১৩. কুসলমূলকৱিপাকনিদ্দেসো

৩৪৩. কতমে ধম্মা অব্যাকতা? যস্মিং সমযে কামাৱচৰস্স কুসলস্স কম্মস্স কতত্তা উপচিতত্তা ৱিপাকং চক্খুৱিঞ্ঞাণং উপ্পন্নং হোতি উপেক্খাসহগতং ৰূপাৰম্মণং, তস্মিং সমযে কুসলমূলপচ্চযা সঙ্খাৰো, সঙ্খাৰপচ্চযা ৱিঞ্ঞাণং, ৱিঞ্ঞাণপচ্চযা নামং, নামপচ্চযা ছট্ঠাযতনং, ছট্ঠাযতনপচ্চযা ফস্সো, ফস্সপচ্চযা ৱেদনা, ৱেদনাপচ্চযা ভৱো, ভৱপচ্চযা জাতি, জাতিপচ্চযা জৰামৰণং. এৱমেতস্স কেৱলস্স দুক্খক্খন্ধস্স সমুদযো হোতি.

৩৪৪. তত্থ কতমো কুসলমূলপচ্চযা সঙ্খাৰো? যা চেতনা সঞ্চেতনা সঞ্চেতযিতত্তং – অযং ৱুচ্চতি ‘‘কুসলমূলপচ্চযা সঙ্খাৰো’’…পে… তেন ৱুচ্চতি ‘‘এৱমেতস্স কেৱলস্স দুক্খক্খন্ধস্স সমুদযো হোতী’’তি.

৩৪৫. কতমে ধম্মা অব্যাকতা? যস্মিং সমযে কামাৱচৰস্স কুসলস্স কম্মস্স কতত্তা উপচিতত্তা ৱিপাকং সোতৱিঞ্ঞাণং উপ্পন্নং হোতি উপেক্খাসহগতং সদ্দাৰম্মণং…পে… ঘানৱিঞ্ঞাণং উপ্পন্নং হোতি উপেক্খাসহগতং গন্ধাৰম্মণং…পে… জিৱ্হাৱিঞ্ঞাণং উপ্পন্নং হোতি উপেক্খাসহগতং ৰসাৰম্মণং…পে… কাযৱিঞ্ঞাণং উপ্পন্নং হোতি সুখসহগতং ফোট্ঠব্বাৰম্মণং…পে… মনোধাতু উপ্পন্না হোতি উপেক্খাসহগতা ৰূপাৰম্মণা ৱা…পে… ফোট্ঠব্বাৰম্মণা ৱা…পে… মনোৱিঞ্ঞাণধাতু উপ্পন্না হোতি সোমনস্সসহগতা ৰূপাৰম্মণা ৱা…পে… ধম্মাৰম্মণা ৱা…পে… মনোৱিঞ্ঞাণধাতু উপ্পন্না হোতি উপেক্খাসহগতা ৰূপাৰম্মণা ৱা…পে… ধম্মাৰম্মণা ৱা যং যং ৱা পনাৰব্ভ, তস্মিং সমযে কুসলমূলপচ্চযা সঙ্খাৰো, সঙ্খাৰপচ্চযা ৱিঞ্ঞাণং, ৱিঞ্ঞাণপচ্চযা নামং, নামপচ্চযা ছট্ঠাযতনং, ছট্ঠাযতনপচ্চযা ফস্সো, ফস্সপচ্চযা ৱেদনা, ৱেদনাপচ্চযা অধিমোক্খো, অধিমোক্খপচ্চযা ভৱো, ভৱপচ্চযা জাতি, জাতিপচ্চযা জৰামৰণং. এৱমেতস্স কেৱলস্স দুক্খক্খন্ধস্স সমুদযো হোতি.

৩৪৬. কতমে ধম্মা অব্যাকতা? যস্মিং সমযে কামাৱচৰস্স কুসলস্স কম্মস্স কতত্তা উপচিতত্তা ৱিপাকা মনোৱিঞ্ঞাণধাতু উপ্পন্না হোতি সোমনস্সসহগতা ঞাণসম্পযুত্তা…পে… সোমনস্সসহগতা ঞাণসম্পযুত্তা সসঙ্খাৰেন…পে… সোমনস্সসহগতা ঞাণৱিপ্পযুত্তা…পে… সোমনস্সসহগতা ঞাণৱিপ্পযুত্তা সসঙ্খাৰেন…পে… উপেক্খাসহগতা ঞাণসম্পযুত্তা…পে… উপেক্খাসহগতা ঞাণসম্পযুত্তা সসঙ্খাৰেন…পে… উপেক্খাসহগতা ঞাণৱিপ্পযুত্তা…পে… উপেক্খাসহগতা ঞাণৱিপ্পযুত্তা সসঙ্খাৰেন ৰূপাৰম্মণা ৱা…পে… ধম্মাৰম্মণা ৱা যং যং ৱা পনাৰব্ভ, তস্মিং সমযে কুসলমূলপচ্চযা সঙ্খাৰো, সঙ্খাৰপচ্চযা ৱিঞ্ঞাণং, ৱিঞ্ঞাণপচ্চযা নামং, নামপচ্চযা ছট্ঠাযতনং, ছট্ঠাযতনপচ্চযা ফস্সো, ফস্সপচ্চযা ৱেদনা, ৱেদনাপচ্চযা পসাদো, পসাদপচ্চযা অধিমোক্খো, অধিমোক্খপচ্চযা ভৱো, ভৱপচ্চযা জাতি, জাতিপচ্চযা জৰামৰণং. এৱমেতস্স কেৱলস্স দুক্খক্খন্ধস্স সমুদযো হোতি.

৩৪৭. কতমে ধম্মা অব্যাকতা? যস্মিং সমযে ৰূপূপপত্তিযা মগ্গং ভাৱেতি ৱিৱিচ্চেৱ কামেহি…পে… পঠমং ঝানং উপসম্পজ্জ ৱিহৰতি পথৱীকসিণং, তস্মিং সমযে ফস্সো হোতি…পে… অৱিক্খেপো হোতি – ইমে ধম্মা কুসলা.

তস্সেৱ ৰূপাৱচৰস্স কুসলস্স কম্মস্স কতত্তা উপচিতত্তা ৱিপাকং ৱিৱিচ্চেৱ কামেহি…পে… পঠমং ঝানং উপসম্পজ্জ ৱিহৰতি পথৱীকসিণং, তস্মিং সমযে কুসলমূলপচ্চযা সঙ্খাৰো, সঙ্খাৰপচ্চযা ৱিঞ্ঞাণং, ৱিঞ্ঞাণপচ্চযা নামং, নামপচ্চযা ছট্ঠাযতনং, ছট্ঠাযতনপচ্চযা ফস্সো, ফস্সপচ্চযা ৱেদনা, ৱেদনাপচ্চযা পসাদো, পসাদপচ্চযা অধিমোক্খো, অধিমোক্খপচ্চযা ভৱো, ভৱপচ্চযা জাতি, জাতিপচ্চযা জৰামৰণং. এৱমেতস্স কেৱলস্স দুক্খক্খন্ধস্স সমুদযো হোতি.

৩৪৮. কতমে ধম্মা অব্যাকতা? যস্মিং সমযে অৰূপূপপত্তিযা মগ্গং ভাৱেতি সব্বসো আকিঞ্চঞ্ঞাযতনং সমতিক্কম্ম নেৱসঞ্ঞানাসঞ্ঞাযতনসঞ্ঞাসহগতং সুখস্স চ পহানা…পে… চতুত্থং ঝানং উপসম্পজ্জ ৱিহৰতি, তস্মিং সমযে ফস্সো হোতি…পে… অৱিক্খেপো হোতি – ইমে ধম্মা কুসলা.

তস্সেৱ অৰূপাৱচৰস্স কুসলস্স কম্মস্স কতত্তা উপচিতত্তা ৱিপাকং সব্বসো আকিঞ্চঞ্ঞাযতনং সমতিক্কম্ম নেৱসঞ্ঞানাসঞ্ঞাযতনসঞ্ঞাসহগতং সুখস্স চ পহানা…পে… চতুত্থং ঝানং উপসম্পজ্জ ৱিহৰতি, তস্মিং সমযে কুসলমূলপচ্চযা সঙ্খাৰো, সঙ্খাৰপচ্চযা ৱিঞ্ঞাণং, ৱিঞ্ঞাণপচ্চযা নামং, নামপচ্চযা ছট্ঠাযতনং, ছট্ঠাযতনপচ্চযা ফস্সো, ফস্সপচ্চযা ৱেদনা, ৱেদনাপচ্চযা পসাদো, পসাদপচ্চযা অধিমোক্খো, অধিমোক্খপচ্চযা ভৱো, ভৱপচ্চযা জাতি, জাতিপচ্চযা জৰামৰণং. এৱমেতস্স কেৱলস্স দুক্খক্খন্ধস্স সমুদযো হোতি.

৩৪৯. কতমে ধম্মা অব্যাকতা? যস্মিং সমযে লোকুত্তৰং ঝানং ভাৱেতি নিয্যানিকং অপচযগামিং দিট্ঠিগতানং পহানায পঠমায ভূমিযা পত্তিযা ৱিৱিচ্চেৱ কামেহি…পে… পঠমং ঝানং উপসম্পজ্জ ৱিহৰতি দুক্খপটিপদং দন্ধাভিঞ্ঞং, তস্মিং সমযে ফস্সো হোতি…পে… অৱিক্খেপো হোতি – ইমে ধম্মা কুসলা.

তস্সেৱ লোকুত্তৰস্স কুসলস্স ঝানস্স কতত্তা ভাৱিতত্তা ৱিপাকং ৱিৱিচ্চেৱ কামেহি…পে… পঠমং ঝানং উপসম্পজ্জ ৱিহৰতি দুক্খপটিপদং দন্ধাভিঞ্ঞং সুঞ্ঞতং, তস্মিং সমযে কুসলমূলপচ্চযা সঙ্খাৰো, সঙ্খাৰপচ্চযা ৱিঞ্ঞাণং, ৱিঞ্ঞাণপচ্চযা নামং, নামপচ্চযা ছট্ঠাযতনং, ছট্ঠাযতনপচ্চযা ফস্সো, ফস্সপচ্চযা ৱেদনা, ৱেদনাপচ্চযা পসাদো, পসাদপচ্চযা অধিমোক্খো, অধিমোক্খপচ্চযা ভৱো, ভৱপচ্চযা জাতি, জাতিপচ্চযা জৰামৰণং. এৱমেতেসং ধম্মানং সমুদযো হোতি.

কুসলমূলকৱিপাকনিদ্দেসো.