১. উপ্পাদককম্মং

১০২১. দেৱাতি. তযো দেৱা – সম্মুতিদেৱা [সম্মতিদেৱা (স্যা.)], উপপত্তিদেৱা, ৱিসুদ্ধিদেৱা.

সম্মুতিদেৱা নাম – ৰাজানো, দেৱিযো, কুমাৰা.

উপপত্তিদেৱা নাম – চাতুমহাৰাজিকে [চাতুম্মহাৰাজিকে (সী. স্যা.)] দেৱে উপাদায তদুপৰি দেৱা.

ৱিসুদ্ধিদেৱা নাম – অৰহন্তো ৱুচ্চন্তি.

দানং দত্ৱা, সীলং সমাদিযিত্ৱা, উপোসথকম্মং কত্ৱা কত্থ উপপজ্জন্তি? দানং দত্ৱা, সীলং সমাদিযিত্ৱা, উপোসথকম্মং কত্ৱা অপ্পেকচ্চে খত্তিযমহাসালানং সহব্যতং উপপজ্জন্তি, অপ্পেকচ্চে ব্ৰাহ্মণমহাসালানং সহব্যতং উপপজ্জন্তি, অপ্পেকচ্চে গহপতিমহাসালানং সহব্যতং উপপজ্জন্তি, অপ্পেকচ্চে চাতুমহাৰাজিকানং দেৱানং সহব্যতং উপপজ্জন্তি, অপ্পেকচ্চে তাৱতিংসানং দেৱানং সহব্যতং উপপজ্জন্তি, অপ্পেকচ্চে যামানং দেৱানং সহব্যতং উপপজ্জন্তি, অপ্পেকচ্চে তুসিতানং দেৱানং সহব্যতং উপপজ্জন্তি, অপ্পেকচ্চে নিম্মানৰতীনং দেৱানং সহব্যতং উপপজ্জন্তি, অপ্পেকচ্চে পৰনিম্মিতৱসৱত্তীনং দেৱানং সহব্যতং উপপজ্জন্তি.