৬. কোকনুদসুত্তৱণ্ণনা

৯৬. ছট্ঠে পুব্বাপযমানোতি পুব্বসদিসানি নিৰুদকানি কুৰুমানো. ক্ৱেত্থ, আৱুসোতি কো এত্থ, আৱুসো. যাৱতা, আৱুসো, দিট্ঠীতি যত্তিকা দ্ৱাসট্ঠিৱিধাপি দিট্ঠি নাম অত্থি. যাৱতা দিট্ঠিট্ঠানন্তি ‘‘খন্ধাপি দিট্ঠিট্ঠানং, অৱিজ্জাপি, ফস্সোপি, সঞ্ঞাপি, ৱিতক্কোপি অযোনিসোমনসিকাৰোপি, পাপমিত্তোপি, পৰতোঘোসোপি দিট্ঠিট্ঠান’’ন্তি এৱং যত্তকং অট্ঠৱিধম্পি দিট্ঠিট্ঠানং দিট্ঠিকাৰণং নাম অত্থি. দিট্ঠাধিট্ঠানন্তি দিট্ঠীনং অধিট্ঠানং, অধিঠত্ৱা অধিভৱিত্ৱা পৱত্তায দিট্ঠিযা এতং নামং. দিট্ঠিপৰিযুট্ঠানন্তি ‘‘কতমানি অট্ঠাৰস দিট্ঠিপৰিযুট্ঠানানি? যা দিট্ঠি দিট্ঠিগতং দিট্ঠিগহনং দিট্ঠিকন্তাৰং দিট্ঠিৱিসূকং দিট্ঠিৱিপ্ফন্দিতং দিট্ঠিসংযোজনং দিট্ঠিসল্লং দিট্ঠিসম্বাধো দিট্ঠিপলিবোধো দিট্ঠিবন্ধনং দিট্ঠিপপাতো দিট্ঠানুসযো দিট্ঠিসন্তাপো দিট্ঠিপৰিড়াহো দিট্ঠিগন্থো দিট্ঠুপাদানং দিট্ঠাভিনিৱেসো দিট্ঠিপৰামাসো. ইমানি অট্ঠাৰস দিট্ঠিপৰিযুট্ঠানানী’’তি এৱং ৱুত্তং দিট্ঠিপৰিযুট্ঠানং. সমুট্ঠানন্তি দিট্ঠিট্ঠানস্সেৱ ৱেৱচনং. ৱুত্তঞ্হেতং – ‘‘খন্ধা পচ্চযো দিট্ঠীনং উপাদায সমুট্ঠানট্ঠেনা’’তি (পটি. ম. ১.১২৪) সব্বং ৱিত্থাৰেতব্বং. সোতাপত্তিমগ্গো পন দিট্ঠিসমুগ্ঘাতো নাম সব্বদিট্ঠীনং সমুগ্ঘাতকত্তা. তমহন্তি তং সব্বং অহং জানামি. ক্যাহং ৱক্খামীতি কিংকাৰণা অহং ৱক্খামি.