৪. অপৰিযাপন্নং

৯৯৭. অপৰিযাপন্নে কতি খন্ধা…পে… কতি চিত্তানি?

অপৰিযাপন্নে চত্তাৰো খন্ধা, দ্ৱে আযতনানি, দ্ৱে ধাতুযো, দ্ৱে সচ্চানি, দ্ৱাদসিন্দ্ৰিযানি, ছ হেতূ, তযো আহাৰা, একো ফস্সো, একা ৱেদনা, একা সঞ্ঞা, একা চেতনা, একং চিত্তং.

৯৯৮. তত্থ কতমে অপৰিযাপন্নে চত্তাৰো খন্ধা? ৱেদনাক্খন্ধো, সঞ্ঞাক্খন্ধো, সঙ্খাৰক্খন্ধো, ৱিঞ্ঞাণক্খন্ধো – ইমে ৱুচ্চন্তি ‘‘অপৰিযাপন্নে চত্তাৰো খন্ধা’’.

তত্থ কতমানি অপৰিযাপন্নে দ্ৱে আযতনানি? মনাযতনং, ধম্মাযতনং – ইমানি ৱুচ্চন্তি ‘‘অপৰিযাপন্নে দ্ৱে আযতনানি’’.

তত্থ কতমা অপৰিযাপন্নে দ্ৱে ধাতুযো? মনোৱিঞ্ঞাণধাতু, ধম্মধাতু – ইমা ৱুচ্চন্তি ‘‘অপৰিযাপন্নে দ্ৱে ধাতুযো’’.

তত্থ কতমানি অপৰিযাপন্নে দ্ৱে সচ্চানি? মগ্গসচ্চং, নিৰোধসচ্চং – ইমানি ৱুচ্চন্তি ‘‘অপৰিযাপন্নে দ্ৱে সচ্চানি’’.

তত্থ কতমানি অপৰিযাপন্নে দ্ৱাদসিন্দ্ৰিযানি? মনিন্দ্ৰিযং, জীৱিতিন্দ্ৰিযং, সোমনস্সিন্দ্ৰিযং, উপেক্খিন্দ্ৰিযং, সদ্ধিন্দ্ৰিযং, ৱীৰিযিন্দ্ৰিযং, সতিন্দ্ৰিযং, সমাধিন্দ্ৰিযং, পঞ্ঞিন্দ্ৰিযং, অনঞ্ঞাতঞ্ঞস্সামীতিন্দ্ৰিযং, অঞ্ঞিন্দ্ৰিযং, অঞ্ঞাতাৱিন্দ্ৰিযং – ইমানি ৱুচ্চন্তি ‘‘অপৰিযাপন্নে দ্ৱাদসিন্দ্ৰিযানি’’.

তত্থ কতমে অপৰিযাপন্নে ছ হেতূ? তযো কুসলহেতূ, তযো অব্যাকতহেতূ.

তত্থ কতমে তযো কুসলহেতূ? অলোভো কুসলহেতু, অদোসো কুসলহেতু, অমোহো কুসলহেতু – ইমে তযো কুসলহেতূ.

তত্থ কতমে তযো অব্যাকতহেতূ? কুসলানং ধম্মানং ৱিপাকতো অলোভো, অদোসো, অমোহো – ইমে তযো অব্যাকতহেতূ. ইমে ৱুচ্চন্তি ‘‘অপৰিযাপন্নে ছ হেতূ’’.

তত্থ কতমে অপৰিযাপন্নে তযো আহাৰা? ফস্সাহাৰো, মনোসঞ্চেতনাহাৰো, ৱিঞ্ঞাণাহাৰো – ইমে ৱুচ্চন্তি ‘‘অপৰিযাপন্নে তযো আহাৰা’’.

তত্থ কতমো অপৰিযাপন্নে একো ফস্সো? মনোৱিঞ্ঞাণধাতুসম্ফস্সো – অযং ৱুচ্চতি ‘‘অপৰিযাপন্নে একো ফস্সো’’.

তত্থ কতমা অপৰিযাপন্নে একা ৱেদনা…পে… একা সঞ্ঞা…পে… একা চেতনা…পে… একং চিত্তং? মনোৱিঞ্ঞাণধাতু – ইদং ৱুচ্চতি ‘‘অপৰিযাপন্নে একং চিত্তং’’.