৭. অভিঞ্ঞেয্যাদিৱাৰো

১০৩০. পঞ্চন্নং খন্ধানং কতি অভিঞ্ঞেয্যা, কতি পৰিঞ্ঞেয্যা, কতি পহাতব্বা, কতি ভাৱেতব্বা, কতি সচ্ছিকাতব্বা, কতি ন পহাতব্বা, ন ভাৱেতব্বা, ন সচ্ছিকাতব্বা…পে… সত্তন্নং চিত্তানং কতি অভিঞ্ঞেয্যা, কতি পৰিঞ্ঞেয্যা, কতি পহাতব্বা, কতি ভাৱেতব্বা, কতি সচ্ছিকাতব্বা, কতি ন পহাতব্বা ন ভাৱেতব্বা ন সচ্ছিকাতব্বা?

১০৩১. ৰূপক্খন্ধো অভিঞ্ঞেয্যো পৰিঞ্ঞেয্যো ন পহাতব্বো ন ভাৱেতব্বো ন সচ্ছিকাতব্বো. চত্তাৰো খন্ধা অভিঞ্ঞেয্যা পৰিঞ্ঞেয্যা, সিযা পহাতব্বা, সিযা ভাৱেতব্বা, সিযা সচ্ছিকাতব্বা, সিযা ন পহাতব্বা ন ভাৱেতব্বা ন সচ্ছিকাতব্বা.

দসাযতনা অভিঞ্ঞেয্যা পৰিঞ্ঞেয্যা ন পহাতব্বা ন ভাৱেতব্বা ন সচ্ছিকাতব্বা. দ্ৱে আযতনা অভিঞ্ঞেয্যা পৰিঞ্ঞেয্যা, সিযা পহাতব্বা, সিযা ভাৱেতব্বা, সিযা সচ্ছিকাতব্বা, সিযা ন পহাতব্বা ন ভাৱেতব্বা ন সচ্ছিকাতব্বা.

সোড়স ধাতুযো অভিঞ্ঞেয্যা পৰিঞ্ঞেয্যা ন পহাতব্বা ন ভাৱেতব্বা ন সচ্ছিকাতব্বা. দ্ৱে ধাতুযো অভিঞ্ঞেয্যা পৰিঞ্ঞেয্যা, সিযা পহাতব্বা, সিযা ভাৱেতব্বা, সিযা সচ্ছিকাতব্বা, সিযা ন পহাতব্বা ন ভাৱেতব্বা ন সচ্ছিকাতব্বা.

সমুদযসচ্চং অভিঞ্ঞেয্যং পৰিঞ্ঞেয্যং পহাতব্বং ন ভাৱেতব্বং ন সচ্ছিকাতব্বং. মগ্গসচ্চং অভিঞ্ঞেয্যং পৰিঞ্ঞেয্যং ন পহাতব্বং ভাৱেতব্বং ন সচ্ছিকাতব্বং. নিৰোধসচ্চং অভিঞ্ঞেয্যং পৰিঞ্ঞেয্যং ন পহাতব্বং ন ভাৱেতব্বং সচ্ছিকাতব্বং. দুক্খসচ্চং অভিঞ্ঞেয্যং পৰিঞ্ঞেয্যং, সিযা পহাতব্বং, ন ভাৱেতব্বং, ন সচ্ছিকাতব্বং, সিযা ন পহাতব্বং.

নৱিন্দ্ৰিযা অভিঞ্ঞেয্যা পৰিঞ্ঞেয্যা ন পহাতব্বা ন ভাৱেতব্বা ন সচ্ছিকাতব্বা. দোমনস্সিন্দ্ৰিযং অভিঞ্ঞেয্যং পৰিঞ্ঞেয্যং পহাতব্বং ন ভাৱেতব্বং ন সচ্ছিকাতব্বং. অনঞ্ঞাতঞ্ঞস্সামীতিন্দ্ৰিযং অভিঞ্ঞেয্যং পৰিঞ্ঞেয্যং ন পহাতব্বং ভাৱেতব্বং ন সচ্ছিকাতব্বং. অঞ্ঞিন্দ্ৰিযং অভিঞ্ঞেয্যং পৰিঞ্ঞেয্যং ন পহাতব্বং, সিযা ভাৱেতব্বং, সিযা সচ্ছিকাতব্বং. অঞ্ঞাতাৱিন্দ্ৰিযং অভিঞ্ঞেয্যং পৰিঞ্ঞেয্যং ন পহাতব্বং ন ভাৱেতব্বং সচ্ছিকাতব্বং. তীণিন্দ্ৰিযা অভিঞ্ঞেয্যা পৰিঞ্ঞেয্যা ন পহাতব্বা, সিযা ভাৱেতব্বা, সিযা সচ্ছিকাতব্বা, সিযা ন ভাৱেতব্বা, সচ্ছিকাতব্বা. ছ ইন্দ্ৰিযা অভিঞ্ঞেয্যা পৰিঞ্ঞেয্যা, সিযা পহাতব্বা, সিযা ভাৱেতব্বা, সিযা সচ্ছিকাতব্বা, সিযা ন পহাতব্বা ন ভাৱেতব্বা ন সচ্ছিকাতব্বা.

তযো অকুসলহেতূ অভিঞ্ঞেয্যা পৰিঞ্ঞেয্যা পহাতব্বা ন ভাৱেতব্বা ন সচ্ছিকাতব্বা. তযো কুসলহেতূ অভিঞ্ঞেয্যা পৰিঞ্ঞেয্যা ন পহাতব্বা, সিযা ভাৱেতব্বা, ন সচ্ছিকাতব্বা, সিযা ন ভাৱেতব্বা. তযো অব্যাকতহেতূ অভিঞ্ঞেয্যা পৰিঞ্ঞেয্যা ন পহাতব্বা ন ভাৱেতব্বা, সিযা সচ্ছিকাতব্বা, সিযা ন সচ্ছিকাতব্বা.

কবড়ীকাৰো আহাৰো অভিঞ্ঞেয্যো পৰিঞ্ঞেয্যো ন পহাতব্বো ন ভাৱেতব্বো ন সচ্ছিকাতব্বো. তযো আহাৰা অভিঞ্ঞেয্যা পৰিঞ্ঞেয্যা, সিযা পহাতব্বা, সিযা ভাৱেতব্বা, সিযা সচ্ছিকাতব্বা, সিযা ন পহাতব্বা ন ভাৱেতব্বা ন সচ্ছিকাতব্বা.

ছ ফস্সা অভিঞ্ঞেয্যা পৰিঞ্ঞেয্যা ন পহাতব্বা ন ভাৱেতব্বা ন সচ্ছিকাতব্বা. মনোৱিঞ্ঞাণধাতুসম্ফস্সো অভিঞ্ঞেয্যো পৰিঞ্ঞেয্যো, সিযা পহাতব্বো, সিযা ভাৱেতব্বো, সিযা সচ্ছিকাতব্বো, সিযা ন পহাতব্বো ন ভাৱেতব্বো ন সচ্ছিকাতব্বো.

ছ ৱেদনা…পে… ছ সঞ্ঞা… ছ চেতনা… ছ চিত্তা অভিঞ্ঞেয্যা পৰিঞ্ঞেয্যা ন পহাতব্বা ন ভাৱেতব্বা ন সচ্ছিকাতব্বা. মনোৱিঞ্ঞাণধাতু অভিঞ্ঞেয্যা পৰিঞ্ঞেয্যা, সিযা পহাতব্বা, সিযা ভাৱেতব্বা, সিযা সচ্ছিকাতব্বা, সিযা ন পহাতব্বা ন ভাৱেতব্বা ন সচ্ছিকাতব্বা.