. সচেপি সোতাপন্নসকদাগামিনো হোন্তি, ৱট্টতিযেৱাতি.

সপ্পুৰিসৱগ্গো পঠমো.