(৭) তীণি সংযোজনানি

৯১৫. তত্থ কতমানি তীণি সংযোজনানি? সক্কাযদিট্ঠি, ৱিচিকিচ্ছা, সীলব্বতপৰামাসো.

(ক) তত্থ কতমা সক্কাযদিট্ঠি? ইধ অস্সুতৱা পুথুজ্জনো অৰিযানং অদস্সাৱী অৰিযধম্মস্স অকোৱিদো অৰিযধম্মে অৱিনীতো, সপ্পুৰিসানং অদস্সাৱী সপ্পুৰিসধম্মস্স অকোৱিদো সপ্পুৰিসধম্মে অৱিনীতো – ৰূপং অত্ততো সমনুপস্সতি ৰূপৱন্তং ৱা অত্তানং অত্তনি ৱা ৰূপং ৰূপস্মিং ৱা অত্তানং. ৱেদনং…পে… সঞ্ঞং…পে… সঙ্খাৰে…পে… ৱিঞ্ঞাণং অত্ততো সমনুপস্সতি ৱিঞ্ঞাণৱন্তং ৱা অত্তানং অত্তনি ৱা ৱিঞ্ঞাণং ৱিঞ্ঞাণস্মিং ৱা অত্তানং. যা এৱৰূপা দিট্ঠি দিট্ঠিগতং…পে… ৱিপৰিযাসগ্গাহো – অযং ৱুচ্চতি ‘‘সক্কাযদিট্ঠি’’.

(খ) তত্থ কতমা ৱিচিকিচ্ছা? সত্থৰি কঙ্খতি ৱিচিকিচ্ছতি, ধম্মে কঙ্খতি ৱিচিকিচ্ছতি, সঙ্ঘে কঙ্খতি ৱিচিকিচ্ছতি, সিক্খায কঙ্খতি ৱিচিকিচ্ছতি, পুব্বন্তে কঙ্খতি ৱিচিকিচ্ছতি, অপৰন্তে কঙ্খতি ৱিচিকিচ্ছতি, পুব্বন্তাপৰন্তে কঙ্খতি ৱিচিকিচ্ছতি, ইদপ্পচ্চযতাপটিচ্চসমুপ্পন্নেসু ধম্মেসু কঙ্খতি ৱিচিকিচ্ছতি. যা এৱৰূপা কঙ্খা কঙ্খাযনা কঙ্খাযিতত্তং থম্ভিতত্তং চিত্তস্স মনোৱিলেখো – অযং ৱুচ্চতি ‘‘ৱিচিকিচ্ছা’’.

(গ) তত্থ কতমো সীলব্বতপৰামাসো? ‘‘ইতো বহিদ্ধা সমণব্ৰাহ্মণানং সীলেন সুদ্ধি ৱতেন সুদ্ধি সীলব্বতেন সুদ্ধী’’তি – যা এৱৰূপা দিট্ঠি দিট্ঠিগতং…পে… ৱিপৰিযাসগ্গাহো – অযং ৱুচ্চতি ‘‘সীলব্বতপৰামাসো’’. ইমানি তীণি সংযোজনানি.