৫. উত্তিযসুত্তৱণ্ণনা

৯৫. পঞ্চমে তুণ্হী অহোসীতি সত্তূপলদ্ধিযং ঠত্ৱা অপুচ্ছং পুচ্ছতীতি তুণ্হী অহোসি. সব্বসামুক্কংসিকং ৱত মেতি মযা সব্বপুচ্ছানং উত্তমপুচ্ছং পুচ্ছিতো সমণো গোতমো সংসাদেতি নো ৱিস্সজ্জেতি, নূন ন ৱিসহতি ন সক্কোতি ৱিস্সজ্জেতুন্তি এৱং পাপিকং দিট্ঠিং মা পটিলভীতি. তদস্সাতি তং এৱং উপ্পন্নং দিট্ঠিগতং ভৱেয্য. পচ্চন্তিমন্তি যস্মা মজ্ঝিমদেসে নগৰস্স উদ্ধাপাদীনি থিৰানি ৱা হোন্তু দুব্বলানি ৱা, সব্বসো ৱা পন মা হোন্তু, চোৰাসঙ্কা ন হোতি. তস্মা তং অগ্গহেত্ৱা ‘‘পচ্চন্তিমং নগৰ’’ন্তি আহ. দড়্হুদ্ধাপন্তি থিৰপাকাৰপাদং. দড়্হপাকাৰতোৰণন্তি থিৰপাকাৰঞ্চেৱ থিৰপিট্ঠিসঙ্ঘাটঞ্চ. একদ্ৱাৰন্তি কস্মা আহ? বহুদ্ৱাৰস্মিঞ্হি নগৰে বহূহি পণ্ডিতদোৱাৰিকেহি ভৱিতব্বং, একদ্ৱাৰে একোৱ ৱট্টতি. তথাগতস্স চ পঞ্ঞায অঞ্ঞো সদিসো নত্থি. তস্মা সত্থু পণ্ডিতভাৱস্স ওপম্মত্থং একংযেৱ দোৱাৰিকং দস্সেতুং ‘‘একদ্ৱাৰ’’ন্তি আহ. পণ্ডিতোতি পণ্ডিচ্চেন সমন্নাগতো. ব্যত্তোতি ৱেয্যত্তিযেন সমন্নাগতো. মেধাৱীতি ঠানুপ্পত্তিযপঞ্ঞাসঙ্খাতায মেধায সমন্নাগতো. অনুপৰিযাযপথন্তি অনুপৰিযাযনামকং মগ্গং. পাকাৰসন্ধিন্তি দ্ৱিন্নং ইট্ঠকানং অপগতট্ঠানং. পাকাৰৱিৱৰন্তি পাকাৰস্স ছিন্নট্ঠানং. তদেৱেতং পঞ্হন্তি তংযেৱ ‘‘সস্সতো লোকো’’তিআদিনা নযেন পুট্ঠং ঠপনীযপঞ্হং পুনপি পুচ্ছি. সব্বো চ তেন লোকোতি সত্তূপলদ্ধিযংযেৱ ঠত্ৱা অঞ্ঞেনাকাৰেন পুচ্ছতীতি দস্সেতি.