১. সব্বসঙ্গাহিকৱাৰো

৯৭৮. কতি খন্ধা, কতি আযতনানি, কতি ধাতুযো, কতি সচ্চানি, কতি ইন্দ্ৰিযানি, কতি হেতূ, কতি আহাৰা, কতি ফস্সা, কতি ৱেদনা, কতি সঞ্ঞা, কতি চেতনা, কতি চিত্তানি?

পঞ্চক্খন্ধা, দ্ৱাদসাযতনানি, অট্ঠাৰস ধাতুযো, চত্তাৰি সচ্চানি, বাৱীসতিন্দ্ৰিযানি, নৱ হেতূ, চত্তাৰো আহাৰা, সত্ত ফস্সা, সত্ত ৱেদনা, সত্ত সঞ্ঞা, সত্ত চেতনা, সত্ত চিত্তানি.

৯৭৯. তত্থ কতমে পঞ্চক্খন্ধা? ৰূপক্খন্ধো, ৱেদনাক্খন্ধো, সঞ্ঞাক্খন্ধো, সঙ্খাৰক্খন্ধো, ৱিঞ্ঞাণক্খন্ধো – ইমে ৱুচ্চন্তি ‘‘পঞ্চক্খন্ধা’’.

৯৮০. তত্থ কতমানি দ্ৱাদসাযতনানি? চক্খাযতনং, ৰূপাযতনং, সোতাযতনং, সদ্দাযতনং, ঘানাযতনং, গন্ধাযতনং, জিৱ্হাযতনং, ৰসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং – ইমানি ৱুচ্চন্তি ‘‘দ্ৱাদসাযতনানি’’.

৯৮১. তত্থ কতমা অট্ঠাৰস ধাতুযো? চক্খুধাতু, ৰূপধাতু, চক্খুৱিঞ্ঞাণধাতু, সোতধাতু, সদ্দধাতু, সোতৱিঞ্ঞাণধাতু, ঘানধাতু, গন্ধধাতু, ঘানৱিঞ্ঞাণধাতু, জিৱ্হাধাতু, ৰসধাতু, জিৱ্হাৱিঞ্ঞাণধাতু, কাযধাতু, ফোট্ঠব্বধাতু, কাযৱিঞ্ঞাণধাতু, মনোধাতু, ধম্মধাতু, মনোৱিঞ্ঞাণধাতু – ইমা ৱুচ্চন্তি ‘‘অট্ঠাৰস ধাতুযো’’.

৯৮২. তত্থ কতমানি চত্তাৰি সচ্চানি? দুক্খসচ্চং, সমুদযসচ্চং, নিৰোধসচ্চং, মগ্গসচ্চং – ইমানি ৱুচ্চন্তি ‘‘চত্তাৰি সচ্চানি’’.

৯৮৩. তত্থ কতমানি বাৱীসতিন্দ্ৰিযানি? চক্খুন্দ্ৰিযং, সোতিন্দ্ৰিযং, ঘানিন্দ্ৰিযং, জিৱ্হিন্দ্ৰিযং, কাযিন্দ্ৰিযং, মনিন্দ্ৰিযং, ইত্থিন্দ্ৰিযং, পুৰিসিন্দ্ৰিযং, জীৱিতিন্দ্ৰিযং, সুখিন্দ্ৰিযং, দুক্খিন্দ্ৰিযং, সোমনস্সিন্দ্ৰিযং, দোমনস্সিন্দ্ৰিযং, উপেক্খিন্দ্ৰিযং, সদ্ধিন্দ্ৰিযং, ৱীৰিযিন্দ্ৰিযং, সতিন্দ্ৰিযং, সমাধিন্দ্ৰিযং, পঞ্ঞিন্দ্ৰিযং, অনঞ্ঞাতঞ্ঞস্সামীতিন্দ্ৰিযং, অঞ্ঞিন্দ্ৰিযং, অঞ্ঞাতাৱিন্দ্ৰিযং – ইমানি ৱুচ্চন্তি ‘‘বাৱীসতিন্দ্ৰিযানি’’.

৯৮৪. তত্থ কতমে নৱ হেতূ? তযো কুসলহেতূ, তযো অকুসলহেতূ, তযো অব্যাকতহেতূ.

তত্থ কতমে তযো কুসলহেতূ? অলোভো কুসলহেতু, অদোসো কুসলহেতু, অমোহো কুসলহেতু – ইমে তযো কুসলহেতূ.

তত্থ কতমে তযো অকুসলহেতূ? লোভো অকুসলহেতু, দোসো অকুসলহেতু, মোহো অকুসলহেতু – ইমে তযো অকুসলহেতূ.

তত্থ কতমে তযো অব্যাকতহেতূ? কুসলানং ৱা ধম্মানং ৱিপাকতো কিৰিযাব্যাকতেসু ৱা ধম্মেসু অলোভো, অদোসো, অমোহো – ইমে তযো অব্যাকতহেতূ. ইমে ৱুচ্চন্তি ‘‘নৱ হেতূ’’.

৯৮৫. তত্থ কতমে চত্তাৰো আহাৰা? কবড়ীকাৰাহাৰো [কবড়িংকাৰো আহাৰো (সী. স্যা.)], ফস্সাহাৰো, মনোসঞ্চেতনাহাৰো, ৱিঞ্ঞাণাহাৰো – ইমে ৱুচ্চন্তি ‘‘চত্তাৰো আহাৰা’’.

৯৮৬. তত্থ কতমে সত্ত ফস্সা? চক্খুসম্ফস্সো, সোতসম্ফস্সো, ঘানসম্ফস্সো, জিৱ্হাসম্ফস্সো, কাযসম্ফস্সো, মনোধাতুসম্ফস্সো, মনোৱিঞ্ঞাণধাতুসম্ফস্সো – ইমে ৱুচ্চন্তি ‘‘সত্ত ফস্সা’’.

৯৮৭. তত্থ কতমা সত্ত ৱেদনা? চক্খুসম্ফস্সজা ৱেদনা, সোতসম্ফস্সজা ৱেদনা, ঘানসম্ফস্সজা ৱেদনা, জিৱ্হাসম্ফস্সজা ৱেদনা, কাযসম্ফস্সজা ৱেদনা, মনোধাতুসম্ফস্সজা ৱেদনা, মনোৱিঞ্ঞাণধাতুসম্ফস্সজা ৱেদনা – ইমা ৱুচ্চন্তি ‘‘সত্ত ৱেদনা’’.

৯৮৮. তত্থ কতমা সত্ত সঞ্ঞা? চক্খুসম্ফস্সজা সঞ্ঞা, সোতসম্ফস্সজা সঞ্ঞা, ঘানসম্ফস্সজা সঞ্ঞা, জিৱ্হাসম্ফস্সজা সঞ্ঞা, কাযসম্ফস্সজা সঞ্ঞা, মনোধাতুসম্ফস্সজা সঞ্ঞা, মনোৱিঞ্ঞাণধাতুসম্ফস্সজা সঞ্ঞা – ইমা ৱুচ্চন্তি ‘‘সত্ত সঞ্ঞা’’.

৯৮৯. তত্থ কতমা সত্ত চেতনা? চক্খুসম্ফস্সজা চেতনা, সোতসম্ফস্সজা চেতনা, ঘানসম্ফস্সজা চেতনা, জিৱ্হাসম্ফস্সজা চেতনা, কাযসম্ফস্সজা চেতনা, মনোধাতুসম্ফস্সজা চেতনা, মনোৱিঞ্ঞাণধাতুসম্ফস্সজা চেতনা – ইমা ৱুচ্চন্তি ‘‘সত্ত চেতনা’’.

৯৯০. তত্থ কতমানি সত্ত চিত্তানি? চক্খুৱিঞ্ঞাণং, সোতৱিঞ্ঞাণং, ঘানৱিঞ্ঞাণং, জিৱ্হাৱিঞ্ঞাণং, কাযৱিঞ্ঞাণং, মনোধাতু, মনোৱিঞ্ঞাণধাতু – ইমানি ৱুচ্চন্তি ‘‘সত্ত চিত্তানি’’.