৩. ততিযপণ্ণাসকং

(১১) ১. ৱলাহকৱগ্গো

১-২. ৱলাহকসুত্তদ্ৱযৱণ্ণনা

১০১-২. ততিযপণ্ণাসকস্স পঠমে ৱলাহকাতি মেঘা. ভাসিতা হোতি নো কত্তাতি ‘‘ইদঞ্চিদঞ্চ কৰিস্সামী’’তি কেৱলং ভাসতিযেৱ, ন কৰোতি. কত্তা হোতি নো ভাসিতাতি অকথেত্ৱাৱ ‘‘ইদঞ্চিদঞ্চ মযা কাতুং ৱট্টতী’’তি কত্তা হোতি. এৱং সব্বত্থ অত্থো ৱেদিতব্বো. দুতিযং উত্তানত্থমেৱ.

৩. কুম্ভসুত্তৱণ্ণনা

১০৩. ততিযে কুম্ভাতি ঘটা. তুচ্ছো পিহিতোতি ৰিত্তকো পিহিতমুখো. পূৰো ৱিৱটোতি উদকপুণ্ণো অপাৰুতমুখো. সেসদ্ৱযেপি এসেৱ নযো.

৪. উদকৰহদসুত্তৱণ্ণনা

১০৪. চতুত্থে উত্তানো গম্ভীৰোভাসোতিআদীসু পুৰাণপণ্ণৰসসম্ভিন্নৱণ্ণো কাড়উদকো গম্ভীৰোভাসো নাম, অচ্ছৱিপ্পসন্নমণিৱণ্ণউদকো উত্তানোভাসো নাম.

৫-৬. অম্বসুত্তৱণ্ণনা

১০৫-৬. পঞ্চমে আমং পক্কৱণ্ণীতি আমকং হুত্ৱা ওলোকেন্তানং পক্কসদিসং খাযতি. এৱং সব্বপদানি দট্ঠব্বানি. ছট্ঠং উত্তানত্থমেৱ.

৭. মূসিকসুত্তৱণ্ণনা

১০৭. সত্তমে যো আৱাটং খণতি, ন চ তত্থ ৱসতি, সো গাধং কত্তা নো ৱসিতাতি ৱুচ্চতি. খন্তাতিপি পাঠো. ইমিনা নযেন সব্বপদানি ৱেদিতব্বানি.

৮. বলীবদ্দসুত্তৱণ্ণনা

১০৮. অট্ঠমে যো অত্তনো গোগণং মদ্দতি, ন পৰগোগণং, অযং সগৱচণ্ডো নো পৰগৱচণ্ডোতি এৱং সব্বপদানি ৱেদিতব্বানি. উব্বেজেতা হোতীতি ঘট্টেত্ৱা ৱিজ্ঝিত্ৱা উব্বেগপত্তং কৰোতি.

৯. ৰুক্খসুত্তৱণ্ণনা

১০৯. নৱমে ফেগ্গু ফেগ্গুপৰিৱাৰোতি নিস্সাৰো ফেগ্গুৰুক্খো ফেগ্গুৰুক্খেহেৱ পৰিৱুতো. সাৰপৰিৱাৰোতি খদিৰাদীহি সাৰৰুক্খেহেৱ পৰিৱুতো. এস নযো সব্বত্থ.

১০. আসীৱিসসুত্তৱণ্ণনা

১১০. দসমে আগতৱিসো ন ঘোৰৱিসোতি যস্স ৱিসং আগচ্ছতি, ঘোৰং পন ন হোতি, চিৰকালং ন পীড়েতি. সেসপদেসুপি এসেৱ নযোতি.

ৱলাহকৱগ্গো পঠমো.

(১২) ২. কেসিৱগ্গো

১. কেসিসুত্তৱণ্ণনা

১১১. দুতিযস্স পঠমে কেসীতি তস্স নামং. অস্সদম্মে সাৰেতীতি অস্সদম্মসাৰথি. সণ্হেনপি ৱিনেতীতিআদীসু তস্স অনুচ্ছৱিকং সক্কাৰং কত্ৱা সুভোজনং ভোজেত্ৱা মধুৰপানং পাযেত্ৱা মুদুৱচনেন সমুদাচৰিত্ৱা দমেন্তো সণ্হেন দমেতি নাম, জাণুবন্ধনমুখবন্ধনাদীহি চেৱ পতোদৱিজ্ঝনকসাভিঘাতফৰুসৱচনেহি চ দমেন্তো ফৰুসেন দমেতি নাম, কালেন কালং তদুভযং কৰোন্তো সণ্হফৰুসেন দমেতি নাম.

২. জৱসুত্তৱণ্ণনা

১১২. দুতিযে অজ্জৱেনাতি উজুকভাৱেন. জৱেনাতি পদৱেগেন. খন্তিযাতি অধিৱাসনক্খন্তিযা. সোৰচ্চেনাতি সুচিভাৱসীলেন. পুগ্গলগুণঙ্গেসু জৱেনাতি ঞাণজৱেন. সেসমেত্থ উত্তানত্থমেৱ.

৩. পতোদসুত্তৱণ্ণনা

১১৩. ততিযে পতোদচ্ছাযন্তি ৱিজ্ঝনত্থং উক্খিত্তস্স পতোদস্স ছাযং. সংৱিজ্জতীতি ‘‘জৱো মে গহেতব্বো’’তি সল্লক্খণৱসেন সংৱিজ্জতি. সংৱেগং আপজ্জতীতি সংৱেগং পটিপজ্জতি লোমৱেধৱিদ্ধোতি লোমকূপে পতোদৱেধেন ৱিদ্ধমত্তো. চম্মৱেধৱিদ্ধোতি ছৱিচম্মং ছিন্দন্তেন পতোদৱেধেন ৱিদ্ধো. অট্ঠিৱেধৱিদ্ধোতি অট্ঠিং ভিন্দন্তেন ৱেধেন ৱিদ্ধো. কাযেনাতি নামকাযেন. পৰমসচ্চন্তি নিব্বানং. সচ্ছিকৰোতীতি পস্সতি. পঞ্ঞাযাতি সহৱিপস্সনায মগ্গপঞ্ঞায.

৪. নাগসুত্তৱণ্ণনা

১১৪. চতুত্থে অট্ঠিং কত্ৱাতি অট্ঠিকো হুত্ৱা. তিণৱনিন্নাদসদ্দানন্তি এত্থ তিণৱোতি ডিণ্ডিমো, নিন্নাদসদ্দোতি সব্বেসম্পি একতোমিস্সিতো মহাসদ্দো. ডংসাদীসু ডংসাতি পিঙ্গলমক্খিকা, মকসা মকসাৱ. খিপ্পঞ্ঞেৱ গন্তা হোতীতি সীলসমাধিপঞ্ঞাৱিমুত্তিৱিমুত্তিঞাণদস্সনানি পূৰেত্ৱা সীঘমেৱ গন্তা হোতি.

৫. ঠানসুত্তৱণ্ণনা

১১৫. পঞ্চমে ঠানানীতি কাৰণানি. অনত্থায সংৱত্ততীতি অহিতায অৱড্ঢিযা সংৱত্ততি. এত্থ চ পঠমং ওপাতক্খণনমচ্ছবন্ধনসন্ধিচ্ছেদনাদিভেদং সদুক্খং সৱিঘাতং পাপকম্মং ৱেদিতব্বং, দুতিযং সমজীৱিকানং গিহীনং পুপ্ফচ্ছড্ডকাদিকম্মং সুধাকোট্টন-গেহচ্ছাদনঅসুচিট্ঠানসম্মজ্জনাদিকম্মঞ্চ ৱেদিতব্বং, ততিযং সুৰাপানগন্ধৱিলেপনমালাপিড়ন্ধনাদিকম্মঞ্চেৱ অস্সাদৱসেন পৱত্তং পাণাতিপাতাদিকম্মঞ্চ ৱেদিতব্বং, চতুত্থং ধম্মস্সৱনত্থায গমনকালে সুদ্ধৱত্থচ্ছাদন-মালাগন্ধাদীনং আদায গমনং চেতিযৱন্দনং বোধিৱন্দনং মধুৰধম্মকথাসৱনং পঞ্চসীলসমাদানন্তি এৱমাদীসু সোমনস্সসম্পযুত্তং কুসলকম্মং ৱেদিতব্বং. পুৰিসথামেতি পুৰিসস্স ঞাণথামস্মিং. সেসদ্ৱযেপি এসেৱ নযো.

৬. অপ্পমাদসুত্তৱণ্ণনা

১১৬. ছট্ঠে যতো খোতি যদা খো. সম্পৰাযিকস্সাতি দেসনামত্তমেতং, খীণাসৱো পন নেৱ সম্পৰাযিকস্স, ন দিট্ঠধম্মিকস্স মৰণস্স ভাযতি. সোৱ ইধ অধিপ্পেতো. কেচি পন ‘‘সম্মাদিট্ঠি ভাৱিতাতি ৱচনতো সোতাপন্নং আদিং কত্ৱা সব্বেপি অৰিযা অধিপ্পেতা’’তি ৱদন্তি.

৭. আৰক্খসুত্তৱণ্ণনা

১১৭. সত্তমে অত্তৰূপেনাতি অত্তনো অনুৰূপেন অনুচ্ছৱিকেন, হিতকামেনাতি অত্থো. ৰজনীযেসূতি ৰাগস্স পচ্চযভূতেসু. ধম্মেসূতি সভাৱেসু, ইট্ঠাৰম্মণেসূতি অত্থো. এৱং সব্বত্থ নযো ৱেদিতব্বো. ন ৰজ্জতীতি দিট্ঠিৱসেন ন ৰজ্জতি. সেসপদেসুপি এসেৱ নযো. ন চ পন সমণৱচনহেতুপি গচ্ছতীতি সমণানং পৰৱাদীনং ৱচনহেতুপি অত্তনো দিট্ঠিং পহায তেসং দিট্ঠিৱসেন ন গচ্ছতীতি অত্থো. ইধাপি খীণাসৱোৱ অধিপ্পেতো.

৮-১০. সংৱেজনীযাদিসুত্তত্তযৱণ্ণনা

১১৮-১২০. অট্ঠমে দস্সনীযানীতি পস্সিতব্বযুত্তকানি. সংৱেজনীযানীতি সংৱেগজনকানি. নৱমে জাতিভযন্তি জাতিং আৰব্ভ উপ্পজ্জনকভযং. সেসপদেসুপি এসেৱ নযো. দসমে অগ্গিভযন্তি অগ্গিং পটিচ্চ উপ্পজ্জনকভযং. সেসপদেসুপি এসেৱ নযো.

কেসিৱগ্গো দুতিযো.

(১৩) ৩. ভযৱগ্গো

১. অত্তানুৱাদসুত্তৱণ্ণনা

১২১. ততিযস্স পঠমে অত্তানুৱাদভযন্তি অত্তানং অনুৱদন্তস্স উপ্পজ্জনকভযং. পৰানুৱাদভযন্তি পৰস্স অনুৱাদতো উপ্পজ্জনকভযং. দণ্ডভযন্তি দ্ৱত্তিংস কম্মকাৰণা পটিচ্চ উপ্পজ্জনকভযং. দুগ্গতিভযন্তি চত্তাৰো অপাযে পটিচ্চ উপ্পজ্জনকভযং. ইদং ৱুচ্চতি, ভিক্খৱে, অত্তানুৱাদভযন্তিআদীসু অত্তানুৱাদভযং তাৱ পচ্চৱেক্খন্তস্স অজ্ঝত্তং হিৰী সমুট্ঠাতি, সাস্স তীসু দ্ৱাৰেসু সংৱৰং জনেতি, তীসু দ্ৱাৰেসু সংৱৰো চতুপাৰিসুদ্ধিসীলং হোতি. সো তস্মিং সীলে পতিট্ঠায ৱিপস্সনং ৱড্ঢেত্ৱা অগ্গফলে পতিট্ঠাতি. পৰানুৱাদভযং পন পচ্চৱেক্খন্তস্স বহিদ্ধা ওত্তপ্পং সমুট্ঠাতি, তদস্স তীসু দ্ৱাৰেসু সংৱৰং জনেতি, তীসু দ্ৱাৰেসু সংৱৰো চতুপাৰিসুদ্ধিসীলং হোতি. সো তস্মিং সীলে পতিট্ঠায ৱিপস্সনং ৱড্ঢেত্ৱা অগ্গফলে পতিট্ঠাতি. দুগ্গতিভযং পচ্চৱেক্খন্তস্স অজ্ঝত্তং হিৰী সমুট্ঠাতি, সাস্স তীসু দ্ৱাৰেসু সংৱৰং জনেতি, তীসু দ্ৱাৰেসু সংৱৰো চতুপাৰিসুদ্ধিসীলং হোতি. সো তস্মিং সীলে পতিট্ঠায ৱিপস্সনং ৱড্ঢেত্ৱা অগ্গফলে পতিট্ঠাতি.

২. ঊমিভযসুত্তৱণ্ণনা

১২২. দুতিযে উদকোৰোহন্তস্সাতি উদকং ওতৰন্তস্স. পাটিকঙ্খিতব্বানীতি ইচ্ছিতব্বানি. সুসুকাভযন্তি চণ্ডমচ্ছভযং. মুখাৱৰণং মঞ্ঞে কৰোন্তীতি মুখপিদহনং ৱিয কৰোন্তি. ওদৰিকত্তস্সাতি মহোদৰতায মহগ্ঘসভাৱস্স. অৰক্খিতেনেৱ কাযেনাতিআদীসু কাযদ্ৱাৰে তিৱিধস্স সংৱৰস্স অভাৱতো অৰক্খিতেন কাযেন. ৱচীদ্ৱাৰে চতুব্বিধস্স সংৱৰস্স অভাৱতো অৰক্খিতায ৱাচায.

৩. পঠমনানাকৰণসুত্তৱণ্ণনা

১২৩. ততিযে তদস্সাদেতীতি তং ঝানং সুখস্সাদেন অস্সাদেতি. নিকামেতীতি পত্থেতি. ৱিত্তিং আপজ্জতীতি তুট্ঠিং আপজ্জতি. তদধিমুত্তোতি তস্মিং অধিমুত্তো, তং ৱা অধিমুত্তো. তব্বহুলৱিহাৰীতি তেন ঝানেন বহুলং ৱিহৰন্তো. সহব্যতং উপপজ্জতীতি সহভাৱং গচ্ছতি, তত্থ নিব্বত্ততীতি অত্থো. কপ্পো আযুপ্পমাণন্তি এত্থ পঠমজ্ঝানং অত্থি হীনং, অত্থি মজ্ঝিমং, অত্থি পণীতং. তত্থ হীনেন উপ্পন্নানং কপ্পস্স ততিযো কোট্ঠাসো আযুপ্পমাণং, মজ্ঝিমেন উপড্ঢকপ্পো, পণীতেন কপ্পো. তং সন্ধাযেতং ৱুত্তং. নিৰযম্পি গচ্ছতীতি নিৰযগমনীযস্স কম্মস্স অপ্পহীনত্তা অপৰাপৰং গচ্ছতি, ন অনন্তৰমেৱ. তস্মিংযেৱ ভৱে পৰিনিব্বাযতীতি তস্মিংযেৱ ৰূপভৱে ঠত্ৱা পৰিনিব্বাযতি, ন হেট্ঠা ওতৰতি. যদিদং গতিযা উপপত্তিযা সতীতি যং ইদং গতিযা চ উপপত্তিযা চ সতি সেখস্স অৰিযসাৱকস্স পটিসন্ধিৱসেন হেট্ঠা অনোতৰিত্ৱা তস্মিংযেৱ ৰূপভৱে উপৰি দুতিযততিযাদীসু অঞ্ঞতৰস্মিং ব্ৰহ্মলোকে পৰিনিব্বানং, পুথুজ্জনস্স পন নিৰযাদিগমনং, ইদং নানাকৰণন্তি অত্থো.

দ্ৱে কপ্পাতি এত্থাপি দুতিযজ্ঝানং ৱুত্তনযেনেৱ তিৱিধং হোতি. তত্থ পণীতভাৱনেন নিব্বত্তানং অট্ঠকপ্পা আযুপ্পমাণং, মজ্ঝিমেন চত্তাৰো, হীনেন দ্ৱে. তং সন্ধাযেতং ৱুত্তং. চত্তাৰো কপ্পাতি এত্থ যং হেট্ঠা ৱুত্তং ‘‘কপ্পো, দ্ৱে কপ্পা’’তি, তম্পি আহৰিত্ৱা অত্থো ৱেদিতব্বো. কপ্পোতি চ গুণস্সপি নামং, তস্মা কপ্পো দ্ৱে কপ্পা চত্তাৰো কপ্পাতি অযমেত্থ অত্থো দট্ঠব্বো. ইদং ৱুত্তং হোতি – যো পঠমং ৱুত্তো কপ্পো, সো দ্ৱে ৱাৰে গণেত্ৱা একেন গুণেন দ্ৱে কপ্পা হোন্তি, দুতিযেন চত্তাৰো, পুন তে চত্তাৰো কপ্পাতি ইমেহি চতূহি গুণেহি গুণিতা একেন গুণেন অট্ঠ হোন্তি, দুতিযেন সোড়স, ততিযেন দ্ৱত্তিংস, চতুত্থেন চতুসট্ঠীতি. এৱমিধ পণীতজ্ঝানৱসেন চতুসট্ঠি কপ্পা গহিতাতি ৱেদিতব্বা. পঞ্চ কপ্পসতানীতি ইদং পণীতস্সেৱ উপপত্তিজ্ঝানস্স ৱসেন ৱুত্তং. ৱেহপ্ফলেসু ৱা পঠমজ্ঝানভূমিআদীসু ৱিয তিণ্ণং ব্ৰহ্মলোকানং অভাৱতো এত্তকমেৱ আযুপ্পমাণং. তস্মা এৱং ৱুত্তং.

৪. দুতিযনানাকৰণসুত্তৱণ্ণনা

১২৪. চতুত্থে ৰূপমেৱ ৰূপগতং. সেসপদেসুপি এসেৱ নযো. অনিচ্চতোতিআদীসু হুত্ৱা অভাৱট্ঠেন অনিচ্চতো, আবাধট্ঠেন ৰোগতো, অন্তো পদুস্সনট্ঠেন গণ্ডতো, অনুপৱিট্ঠট্ঠেন সল্লতো, সদুক্খট্ঠেন অঘতো, সম্পীড়নট্ঠেন আবাধতো, অৱিধেয্যট্ঠেন পৰতো, পলুজ্জনট্ঠেন পলোকতো, নিস্সত্তট্ঠেন সুঞ্ঞতো, অৱসৱত্তনট্ঠেন অনত্ততো. এত্থ চ ‘‘অনিচ্চতো পলোকতো’’তি দ্ৱীহি পদেহি অনিচ্চলক্খণং কথিতং, ‘‘সুঞ্ঞতো অনত্ততো’’তি দ্ৱীহি অনত্তলক্খণং, সেসেহি দুক্খলক্খণং কথিতন্তি ৱেদিতব্বং. সমনুপস্সতীতি ঞাণেন পস্সতি. এৱং পঞ্চক্খন্ধে তিলক্খণং আৰোপেত্ৱা পস্সন্তো তযো মগ্গে তীণি ফলানি সচ্ছিকৰোতি. সুদ্ধাৱাসানং দেৱানং সহব্যতং উপপজ্জতীতি তত্থ ঠিতো চতুত্থজ্ঝানং ভাৱেত্ৱা উপপজ্জতি.

৫-৬. মেত্তাসুত্তদ্ৱযৱণ্ণনা

১২৫-১২৬. পঞ্চমে পঠমজ্ঝানৱসেন মেত্তা, দুতিযাদিৱসেন কৰুণাদযো দস্সিতা. ছট্ঠং চতুত্থে ৱুত্তনযেনেৱ ৱেদিতব্বং.

৭. পঠমতথাগতঅচ্ছৰিযসুত্তৱণ্ণনা

১২৭. সত্তমে পাতুভাৱাতি পাতুভাৱেন. কুচ্ছিং ওক্কমতীতি এত্থ কুচ্ছিং ওক্কন্তো হোতীতি অত্থো. ওক্কন্তে হি তস্মিং এৱং হোতি, ন ওক্কমমানে. অপ্পমাণোতি ৱুড্ঢিপ্পমাণো, ৱিপুলোতি অত্থো. উড়াৰোতি তস্সেৱ ৱেৱচনং. দেৱানং দেৱানুভাৱন্তি এত্থ দেৱানং অযমানুভাৱো – নিৱত্থৱত্থস্স পভা দ্ৱাদস যোজনানি ফৰতি, তথা সৰীৰস্স, তথা ৱিমানস্স, তং অতিক্কমিত্ৱাতি অত্থো. লোকন্তৰিকাতি তিণ্ণং তিণ্ণং চক্কৱাড়ানং অন্তৰা একেকো লোকন্তৰিকো হোতি, তিণ্ণং সকটচক্কানং পত্তানং ৱা অঞ্ঞমঞ্ঞং আহচ্চ ঠপিতানং মজ্ঝে ওকাসো ৱিয. সো পন লোকন্তৰিকনিৰযো পৰিমাণতো অট্ঠযোজনসহস্সপ্পমাণো হোতি. অঘাতি নিচ্চৱিৱটা. অসংৱুতাতি হেট্ঠাপি অপ্পতিট্ঠা. অন্ধকাৰাতি তমভূতা. অন্ধকাৰতিমিসাতি চক্খুৱিঞ্ঞাণুপ্পত্তিনিৱাৰণতো অন্ধভাৱকৰণতিমিসায সমন্নাগতা. তত্থ কিৰ চক্খুৱিঞ্ঞাণং ন জাযতি. এৱংমহিদ্ধিকানন্তি চন্দিমসূৰিযা কিৰ একপ্পহাৰেনেৱ তীসু দীপেসু পঞ্ঞাযন্তি, এৱংমহিদ্ধিকা. একেকায দিসায নৱ নৱ যোজনসতসহস্সানি অন্ধকাৰং ৱিধমিত্ৱা আলোকং দস্সেন্তি, এৱংমহানুভাৱা. আভা নানুভোন্তীতি পভা নপ্পহোন্তি. তে কিৰ চক্কৱাড়পব্বতস্স ৱেমজ্ঝেন চৰন্তি চক্কৱাড়পব্বতঞ্চ অতিক্কমিত্ৱা লোকন্তৰনিৰযা. তস্মা তেসং তত্থ আভা নপ্পহোন্তি.

যেপি তত্থ সত্তাতি যেপি তস্মিং লোকন্তৰমহানিৰযে সত্তা উপপন্না. কিং পন কম্মং কত্ৱা তত্থ উপ্পজ্জন্তীতি? ভাৰিযং দাৰুণং মাতাপিতূনং ধম্মিকসমণব্ৰাহ্মণানঞ্চ উপৰি অপৰাধং, অঞ্ঞঞ্চ দিৱসে দিৱসে পাণৱধাদিসাহসিককম্মং কত্ৱা উপ্পজ্জন্তি তম্বপণ্ণিদীপে অভযচোৰনাগচোৰাদযো ৱিয. তেসং অত্তভাৱো তিগাৱুতিকো হোতি, ৱগ্গুলীনং ৱিয দীঘনখা হোন্তি. তে ৰুক্খে ৱগ্গুলিযো ৱিয নখেহি চক্কৱাড়পব্বতপাদে লগ্গন্তি. যদা সংসপ্পন্তা অঞ্ঞমঞ্ঞস্স হত্থপাসগতা হোন্তি, অথ ‘‘ভক্খো নো লদ্ধো’’তি মঞ্ঞমানা তত্থ ব্যাৱটা ৱিপৰিৱত্তিত্ৱা লোকসন্ধাৰকউদকে পতন্তি, ৱাতে পহৰন্তেপি মধুকফলানি ৱিয ছিজ্জিত্ৱা উদকে পতন্তি, পতিতমত্তাৱ অচ্চন্তখাৰে উদকে পিট্ঠপিণ্ডি ৱিয ৱিলীযন্তি. অঞ্ঞেপি কিৰ ভো সন্তি সত্তাতি ভো যথা মযং মহাদুক্খং অনুভৱাম, এৱং অঞ্ঞেপি কিৰ সত্তা ইদং দুক্খং অনুভৱনত্থায ইধূপপন্নাতি তংদিৱসং পস্সন্তি. অযং পন ওভাসো একযাগুপানমত্তম্পি ন তিট্ঠতি. যাৱতা নিদ্দাযিত্ৱা পবুদ্ধো আৰম্মণং ৱিভাৱেতি, তত্তকং কালং হোতি. দীঘভাণকা পন ‘‘অচ্ছৰাসঙ্ঘাতমত্তমেৱ ৱিজ্জুওভাসো ৱিয নিচ্ছৰিত্ৱা কিং ইদন্তি ভণন্তানংযেৱ অন্তৰধাযতী’’তি ৱদন্তি.

৮. দুতিযতথাগতঅচ্ছৰিযসুত্তৱণ্ণনা

১২৮. অট্ঠমে তণ্হাদিট্ঠীহি অল্লীযিতব্বট্ঠেন আলযোতি পঞ্চ কামগুণা, সকলমেৱ ৱা ৱট্টং. আৰমন্তি এত্থাতি আৰামো, আলযো আৰামো এতিস্সাতি আলযাৰামা. আলযে ৰতাতি আলযৰতা. আলযে সম্মুদিতাতি আলযসম্মুদিতা. অনালযে ধম্মেতি আলযপটিপক্খে ৱিৱট্টূপনিস্সিতে অৰিযধম্মে. সুস্সূসতীতি সোতুকামো হোতি. সোতং ওদহতীতি সোতং ঠপেতি. অঞ্ঞা চিত্তং উপট্ঠপেতীতি আজাননত্থায চিত্তং পচ্চুপট্ঠপেতি. মানোতি মঞ্ঞনা, মঞ্ঞিতব্বট্ঠেন ৱা সকলং ৱট্টমেৱ. মানৱিনযে ধম্মেতি মানৱিনযধম্মে. উপসমপটিপক্খো অনুপসমো, অনুপসন্তট্ঠেন ৱা ৱট্টমেৱ অনুপসমো নাম. ওপসমিকেতি উপসমকৰে ৱিৱট্টূপনিস্সিতে. অৱিজ্জায গতা সমন্নাগতাতি অৱিজ্জাগতা. অৱিজ্জণ্ডকোসেন পৰিযোনদ্ধত্তা অণ্ডং ৱিয ভূতাতি অণ্ডভূতা. সমন্ততো ওনদ্ধাতি পৰিযোনদ্ধা. অৱিজ্জাৱিনযেতি অৱিজ্জাৱিনযো ৱুচ্চতি অৰহত্তং, তংনিস্সিতে ধম্মে দেসিযমানেতি অত্থো. ইতি ইমস্মিং সুত্তে চতূসু ঠানেসু ৱট্টং, চতূসু ৱিৱট্টং কথিতং.

৯. আনন্দঅচ্ছৰিযসুত্তৱণ্ণনা

১২৯. নৱমে ভিক্খুপৰিসা আনন্দং দস্সনাযাতি যে ভগৱন্তং পস্সিতুকামা থেৰং উপসঙ্কমন্তি, যে ৱা ‘‘আযস্মা কিৰানন্দো সমন্তপাসাদিকো অভিৰূপো দস্সনীযো বহুস্সুতো সঙ্ঘসোভনো’’তি থেৰস্স গুণে সুত্ৱা আগচ্ছন্তি, তে সন্ধায ‘‘ভিক্খুপৰিসা আনন্দং দস্সনায উপসঙ্কমতী’’তি ৱুত্তং. এস নযো সব্বত্থ. অত্তমনাতি ‘‘সৱনেন নো দস্সনং সমেতী’’তি সকমনা তুট্ঠচিত্তা. ধম্মন্তি ‘‘কচ্চি, আৱুসো, খমনীযং, কচ্চি যাপনীযং, কচ্চি যোনিসোমনসিকাৰকম্মং কৰোথ, আচৰিযুপজ্ঝাযৱত্তং পূৰেথা’’তি এৱৰূপং পটিসন্থাৰধম্মং. তত্থ ভিক্খুনীসু ‘‘কচ্চি, ভগিনিযো, অট্ঠ গৰুধম্মে সমাদায ৱত্তথা’’তি ইদম্পি নানাকৰণং হোতি. উপাসকেসু ‘‘স্ৱাগতং, উপাসক, ন তে কিঞ্চি সীসং ৱা অঙ্গং ৱা ৰুজ্জতি, অৰোগা তে পুত্তভাতৰো’’তি ন এৱং পটিসন্থাৰং কৰোতি, এৱং পন কৰোতি – ‘‘কথং, উপাসকা, তীণি সৰণানি পঞ্চ সীলানি ৰক্খথ, মাসস্স অট্ঠ উপোসথে কৰোথ, মাতাপিতূনং উপট্ঠানৱত্তং পূৰেথ, ধম্মিকসমণব্ৰাহ্মণে পটিজগ্গথা’’তি. উপাসিকাসুপি এসেৱ নযো.

১০. চক্কৱত্তিঅচ্ছৰিযসুত্তৱণ্ণনা

১৩০. দসমে খত্তিযপৰিসাতি অভিসিত্তা অনভিসিত্তা চ খত্তিযা. তে হি কিৰ ‘‘ৰাজা চক্কৱত্তী নাম অভিৰূপো পাসাদিকো হোতি, আকাসেন ৱিচৰন্তো ৰজ্জং অনুসাসতি, ধম্মিকো ধম্মৰাজা’’তি তস্স গুণকথং সুত্ৱা সৱনেন দস্সনম্হি সমেন্তে অত্তমনা হোন্তি. ভাসতীতি ‘‘কথং, তাতা, ৰাজধম্মং পূৰেথ, পৱেণিং ৰক্খথা’’তি পটিসন্থাৰং কৰোতি. ব্ৰাহ্মণেসু পন ‘‘কথঞ্চ, আচৰিযা, মন্তে ৱাচেথ, অন্তেৱাসিকা মন্তে গণ্হন্তি, দক্খিণং ৱা ৱত্থানি ৱা সীলং ৱা লভথা’’তি এৱং পটিসন্থাৰং কৰোতি. গহপতীসু ‘‘কথং, তাতা, ন ৱো ৰাজকুলতো দণ্ডেন ৱা বন্ধনেন ৱা পীড়া অত্থি, সম্মা দেৱো ধাৰং অনুপ্পৱেচ্ছতি, সস্সানি সম্পজ্জন্তী’’তি এৱং পটিসন্থাৰং কৰোতি. সমণেসু ‘‘কথং, ভন্তে, কচ্চি পব্বজিতপৰিক্খাৰা সুলভা, সমণধম্মে নপ্পমজ্জথা’’তি এৱং পটিসন্থাৰং কৰোতীতি.

ভযৱগ্গো ততিযো.

(১৪) ৪. পুগ্গলৱগ্গো

১. সংযোজনসুত্তৱণ্ণনা

১৩১. চতুত্থস্স পঠমে উপপত্তিপটিলাভিযানীতি যেহি অনন্তৰা উপপত্তিং পটিলভতি. ভৱপটিলাভিযানীতি উপপত্তিভৱস্স পটিলাভায পচ্চযানি. সকদাগামিস্সাতি ইদং অপ্পহীনসংযোজনেসু অৰিযেসু উত্তমকোটিযা গহিতং. যস্মা পন অন্তৰাপৰিনিব্বাযিস্স অন্তৰা উপপত্তি নত্থি, যং পন সো তত্থ ঝানং সমাপজ্জতি, তং কুসলত্তা ‘‘উপপত্তিভৱস্স পচ্চযো’’ তেৱ সঙ্খ্যং গচ্ছতি. তস্মাস্স ‘‘উপপত্তিপটিলাভিযানি সংযোজনানি পহীনানি, ভৱপটিলাভিযানি সংযোজনানি অপ্পহীনানী’’তি ৱুত্তং. ওৰম্ভাগিযেসু চ অপ্পহীনং উপাদায সকদাগামিস্স অৱিসেসেন ‘‘ওৰম্ভাগিযানি সংযোজনানি অপ্পহীনানী’’তি ৱুত্তং. সেসমেত্থ উত্তানমেৱ.

২. পটিভানসুত্তৱণ্ণনা

১৩২. দুতিযে যুত্তপ্পটিভানো নো মুত্তপ্পটিভানোতি পঞ্হং কথেন্তো যুত্তমেৱ কথেতি, সীঘং পন ন কথেতি, সণিকমেৱ কথেতীতি অত্থো. ইমিনা নযেন সব্বপদানি ৱেদিতব্বানি.

৩. উগ্ঘটিতঞ্ঞূসুত্তৱণ্ণনা

১৩৩. ততিযে চতুন্নম্পি পুগ্গলানং ইমিনা সুত্তেন ৱিসেসো ৱেদিতব্বো –

‘‘কতমো চ পুগ্গলো উগ্ঘটিতঞ্ঞূ, যস্স পুগ্গলস্স সহ উদাহটৱেলায ধম্মাভিসমযো হোতি, অযং ৱুচ্চতি পুগ্গলো উগ্ঘটিতঞ্ঞূ. কতমো চ পুগ্গলো ৱিপঞ্চিতঞ্ঞূ, যস্স পুগ্গলস্স ৱিত্থাৰেন অত্থে ৱিভজিযমানে ধম্মাভিসমযো হোতি, অযং ৱুচ্চতি পুগ্গলো ৱিপঞ্চিতঞ্ঞূ. কতমো চ পুগ্গলো নেয্যো, যস্স পুগ্গলস্স উদ্দেসতো পৰিপুচ্ছতো যোনিসোমনসিকৰোতো কল্যাণমিত্তে সেৱতো ভজতো পযিৰুপাসতো অনুপুব্বেন ধম্মাভিসমযো হোতি, অযং ৱুচ্চতি পুগ্গলো নেয্যো. কতমো চ পুগ্গলো পদপৰমো, যস্স পুগ্গলস্স বহুম্পি সুণতো বহুম্পি ভণতো বহুম্পি ধাৰযতো বহুম্পি ৱাচযতো ন তায জাতিযা ধম্মাভিসমযো হোতি, অযং ৱুচ্চতি পুগ্গলো পদপৰমো’’তি (পু. প. ১৪৮-১৫১).

৪. উট্ঠানফলসুত্তৱণ্ণনা

১৩৪. চতুত্থে উট্ঠানৱীৰিযেনেৱ দিৱসং ৱীতিনামেত্ৱা তস্স নিস্সন্দফলমত্তং কিঞ্চিদেৱ লভিত্ৱা জীৱিকং কপ্পেতি, তং পন উট্ঠানং আগম্ম কিঞ্চি পুঞ্ঞফলং নপ্পটিলভতি, অযং উট্ঠানফলূপজীৱী ন কম্মফলূপজীৱী নাম. চাতুমহাৰাজিকে পন দেৱে আদিং কত্ৱা সব্বেপি দেৱা উট্ঠানৱীৰিযেন ৱিনা পুঞ্ঞফলস্সেৱ উপজীৱনতো কম্মফলূপজীৱিনো ন উট্ঠানফলূপজীৱিনো নাম. ৰাজৰাজমহামত্তাদযো উট্ঠানফলূপজীৱিনো চ কম্মফলূপজীৱিনো চ. নেৰযিকসত্তা নেৱ উট্ঠানফলূপজীৱিনো ন কম্মফলূপজীৱিনো. ইমস্মিং সুত্তে পুঞ্ঞফলমেৱ কম্মফলন্তি অধিপ্পেতং, তঞ্চ তেসং নত্থি.

৫. সাৱজ্জসুত্তৱণ্ণনা

১৩৫. পঞ্চমে পঠমো অন্ধবালপুথুজ্জনো, দুতিযো অন্তৰন্তৰা কুসলকাৰকো লোকিযপুথুজ্জনো, ততিযো সোতাপন্নো, সকদাগামিঅনাগামিনোপি এতেনেৱ সঙ্গহিতা. চতুত্থো খীণাসৱো. সো হি একন্তেনেৱ অনৱজ্জো.

৬-৭. সীলসুত্তাদিৱণ্ণনা

১৩৬-১৩৭. ছট্ঠে পঠমো লোকিযমহাজনো, দুতিযো সুক্খৱিপস্সকো সোতাপন্নো চ সকদাগামী চ, ততিযো অনাগামী. সো হি যস্মা তঙ্খণিকম্পি উপপত্তিনিমিত্তকং ঝানং পটিলভতিযেৱ, তস্মা সুক্খৱিপস্সকোপি সমাধিস্মিং পৰিপূৰকাৰীযেৱ. চতুত্থো খীণাসৱোযেৱ. সো হি সব্বেসং সীলাদিপচ্চনীকানং পহীনত্তা সব্বত্থ পৰিপূৰকাৰী নাম. সত্তমেপি ছট্ঠে ৱুত্তনযেনেৱ পুগ্গলপৰিচ্ছেদো ৱেদিতব্বো.

৮. নিকট্ঠসুত্তৱণ্ণনা

১৩৮. অট্ঠমে নিকট্ঠকাযোতি নিগ্গতকাযো. অনিকট্ঠচিত্তোতি অনুপৱিট্ঠচিত্তো. কাযেনেৱ গামতো নিক্খন্তো, চিত্তেন অৰঞ্ঞে ৱসন্তোপি গামমেৱ পৱিট্ঠোতি ৱুত্তং হোতি. ইমিনা নযেন সব্বত্থ অত্থো ৱেদিতব্বো.

৯. ধম্মকথিকসুত্তৱণ্ণনা

১৩৯. নৱমে অসহিতন্তি অত্থেন অসংযুত্তং. ন কুসলা হোতীতি ন ছেকা হোতি. সহিতাসহিতস্সাতি অত্থনিস্সিতস্স ৱা অনিস্সিতস্স ৱা. এৱং সব্বত্থ অত্থো ৱেদিতব্বো.

১০. ৱাদীসুত্তৱণ্ণনা

১৪০. দসমে অত্থতো পৰিযাদানং গচ্ছতীতি অট্ঠকথং পুচ্ছিতো পৰিযাদানং পৰিক্খযং গচ্ছতি, কথেতুং ন সক্কোতি. নো ব্যঞ্জনতোতি ব্যঞ্জনং পনস্স পৱত্ততি ন পৰিযাদিযতি. এসেৱ নযো সব্বত্থাতি.

পুগ্গলৱগ্গো চতুত্থো.

(১৫) ৫. আভাৱগ্গো

১. আভাসুত্তৱণ্ণনা

১৪১. পঞ্চমস্স পঠমে আভাসনৱসেন চন্দোৱ চন্দাভা. সেসপদেসুপি এসেৱ নযো.

২-৫. পভাসুত্তাদিৱণ্ণনা

১৪২-১৪৫. দুতিযাদীসুপি পভাসনৱসেন চন্দোৱ চন্দপ্পভা. আলোকনৱসেন চন্দোৱ চন্দালোকো. ওভাসনৱসেন চন্দোৱ চন্দোভাসো. পজ্জোতনৱসেন চন্দোৱ চন্দপজ্জোতোতি. এৱং সব্বপদেসুপি অত্থো ৱেদিতব্বো.

৬. পঠমকালসুত্তৱণ্ণনা

১৪৬. ছট্ঠে কালাতি যুত্তপ্পযুত্তকালা. কালেন ধম্মস্সৱনন্তি যুত্তপ্পযুত্তকালে ধম্মস্সৱনং. ধম্মসাকচ্ছাতি পঞ্হপুচ্ছনৱিস্সজ্জনৱসেন পৱত্তা সংসন্দনকথা.

৭. দুতিযকালসুত্তৱণ্ণনা

১৪৭. সত্তমে কালাতি তস্মিং তস্মিং কালে ধম্মস্সৱনাদিৱসেন পৱত্তানং কুসলধম্মানং এতং অধিৱচনং. তে ভাৱিযন্তি চেৱ অনুপৰিৱত্তিযন্তি চ. আসৱানং খযন্তি অৰহত্তং. অট্ঠমং উত্তানত্থমেৱ.

৯-১০. সুচৰিতসুত্তাদিৱণ্ণনা

১৪৯-১৫০. নৱমে সণ্হা ৱাচাতি মুদুকৱাচা. মন্তভাসাতি মন্তসঙ্খাতায পঞ্ঞায পৰিচ্ছিন্দিত্ৱা কথিতকথা. দসমে সীলসাৰোতি সাৰসম্পাপকং সীলং. সেসেসুপি এসেৱ নযো.

আভাৱগ্গো পঞ্চমো.

ততিযপণ্ণাসকং নিট্ঠিতং.