৫. চূড়ৱগ্গো

১. সম্মুখীভাৱসুত্তৱণ্ণনা

৪১. পঞ্চমস্স পঠমে সম্মুখীভাৱাতি সম্মুখীভাৱেন, ৱিজ্জমানতাযাতি অত্থো. পসৱতীতি পটিলভতি. সদ্ধায সম্মুখীভাৱাতি যদি হি সদ্ধা ন ভৱেয্য, দেয্যধম্মো ন ভৱেয্য, দক্খিণেয্যসঙ্খাতা পটিগ্গাহকপুগ্গলা ন ভৱেয্যুং, কথং পুঞ্ঞকম্মং কৰেয্য. তেসং পন সম্মুখীভাৱেন সক্কা কাতুন্তি তস্মা ‘‘সদ্ধায সম্মুখীভাৱা’’তিআদিমাহ. এত্থ চ দ্ৱে ধম্মা সুলভা দেয্যধম্মা চেৱ দক্খিণেয্যা চ, সদ্ধা পন দুল্লভা. পুথুজ্জনস্স হি সদ্ধা অথাৱৰা পদৱাৰেন নানা হোতি, তেনেৱ মহামোগ্গল্লানসদিসোপি অগ্গসাৱকো পাটিভোগো ভৱিতুং অসক্কোন্তো আহ – ‘‘দ্ৱিন্নং খো তে অহং, আৱুসো, ধম্মানং পাটিভোগো ভোগানঞ্চ জীৱিতস্স চ, সদ্ধায পন ত্ৱংযেৱ পাটিভোগো’’তি (উদা. ১৮).

২. তিঠানসুত্তৱণ্ণনা

৪২. দুতিযে ৱিগতমলমচ্ছেৰেনাতি ৱিগতমচ্ছৰিযমলেন. মুত্তচাগোতি ৱিস্সট্ঠচাগো. পযতপাণীতি ধোতহত্থো. অস্সদ্ধো হি সতক্খত্তুং হত্থে ধোৱিত্ৱাপি মলিনহত্থোৱ হোতি, সদ্ধো পন দানাভিৰতত্তা মলিনহত্থোপি ধোতহত্থোৱ. ৱোস্সগ্গৰতোতি ৱোস্সগ্গসঙ্খাতে দানে ৰতো. যাচযোগোতি যাচিতুং যুত্তো, যাচকেহি ৱা যোগো অস্সাতিপি যাচযোগো. দানসংৱিভাগৰতোতি দানং দদন্তো সংৱিভাগঞ্চ কৰোন্তো দানসংৱিভাগৰতো নাম হোতি.

দস্সনকামো সীলৱতন্তি দসপি যোজনানি ৱীসম্পি তিংসম্পি যোজনসতম্পি গন্ত্ৱা সীলসম্পন্নে দট্ঠুকামো হোতি পাটলিপুত্তকব্ৰাহ্মণো ৱিয সদ্ধাতিস্সমহাৰাজা ৱিয চ. পাটলিপুত্তস্স কিৰ নগৰদ্ৱাৰে সালায নিসিন্না দ্ৱে ব্ৰাহ্মণা কাড়ৱল্লিমণ্ডপৱাসিমহানাগত্থেৰস্স গুণকথং সুত্ৱা ‘‘অম্হেহি তং ভিক্খুং দট্ঠুং ৱট্টতী’’তি দ্ৱেপি জনা নিক্খমিংসু. একো অন্তৰামগ্গে কালমকাসি. একো সমুদ্দতীৰং পত্ৱা নাৱায মহাতিত্থপট্টনে ওৰুয্হ অনুৰাধপুৰং আগন্ত্ৱা ‘‘কাড়ৱল্লিমণ্ডপো কুহি’’ন্তি পুচ্ছি. ৰোহণজনপদেতি. সো অনুপুব্বেন থেৰস্স ৱসনট্ঠানং পত্ৱা চূড়নগৰগামে ধুৰঘৰে নিৱাসং গহেত্ৱা থেৰস্স আহাৰং সম্পাদেত্ৱা পাতোৱ ৱুট্ঠায থেৰস্স ৱসনট্ঠানং পুচ্ছিত্ৱা গন্ত্ৱা জনপৰিযন্তে ঠিতো থেৰং দূৰতোৱ আগচ্ছন্তং দিস্ৱা সকিং তত্থেৱ ঠিতো ৱন্দিত্ৱা পুন উপসঙ্কমিত্ৱা গোপ্ফকেসু দড়্হং গহেত্ৱা ৱন্দন্তো ‘‘উচ্চা, ভন্তে, তুম্হে’’তি আহ. থেৰো চ নাতিউচ্চো নাতিৰস্সো পমাণযুত্তোৱ, তেন নং পুন আহ – ‘‘নাতিউচ্চা তুম্হে, তুম্হাকং পন গুণা মেচকৱণ্ণস্স সমুদ্দস্স মত্থকেন গন্ত্ৱা সকলজম্বুদীপতলং অজ্ঝোত্থৰিত্ৱা গতা, অহম্পি পাটলিপুত্তনগৰদ্ৱাৰে নিসিন্নো তুম্হাকং গুণকথং অস্সোসি’’ন্তি. সো থেৰস্স ভিক্খাহাৰং দত্ৱা অত্তনো তিচীৱৰং পটিযাদেত্ৱা থেৰস্স সন্তিকে পব্বজিত্ৱা তস্সোৱাদে পতিট্ঠায কতিপাহেনেৱ অৰহত্তং পাপুণি.

সদ্ধাতিস্সমহাৰাজাপি, ‘‘ভন্তে, ময্হং ৱন্দিতব্বযুত্তকং একং অয্যং আচিক্খথা’’তি পুচ্ছি. ভিক্খূ ‘‘মঙ্গলৱাসী কুট্টতিস্সত্থেৰো’’তি আহংসু. ৰাজা মহাপৰিৱাৰেন পঞ্চযোজনমগ্গং অগমাসি. থেৰো ‘‘কিং সদ্দো এসো, আৱুসো’’তি ভিক্খুসঙ্ঘং পুচ্ছি. ‘‘ৰাজা, ভন্তে, তুম্হাকং দস্সনত্থায আগতো’’তি. থেৰো চিন্তেসি – ‘‘কিং ময্হং মহল্লককালে ৰাজগেহে কম্ম’’ন্তি দিৱাট্ঠানে মঞ্চে নিপজ্জিত্ৱা ভূমিযং লেখং লিখন্তো অচ্ছি. ৰাজা ‘‘কহং থেৰো’’তি পুচ্ছিত্ৱা ‘‘দিৱাট্ঠানে’’তি সুত্ৱা তত্থ গচ্ছন্তো থেৰং ভূমিযং লেখং লিখন্তং দিস্ৱা ‘‘খীণাসৱস্স নাম হত্থকুক্কুচ্চং নত্থি, নাযং খীণাসৱো’’তি অৱন্দিত্ৱাৱ নিৱত্তি. ভিক্খুসঙ্ঘো থেৰং আহ – ‘‘ভন্তে, এৱংৱিধস্স সদ্ধস্স পসন্নস্স ৰঞ্ঞো কস্মা ৱিপ্পটিসাৰং কৰিত্থা’’তি. ‘‘আৱুসো, ৰঞ্ঞো পসাদৰক্খনং ন তুম্হাকং ভাৰো, মহল্লকত্থেৰস্স ভাৰো’’তি ৱত্ৱা অপৰভাগে অনুপাদিসেসায নিব্বানধাতুযা পৰিনিব্বাযন্তো ভিক্খুসঙ্ঘং আহ – ‘‘ময্হং কূটাগাৰম্হি অঞ্ঞম্পি পল্লঙ্কং অত্থৰথা’’তি. তস্মিং অত্থতে থেৰো – ‘‘ইদং কূটাগাৰং অন্তৰে অপ্পতিট্ঠহিত্ৱা ৰঞ্ঞা দিট্ঠকালেযেৱ ভূমিযং পতিট্ঠাতূ’’তি অধিট্ঠহিত্ৱা পৰিনিব্বাযি. কূটাগাৰং পঞ্চযোজনমগ্গং আকাসেন অগমাসি. পঞ্চযোজনমগ্গে ধজং ধাৰেতুং সমত্থা ৰুক্খা ধজপগ্গহিতাৱ অহেসুং. গচ্ছাপি গুম্বাপি সব্বে কূটাগাৰাভিমুখা হুত্ৱা অট্ঠংসু.

ৰঞ্ঞোপি পণ্ণং পহিণিংসু ‘‘থেৰো পৰিনিব্বুতো, কূটাগাৰং আকাসেন আগচ্ছতী’’তি. ৰাজা ন সদ্দহি. কূটাগাৰং আকাসেন গন্ত্ৱা থূপাৰামং পদক্খিণং কত্ৱা সিলাচেতিযট্ঠানং অগমাসি. চেতিযং সহ ৱত্থুনা উপ্পতিত্ৱা কূটাগাৰমত্থকে অট্ঠাসি, সাধুকাৰসহস্সানি পৱত্তিংসু. তস্মিং খণে মহাব্যগ্ঘত্থেৰো নাম লোহপাসাদে সত্তমকূটাগাৰে নিসিন্নো ভিক্খূনং ৱিনযকম্মং কৰোন্তো তং সদ্দং সুত্ৱা ‘‘কিং সদ্দো এসো’’তি পটিপুচ্ছি. ভন্তে, মঙ্গলৱাসী কুট্টতিস্সত্থেৰো পৰিনিব্বুতো, কূটাগাৰং পঞ্চযোজনমগ্গং আকাসেন আগতং, তত্থ সো সাধুকাৰসদ্দোতি. আৱুসো, পুঞ্ঞৱন্তে নিস্সায সক্কাৰং লভিস্সামাতি অন্তেৱাসিকে খমাপেত্ৱা আকাসেনেৱ আগন্ত্ৱা তং কূটাগাৰং পৱিসিত্ৱা দুতিযমঞ্চে নিসীদিত্ৱা অনুপাদিসেসায নিব্বানধাতুযা পৰিনিব্বাযি. ৰাজা গন্ধপুপ্ফচুণ্ণানি আদায গন্ত্ৱা আকাসে ঠিতং কূটাগাৰং দিস্ৱা কূটাগাৰং পূজেসি. তস্মিং খণে কূটাগাৰং ওতৰিত্ৱা পথৱিযং পতিট্ঠিতং. ৰাজা মহাসক্কাৰেন সৰীৰকিচ্চং কাৰেত্ৱা ধাতুযো গহেত্ৱা চেতিযং অকাসি. এৱৰূপা সীলৱন্তানং দস্সনকামা নাম হোন্তি.

সদ্ধম্মং সোতুমিচ্ছতীতি তথাগতপ্পৱেদিতং সদ্ধম্মং সোতুকামো হোতি পিণ্ডপাতিকত্থেৰাদযো ৱিয. গঙ্গাৱনৱালিঅঙ্গণম্হি কিৰ তিংস ভিক্খূ ৱস্সং উপগতা অন্ৱদ্ধমাসং উপোসথদিৱসে চতুপচ্চযসন্তোসভাৱনাৰামমহাঅৰিযৱংসঞ্চ (অ. নি. ৪.২৮) কথেন্তি. একো পিণ্ডপাতিকত্থেৰো পচ্ছাভাগেন আগন্ত্ৱা পটিচ্ছন্নট্ঠানে নিসীদি. অথ নং একো গোনসো জঙ্ঘপিণ্ডিমংসং সণ্ডাসেন গণ্হন্তো ৱিয ডংসি. থেৰো ওলোকেন্তো গোনসং দিস্ৱা ‘‘অজ্জ ধম্মস্সৱনন্তৰাযং ন কৰিস্সামী’’তি গোনসং গহেত্ৱা থৱিকায পক্খিপিত্ৱা থৱিকামুখং বন্ধিত্ৱা অৱিদূৰে ঠানে ঠপেত্ৱা ধম্মং সুণন্তোৱ নিসীদি. অৰুণুগ্গমনঞ্চ ৱিসং ৱিক্খম্ভেত্ৱা থেৰস্স তিণ্ণং ফলানং পাপুণনঞ্চ ৱিসস্স দট্ঠট্ঠানেনেৱ ওতৰিত্ৱা পথৱিপৱিসনঞ্চ ধম্মকথিকত্থেৰস্স ধম্মকথানিট্ঠাপনঞ্চ একক্খণেযেৱ অহোসি. ততো থেৰো আহ – ‘‘আৱুসো একো মে চোৰো গহিতো’’তি থৱিকং মুঞ্চিত্ৱা গোনসং ৱিস্সজ্জেসি. ভিক্খূ দিস্ৱা ‘‘কায ৱেলায দট্ঠত্থ, ভন্তে’’তি পুচ্ছিংসু. হিয্যো সাযন্হসমযে, আৱুসোতি. কস্মা, ভন্তে, এৱং ভাৰিযং কম্মং কৰিত্থাতি. আৱুসো, সচাহং দীঘজাতিকেন দট্ঠোতি ৱদেয্যং, নযিমং এত্তকং আনিসংসং লভেয্যন্তি. ইদং তাৱ পিণ্ডপাতিকত্থেৰস্স ৱত্থু.

দীঘৱাপিযম্পি ‘‘মহাজাতকভাণকত্থেৰো গাথাসহস্সং মহাৱেস্সন্তৰং কথেস্সতী’’তি তিস্সমহাগামে তিস্সমহাৱিহাৰৱাসী একো দহৰো সুত্ৱা ততো নিক্খমিত্ৱা একাহেনেৱ নৱযোজনমগ্গং আগতো. তস্মিংযেৱ খণে থেৰো ধম্মকথং আৰভি. দহৰো দূৰমগ্গাগমনেন সঞ্জাতকাযদৰথত্তা পট্ঠানগাথায সদ্ধিং অৱসানগাথংযেৱ ৱৱত্থপেসি. ততো থেৰস্স ‘‘ইদমৱোচা’’তি ৱত্ৱা উট্ঠায গমনকালে ‘‘ময্হং আগমনকম্মং মোঘং জাত’’ন্তি ৰোদমানো অট্ঠাসি. একো মনুস্সো তং কথং সুত্ৱা গন্ত্ৱা থেৰস্স আৰোচেসি, ‘‘ভন্তে, ‘তুম্হাকং ধম্মকথং সোস্সামী’তি একো দহৰভিক্খু তিস্সমহাৱিহাৰা আগতো, সো ‘কাযদৰথভাৱেন মে আগমনং মোঘং জাত’ন্তি ৰোদমানো ঠিতো’’তি. গচ্ছথ সঞ্ঞাপেথ নং ‘‘পুন স্ৱে কথেস্সামা’’তি. সো পুনদিৱসে থেৰস্স ধম্মকথং সুত্ৱা সোতাপত্তিফলং পাপুণি.

অপৰাপি উল্লকোলিকণ্ণিৱাসিকা একা ইত্থী পুত্তকং পাযমানা ‘‘দীঘভাণকমহাঅভযত্থেৰো নাম অৰিযৱংসপটিপদং কথেতী’’তি সুত্ৱা পঞ্চযোজনমগ্গং গন্ত্ৱা দিৱাকথিকত্থেৰস্স নিসিন্নকালেযেৱ ৱিহাৰং পৱিসিত্ৱা ভূমিযং পুত্তং নিপজ্জাপেত্ৱা দিৱাকথিকত্থেৰস্স ঠিতকাৱ ধম্মং অস্সোসি. সৰভাণকে থেৰে উট্ঠিতে দীঘভাণকমহাঅভযত্থেৰো চতুপচ্চযসন্তোসভাৱনাৰামমহাঅৰিযৱংসং আৰভি. সা ঠিতকাৱ পগ্গণ্হাতি. থেৰো তযো এৱ পচ্চযে কথেত্ৱা উট্ঠানাকাৰং অকাসি. সা উপাসিকা আহ – ‘‘অয্যো, ‘অৰিযৱংসং কথেস্সামী’তি সিনিদ্ধভোজনং ভুঞ্জিত্ৱা মধুৰপানকং পিৱিত্ৱা যট্ঠিমধুকতেলাদীহি ভেসজ্জং কত্ৱা কথেতুং যুত্তট্ঠানেযেৱ উট্ঠহতী’’তি. থেৰো ‘‘সাধু, ভগিনী’’তি ৱত্ৱা উপৰি ভাৱনাৰামং পট্ঠপেসি. অৰুণুগ্গমনঞ্চ থেৰস্স ‘‘ইদমৱোচা’’তি ৱচনঞ্চ উপাসিকায সোতাপত্তিফলুপ্পত্তি চ একক্খণেযেৱ অহোসি.

অপৰাপি কড়ম্পৰৱাসিকা ইত্থী অঙ্কেন পুত্তং আদায ‘‘ধম্মং সোস্সামী’’তি চিত্তলপব্বতং গন্ত্ৱা একং ৰুক্খং নিস্সায দাৰকং নিপজ্জাপেত্ৱা সযং ঠিতকাৱ ধম্মং সুণাতি. ৰত্তিভাগসমনন্তৰে একো দীঘজাতিকো তস্সা পস্সন্তিযাযেৱ সমীপে নিপন্নদাৰকং চতূহি দাঠাহি ডংসিত্ৱা অগমাসি. সা চিন্তেসি – ‘‘সচাহং ‘পুত্তো মে সপ্পেন দট্ঠো’তি ৱক্খামি, ধম্মস্স অন্তৰাযো ভৱিস্সতি. অনেকক্খত্তুং খো পন মে অযং সংসাৰৱট্টে ৱট্টন্তিযা পুত্তো অহোসি, ধম্মমেৱ চৰিস্সামী’’তি তিযামৰত্তিং ঠিতকাৱ ধম্মং পগ্গণ্হিত্ৱা সোতাপত্তিফলে পতিট্ঠায অৰুণে উগ্গতে সচ্চকিৰিযায পুত্তস্স ৱিসং নিম্মথেত্ৱা পুত্তং গহেত্ৱা গতা. এৱৰূপা পুগ্গলা ধম্মং সোতুকামা নাম হোন্তি.

৩. অত্থৱসসুত্তৱণ্ণনা

৪৩. ততিযে তযো, ভিক্খৱে, অত্থৱসে সম্পস্সমানেনাতি তযো অত্থে তীণি কাৰণানি পস্সন্তেন. অলমেৱাতি যুত্তমেৱ. যো ধম্মং দেসেতীতি যো পুগ্গলো চতুসচ্চধম্মং পকাসেতি. অত্থপ্পটিসংৱেদীতি অট্ঠকথং ঞাণেন পটিসংৱেদী. ধম্মপ্পটিসংৱেদীতি পাড়িধম্মং পটিসংৱেদী.

৪. কথাপৱত্তিসুত্তৱণ্ণনা

৪৪. চতুত্থে ঠানেহীতি কাৰণেহি. পৱত্তিনীতি অপ্পটিহতা নিয্যানিকা.

৫. পণ্ডিতসুত্তৱণ্ণনা

৪৫. পঞ্চমে পণ্ডিতপঞ্ঞত্তানীতি পণ্ডিতেহি পঞ্ঞত্তানি কথিতানি পসত্থানি. সপ্পুৰিসপঞ্ঞত্তানীতি সপ্পুৰিসেহি মহাপুৰিসেহি পঞ্ঞত্তানি কথিতানি পসত্থানি. অহিংসাতি কৰুণা চেৱ কৰুণাপুব্বভাগো চ. সংযমোতি সীলসংযমো. দমোতি ইন্দ্ৰিযসংৱৰো, উপোসথৱসেন ৱা অত্তদমনং, পুণ্ণোৱাদে (ম. নি. ৩.৩৯৫ আদযো; সং. নি. ৪.৮৮ আদযো) দমোতি ৱুত্তা খন্তিপি আড়ৱকে (সং. নি. ১.২৪৬; সু. নি. ১৮৩ আদযো) ৱুত্তা পঞ্ঞাপি ইমস্মিং সুত্তে ৱট্টতিযেৱ. মাতাপিতু উপট্ঠানন্তি মাতাপিতূনং ৰক্খনং গোপনং পটিজগ্গনং. সন্তানন্তি অঞ্ঞত্থ বুদ্ধপচ্চেকবুদ্ধঅৰিযসাৱকা সন্তো নাম, ইধ পন মাতাপিতুউপট্ঠাকা অধিপ্পেতা. তস্মা উত্তমট্ঠেন সন্তানং, সেট্ঠচৰিযট্ঠেন ব্ৰহ্মচাৰীনং. ইদং মাতাপিতুউপট্ঠানং সব্ভি উপঞ্ঞাতন্তি এৱমেত্থ অত্থো দট্ঠব্বো. সতং এতানি ঠানানীতি সন্তানং উত্তমপুৰিসানং এতানি ঠানানি কাৰণানি. অৰিযো দস্সনসম্পন্নোতি ইধ ইমেসংযেৱ তিণ্ণং ঠানানং কাৰণেন অৰিযো চেৱ দস্সনসম্পন্নো চ ৱেদিতব্বো, ন বুদ্ধাদযো ন সোতাপন্না. অথ ৱা সতং এতানি ঠানানীতি মাতুপট্ঠানং পিতুপট্ঠানন্তি এতানি ঠানানি সন্তানং উত্তমপুৰিসানং কাৰণানীতি এৱং মাতাপিতুউপট্ঠাকৱসেন ইমিস্সা গাথায অত্থো ৱেদিতব্বো. মাতাপিতুউপট্ঠাকোযেৱ হি ইধ ‘‘অৰিযো দস্সনসম্পন্নো’’তি ৱুত্তো. স লোকং ভজতে সিৱন্তি সো খেমং দেৱলোকং গচ্ছতীতি.

৬. সীলৱন্তসুত্তৱণ্ণনা

৪৬. ছট্ঠে তীহি ঠানেহীতি তীহি কাৰণেহি. কাযেনাতিআদীসু ভিক্খূ আগচ্ছন্তে দিস্ৱা পচ্চুগ্গমনং কৰোন্তা গচ্ছন্তে অনুগচ্ছন্তা আসনসালায সম্মজ্জনউপলেপনাদীনি কৰোন্তা আসনানি পঞ্ঞাপেন্তা পানীযং পচ্চুপট্ঠাপেন্তা কাযেন পুঞ্ঞং পসৱন্তি নাম. ভিক্খুসঙ্ঘং পিণ্ডায চৰন্তং দিস্ৱা ‘‘যাগুং দেথ, ভত্তং দেথ, সপ্পিনৱনীতাদীনি দেথ, গন্ধপুপ্ফাদীহি পূজেথ, উপোসথং উপৱসথ, ধম্মং সুণাথ, চেতিযং ৱন্দথা’’তিআদীনি ৱদন্তা ৱাচায পুঞ্ঞং পসৱন্তি নাম. ভিক্খূ পিণ্ডায চৰন্তে দিস্ৱা ‘‘লভন্তূ’’তি চিন্তেন্তা মনসা পুঞ্ঞং পসৱন্তি নাম. পসৱন্তীতি পটিলভন্তি. পুঞ্ঞং পনেত্থ লোকিযলোকুত্তৰমিস্সকং কথিতং.

৭. সঙ্খতলক্খণসুত্তৱণ্ণনা

৪৭. সত্তমে সঙ্খতস্সাতি পচ্চযেহি সমাগন্ত্ৱা কতস্স. সঙ্খতলক্খণানীতি সঙ্খতং এতন্তি সঞ্জাননকাৰণানি নিমিত্তানি. উপ্পাদোতি জাতি. ৱযোতি ভেদো. ঠিতস্স অঞ্ঞথত্তং নাম জৰা. তত্থ সঙ্খতন্তি তেভূমকা ধম্মা. মগ্গফলানি পন অসম্মসনূপগত্তা ইধ ন কথীযন্তি. উপ্পাদাদযো সঙ্খতলক্খণা নাম. তেসু উপ্পাদক্খণে উপ্পাদো, ঠানক্খণে জৰা, ভেদক্খণে ৱযো. লক্খণং ন সঙ্খতং, সঙ্খতং ন লক্খণং, লক্খণেন পন সঙ্খতং পৰিচ্ছিন্নং. যথা হত্থিঅস্সগোমহিংসাদীনং সত্তিসূলাদীনি সঞ্জাননলক্খণানি ন হত্থিআদযো, নপি হত্থিআদযো লক্খণানেৱ, লক্খণেহি পন তে ‘‘অসুকস্স হত্থী, অসুকস্স অস্সো, অসুকহত্থী, অসুকঅস্সো’’তি ৱা পঞ্ঞাযন্তি, এৱংসম্পদমিদং ৱেদিতব্বং.

৮. অসঙ্খতলক্খণসুত্তৱণ্ণনা

৪৮. অট্ঠমে অসঙ্খতস্সাতি পচ্চযেহি সমাগন্ত্ৱা অকতস্স. অসঙ্খতলক্খণানীতি অসঙ্খতং এতন্তি সঞ্জাননকাৰণানি নিমিত্তানি. ন উপ্পাদো পঞ্ঞাযতীতিআদীহি উপ্পাদজৰাভঙ্গানং অভাৱো ৱুত্তো. উপ্পাদাদীনঞ্হি অভাৱেন অসঙ্খতন্তি পঞ্ঞাযতি.

৯. পব্বতৰাজসুত্তৱণ্ণনা

৪৯. নৱমে মহাসালাতি মহাৰুক্খা. কুলপতিন্তি কুলজেট্ঠকং. সেলোতি সিলামযো. অৰঞ্ঞস্মিন্তি অগামকট্ঠানে. ব্ৰহ্মাতি মহন্তো. ৱনেতি অটৱিযং. ৱনপ্পতীতি ৱনজেট্ঠকা. ইধ ধম্মং চৰিত্ৱান, মগ্গং সুগতিগামিনন্তি সুগতিগামিকমগ্গসঙ্খাতং ধম্মং চৰিত্ৱা.

১০. আতপ্পকৰণীযসুত্তৱণ্ণনা

৫০. দসমে আতপ্পং কৰণীযন্তি ৱীৰিযং কাতুং যুত্তং. অনুপ্পাদাযাতি অনুপ্পাদত্থায, অনুপ্পাদং সাধেস্সামীতি ইমিনা কাৰণেন কত্তব্বন্তি অত্থো. পৰতোপি এসেৱ নযো. সাৰীৰিকানন্তি সৰীৰসম্ভৱানং. দুক্খানন্তি দুক্খমানং. তিব্বানন্তি বহলানং, তাপনৱসেন ৱা তিব্বানং. খৰানন্তি ফৰুসানং. কটুকানন্তি তিখিণানং. অসাতানন্তি অমধুৰানং. অমনাপানন্তি মনং ৱড্ঢেতুং অসমত্থানং. পাণহৰানন্তি জীৱিতহৰানং. অধিৱাসনাযাতি অধিৱাসনত্থায সহনত্থায খমনত্থায.

এত্তকে ঠানে সত্থা আণাপেত্ৱা আণত্তিং পৱত্তেত্ৱা ইদানি সমাদপেন্তো যতো খো, ভিক্খৱেতিআদিমাহ. তত্থ যতোতি যদা. আতাপীতি ৱীৰিযৱা. নিপকোতি সপ্পঞ্ঞো. সতোতি সতিযা সমন্নাগতো. দুক্খস্স অন্তকিৰিযাযাতি ৱট্টদুক্খস্স পৰিচ্ছেদপৰিৱটুমকিৰিযায. ইমে চ পন আতাপাদযো তযোপি লোকিযলোকুত্তৰমিস্সকা কথিতা.

১১. মহাচোৰসুত্তৱণ্ণনা

৫১. একাদসমে মহাচোৰোতি মহন্তো বলৱচোৰো. সন্ধিন্তি ঘৰসন্ধিং. নিল্লোপন্তি মহাৱিলোপং. একাগাৰিকন্তি একমেৱ গেহং পৰিৱাৰেত্ৱা ৱিলুম্পনং. পৰিপন্থেপি তিট্ঠতীতি পন্থদূহনকম্মং কৰোতি. নদীৱিদুগ্গন্তি নদীনং দুগ্গমট্ঠানং অন্তৰদীপকং, যত্থ সক্কা হোতি দ্ৱীহিপি তীহিপি জঙ্ঘসহস্সেহি সদ্ধিং নিলীযিতুং. পব্বতৱিসমন্তি পব্বতানং ৱিসমট্ঠানং পব্বতন্তৰং, যত্থ সক্কা হোতি সত্তহি ৱা অট্ঠহি ৱা জঙ্ঘসহস্সেহি সদ্ধিং নিলীযিতুং. তিণগহনন্তি তিণেন ৱড্ঢিত্ৱা সঞ্ছন্নং দ্ৱত্তিযোজনট্ঠানং. ৰোধন্তি ঘনং অঞ্ঞমঞ্ঞং সংসট্ঠসাখং একাবদ্ধং মহাৱনসণ্ডং. পৰিযোধায অত্থং ভণিস্সন্তীতি পৰিযোদহিত্ৱা তং তং কাৰণং পক্খিপিত্ৱা অত্থং কথযিস্সন্তি. ত্যাস্সাতি তে অস্স. পৰিযোধায অত্থং ভণন্তীতি কিস্মিঞ্চি কিঞ্চি ৱত্তুং আৰদ্ধেযেৱ ‘‘মা এৱং অৱচুত্থ, মযং এতং কুলপৰম্পৰায জানাম, ন এস এৱৰূপং কৰিস্সতী’’তি তং তং কাৰণং পক্খিপিত্ৱা মহন্তম্পি দোসং হৰন্তা অত্থং ভণন্তি. অথ ৱা পৰিযোধাযাতি পটিচ্ছাদেত্ৱাতিপি অত্থো. তে হি তস্সপি দোসং পটিচ্ছাদেত্ৱা অত্থং ভণন্তি. খতং উপহতন্তি গুণখননেন খতং, গুণুপঘাতেন উপহতং. ৱিসমেন কাযকম্মেনাতি সম্পক্খলনট্ঠেন ৱিসমেন কাযদ্ৱাৰিককম্মেন. ৱচীমনোকম্মেসুপি এসেৱ নযো. অন্তগ্গাহিকাযাতি দসৱত্থুকায অন্তং গহেত্ৱা ঠিতদিট্ঠিযা. সেসং সব্বত্থ উত্তানত্থমেৱাতি.

চূড়ৱগ্গো পঞ্চমো.