৫-৭. পঠমসুখসুত্তাদিৱণ্ণনা

৬৫-৬৭. পঞ্চমে ৱট্টমূলকং সুখদুক্খং পুচ্ছিতং, ছট্ঠে সাসনমূলকং. সত্তমে নড়কপানন্তি অতীতে বোধিসত্তস্স ওৱাদে ঠত্ৱা ৱানৰযূথেন নড়েহি উদকস্স পীতট্ঠানে মাপিতত্তা এৱংলদ্ধনামো নিগমো. তুণ্হীভূতং তুণ্হীভূতন্তি যং যং দিসং অনুৱিলোকেতি, তত্থ তত্থ তুণ্হীভূতমেৱ. অনুৱিলোকেত্ৱাতি ততো ততো ৱিলোকেত্ৱা. পিট্ঠি মে আগিলাযতীতি কস্মা আগিলাযতি? ভগৱতো হি ছ ৱস্সানি মহাপধানং পদহন্তস্স মহন্তং কাযদুক্খং অহোসি, অথস্স অপৰভাগে মহল্লককালে পিট্ঠিৱাতো উপ্পজ্জি. উপাদিন্নকসৰীৰস্স ঠাননিসজ্জাদীহি অপ্পমত্তকেন আবাধেন ন সক্কা কেনচি ভৱিতুং. তং গহেত্ৱাপি থেৰস্স ওকাসকৰণত্থং এৱমাহ. সঙ্ঘাটিং পঞ্ঞাপেত্ৱা একমন্তে পতিৰূপট্ঠানে পঞ্ঞত্তস্স কপ্পিযমঞ্চস্স উপৰি অত্থৰিত্ৱা.