(৪) তিস্সো অকুসলধাতুযো

৯১২. তত্থ কতমা তিস্সো অকুসলধাতুযো? কামধাতু, ব্যাপাদধাতু, ৱিহিংসাধাতু.

তত্থ কতমা কামধাতু? কামৱিতক্কো কামধাতু. ব্যাপাদৱিতক্কো ব্যাপাদধাতু. ৱিহিংসাৱিতক্কো ৱিহিংসাধাতু.

(ক) তত্থ কতমো কামৱিতক্কো? কামপটিসংযুত্তো তক্কো ৱিতক্কো মিচ্ছাসঙ্কপ্পো – অযং ৱুচ্চতি ‘‘কামৱিতক্কো’’.

(খ) তত্থ কতমো ব্যাপাদৱিতক্কো? ব্যাপাদপটিসংযুত্তো তক্কো ৱিতক্কো মিচ্ছাসঙ্কপ্পো – অযং ৱুচ্চতি ‘‘ব্যাপাদৱিতক্কো’’.

(গ) তত্থ কতমো ৱিহিংসাৱিতক্কো? ৱিহিংসাপটিসংযুত্তো তক্কো ৱিতক্কো মিচ্ছাসঙ্কপ্পো – অযং ৱুচ্চতি ‘‘ৱিহিংসাৱিতক্কো’’. ইমা তিস্সো অকুসলধাতুযো.