(২৪. ক) অস্সাদদিট্ঠি

৯২৫. তত্থ কতমা অস্সাদদিট্ঠি? ইধেকচ্চো সমণো ৱা ব্ৰাহ্মণো ৱা এৱংৱাদী হোতি এৱংদিট্ঠী – ‘‘নত্থি কামেসু দোসো’’তি. সো কামেসু পাতব্যতং আপজ্জতি. অযং ৱুচ্চতি ‘‘অস্সাদদিট্ঠি’’.

(খ) অত্তানুদিট্ঠি

তত্থ কতমা অত্তানুদিট্ঠি? ইধ অস্সুতৱা পুথুজ্জনো অৰিযানং অদস্সাৱী অৰিযধম্মস্স অকোৱিদো অৰিযধম্মে অৱিনীতো, সপ্পুৰিসানং অদস্সাৱী সপ্পুৰিসধম্মস্স অকোৱিদো সপ্পুৰিসধম্মে অৱিনীতো – ৰূপং অত্ততো সমনুপস্সতি ৰূপৱন্তং ৱা অত্তানং অত্তনি ৱা ৰূপং ৰূপস্মিং ৱা অত্তানং. ৱেদনং…পে… সঞ্ঞং…পে… সঙ্খাৰে…পে… ৱিঞ্ঞাণং অত্ততো সমনুপস্সতি ৱিঞ্ঞাণৱন্তং ৱা অত্তানং অত্তনি ৱা ৱিঞ্ঞাণং ৱিঞ্ঞাণস্মিং ৱা অত্তানং. যা এৱৰূপা দিট্ঠি দিট্ঠিগতং…পে… ৱিপৰিযাসগ্গাহো – অযং ৱুচ্চতি ‘‘অত্তানুদিট্ঠি’’.

(গ) মিচ্ছাদিট্ঠি

তত্থ কতমা মিচ্ছাদিট্ঠি? ‘‘নত্থি দিন্নং, নত্থি যিট্ঠং…পে… যে ইমঞ্চ লোকং পৰঞ্চ লোকং সযং অভিঞ্ঞা সচ্ছিকত্ৱা পৱেদেন্তী’’তি – যা এৱৰূপা দিট্ঠি দিট্ঠিগতং…পে… ৱিপৰিযাসগ্গাহো – অযং ৱুচ্চতি ‘‘মিচ্ছাদিট্ঠি’’. সস্সতদিট্ঠি অস্সাদদিট্ঠি, সক্কাযদিট্ঠি অত্তানুদিট্ঠি, উচ্ছেদদিট্ঠি মিচ্ছাদিট্ঠি.