(১১) তিস্সো এসনা

৯১৯. তত্থ কতমা তিস্সো এসনা? কামেসনা, ভৱেসনা, ব্ৰহ্মচৰিযেসনা.

(ক) তত্থ কতমা কামেসনা? যো কামেসু কামচ্ছন্দো…পে… কামজ্ঝোসানং – অযং ৱুচ্চতি ‘‘কামেসনা’’.

(খ) তত্থ কতমা ভৱেসনা? যো ভৱেসু ভৱচ্ছন্দো…পে… ভৱজ্ঝোসানং – অযং ৱুচ্চতি ‘‘ভৱেসনা’’.

(গ) তত্থ কতমা ব্ৰহ্মচৰিযেসনা? ‘‘সস্সতো লোকো’’তি ৱা, ‘‘অসস্সতো লোকো’’তি – ৱা…পে… ‘‘নেৱ হোতি ন ন হোতি তথাগতো পৰং মৰণা’’তি ৱা যা এৱৰূপা দিট্ঠি দিট্ঠিগতং…পে… ৱিপৰিযাসগ্গাহো – অযং ৱুচ্চতি ‘‘ব্ৰহ্মচৰিযেসনা’’.

(ক) তত্থ কতমা কামেসনা, কামৰাগো, তদেকট্ঠং অকুসলং কাযকম্মং ৱচীকম্মং মনোকম্মং – অযং ৱুচ্চতি ‘‘কামেসনা’’.

(খ) তত্থ কতমা ভৱেসনা, ভৱৰাগো তদেকট্ঠং অকুসলং কাযকম্মং ৱচীকম্মং মনোকম্মং – অযং ৱুচ্চতি ‘‘ভৱেসনা’’.

(গ) তত্থ কতমা ব্ৰহ্মচৰিযেসনা, অন্তগ্গাহিকা দিট্ঠি তদেকট্ঠং অকুসলং কাযকম্মং ৱচীকম্মং মনোকম্মং – অযং ৱুচ্চতি ‘‘ব্ৰহ্মচৰিযেসনা’’. ইমা তিস্সো এসনা.