১১. তণ্হাৱিচৰিতনিদ্দেসো

(১) অজ্ঝত্তিকস্স উপাদায

৯৭৩. তত্থ কতমানি অট্ঠাৰস তণ্হাৱিচৰিতানি অজ্ঝত্তিকস্স উপাদায? অস্মীতি হোতি, ইত্থস্মীতি হোতি, এৱস্মীতি হোতি, অঞ্ঞথাস্মীতি হোতি, ভৱিস্সন্তি হোতি, ইত্থং ভৱিস্সন্তি হোতি, এৱং ভৱিস্সন্তি হোতি, অঞ্ঞথা ভৱিস্সন্তি হোতি, অসস্মীতি হোতি, সাতস্মীতি হোতি, সিযন্তি হোতি, ইত্থং সিযন্তি হোতি, এৱং সিযন্তি হোতি, অঞ্ঞথা সিযন্তি হোতি, অপাহং সিযন্তি হোতি, অপাহং ইত্থং সিযন্তি হোতি, অপাহং এৱং সিযন্তি হোতি, অপাহং অঞ্ঞথা সিযন্তি হোতি.

৯৭৪. কথঞ্চ অস্মীতি হোতি? কঞ্চি ধম্মং অনৱকাৰিং [অনৱকাৰী (সী. ক.)] কৰিত্ৱা ৰূপং…পে… ৱেদনং… সঞ্ঞং… সঙ্খাৰে… ৱিঞ্ঞাণং অস্মীতি ছন্দং পটিলভতি, অস্মীতি মানং পটিলভতি, অস্মীতি দিট্ঠিং পটিলভতি. তস্মিং সতি ইমানি পপঞ্চিতানি হোন্তি – ইত্থস্মীতি ৱা এৱস্মীতি ৱা অঞ্ঞথাস্মীতি ৱা.

(২) কথঞ্চ ইত্থস্মীতি হোতি? খত্তিযোস্মীতি ৱা, ব্ৰাহ্মণোস্মীতি ৱা, ৱেস্সোস্মীতি ৱা, সুদ্দোস্মীতি ৱা, গহট্ঠোস্মীতি ৱা, পব্বজিতোস্মীতি ৱা, দেৱোস্মীতি ৱা, মনুস্সোস্মীতি ৱা, ৰূপীস্মীতি ৱা, অৰূপীস্মীতি ৱা, সঞ্ঞীস্মীতি ৱা, অসঞ্ঞীস্মীতি ৱা, নেৱসঞ্ঞীনাসঞ্ঞীস্মীতি ৱা – এৱং ইত্থস্মীতি হোতি.

(৩) কথঞ্চ এৱস্মীতি হোতি? পৰপুগ্গলং [পৰং পুগ্গলং (স্যা.)] উপনিধায যথা সো খত্তিযো তথাহং খত্তিযোস্মীতি ৱা, যথা সো ব্ৰাহ্মণো তথাহং ব্ৰাহ্মণোস্মীতি ৱা, যথা সো ৱেস্সো তথাহং ৱেস্সোস্মীতি ৱা যথা সো সুদ্দো তথাহং সুদ্দোস্মীতি ৱা, যথা সো গহট্ঠো তথাহং গহট্ঠোস্মীতি ৱা, যথা সো পব্বজিতো তথাহং পব্বজিতোস্মীতি ৱা, যথা সো দেৱো তথাহং দেৱোস্মীতি ৱা, যথা সো মনুস্সো তথাহং মনুস্সোস্মীতি ৱা, যথা সো ৰূপী তথাহং ৰূপীস্মীতি ৱা, যথা সো অৰূপী তথাহং অৰূপীস্মীতি ৱা, যথা সো সঞ্ঞী তথাহং সঞ্ঞীস্মীতি ৱা, যথা সো অসঞ্ঞী তথাহং অসঞ্ঞীস্মীতি ৱা, যথা সো নেৱসঞ্ঞীনাসঞ্ঞী তথাহং নেৱসঞ্ঞীনাসঞ্ঞীস্মীতি ৱা – এৱং এৱস্মীতি হোতি.

(৪) কথঞ্চ অঞ্ঞথাস্মীতি হোতি? পৰপুগ্গলং উপনিধায যথা সো খত্তিযো নাহং তথা খত্তিযোস্মীতি ৱা যথা সো ব্ৰাহ্মণো নাহং তথা ব্ৰাহ্মণোস্মীতি ৱা, যথা সো ৱেস্সো নাহং তথা ৱেস্সোস্মীতি ৱা, যথা সো সুদ্দো নাহং তথা সুদ্দোস্মীতি ৱা, যথা সো গহট্ঠো নাহং তথা গহট্ঠোস্মীতি ৱা, যথা সো পব্বজিতো নাহং তথা পব্বজিতোস্মীতি ৱা, যথা সো দেৱো নাহং তথা দেৱোস্মীতি ৱা, যথা সো মনুস্সো নাহং তথা মনুস্সোস্মীতি ৱা, যথা সো ৰূপী নাহং তথা ৰূপীস্মীতি ৱা, যথা সো অৰূপী নাহং তথা অৰূপীস্মীতি ৱা, যথা সো সঞ্ঞী নাহং তথা সঞ্ঞীস্মীতি ৱা, যথা সো অসঞ্ঞী নাহং তথা অসঞ্ঞীস্মীতি ৱা, যথা সো নেৱসঞ্ঞীনাসঞ্ঞী নাহং তথা নেৱসঞ্ঞীনাসঞ্ঞীস্মীতি ৱা – এৱং অঞ্ঞথাস্মীতি হোতি.

(৫) কথঞ্চ ভৱিস্সন্তি হোতি? কঞ্চি ধম্মং অনৱকাৰিং কৰিত্ৱা ৰূপং…পে… ৱেদনং… সঞ্ঞং… সঙ্খাৰে… ৱিঞ্ঞাণং ভৱিস্সন্তি ছন্দং পটিলভতি, ভৱিস্সন্তি মানং পটিলভতি, ভৱিস্সন্তি দিট্ঠিং পটিলভতি. তস্মিং সতি ইমানি পপঞ্চিতানি হোন্তি – ইত্থং ভৱিস্সন্তি ৱা, এৱং ভৱিস্সন্তি ৱা, অঞ্ঞথা ভৱিস্সন্তি ৱা.

(৬) কথঞ্চ ইত্থং ভৱিস্সন্তি হোতি? খত্তিযো ভৱিস্সন্তি ৱা, ব্ৰাহ্মণো ভৱিস্সন্তি ৱা, ৱেস্সো ভৱিস্সন্তি ৱা, সুদ্দো ভৱিস্সন্তি ৱা, গহট্ঠো ভৱিস্সন্তি ৱা, পব্বজিতো ভৱিস্সন্তি ৱা, দেৱো ভৱিস্সন্তি ৱা, মনুস্সো ভৱিস্সন্তি ৱা, ৰূপী ভৱিস্সন্তি ৱা, অৰূপী ভৱিস্সন্তি ৱা, সঞ্ঞী ভৱিস্সন্তি ৱা, অসঞ্ঞী ভৱিস্সন্তি ৱা, নেৱসঞ্ঞীনাসঞ্ঞী ভৱিস্সন্তি ৱা – এৱং ইত্থং ভৱিস্সন্তি হোতি.

(৭) কথঞ্চ এৱং ভৱিস্সন্তি হোতি? পৰপুগ্গলং উপনিধায যথা সো খত্তিযো তথাহং খত্তিযো ভৱিস্সন্তি ৱা, যথা সো ব্ৰাহ্মণো তথাহং ব্ৰাহ্মণো ভৱিস্সন্তি ৱা…পে… যথা সো নেৱসঞ্ঞীনাসঞ্ঞী তথাহং নেৱসঞ্ঞীনাসঞ্ঞী ভৱিস্সন্তি ৱা – এৱং ভৱিস্সন্তি হোতি.

(৮) কথঞ্চ অঞ্ঞথা ভৱিস্সন্তি হোতি? পৰপুগ্গলং উপনিধায যথা সো খত্তিযো নাহং তথা খত্তিযো ভৱিস্সন্তি ৱা, যথা সো ব্ৰাহ্মণো নাহং তথা ব্ৰাহ্মণো ভৱিস্সন্তি ৱা…পে… যথা সো নেৱসঞ্ঞীনাসঞ্ঞী নাহং তথা নেৱসঞ্ঞীনাসঞ্ঞী ভৱিস্সন্তি ৱা – এৱং অঞ্ঞথা ভৱিস্সন্তি হোতি.

(৯) কথঞ্চ অসস্মীতি হোতি? কঞ্চি ধম্মং অনৱকাৰিং কৰিত্ৱা ৰূপং…পে… ৱেদনং… সঞ্ঞং… সঙ্খাৰে… ৱিঞ্ঞাণং নিচ্চোস্মি ধুৱোস্মি সস্সতোস্মি অৱিপৰিণামধম্মোস্মীতি – এৱং অসস্মীতি হোতি.

(১০) কথঞ্চ সাতস্মীতি হোতি? কঞ্চি ধম্মং অনৱকাৰিং কৰিত্ৱা ৰূপং…পে… ৱেদনং… সঞ্ঞং… সঙ্খাৰে… ৱিঞ্ঞাণং উচ্ছিজ্জিস্সামি ৱিনস্সিস্সামি ন ভৱিস্সামীতি – এৱং সাতস্মীতি হোতি.

(১১) কথঞ্চ সিযন্তি হোতি? কঞ্চি ধম্মং অনৱকাৰিং কৰিত্ৱা ৰূপং…পে… ৱেদনং… সঞ্ঞং… সঙ্খাৰে… ৱিঞ্ঞাণং সিযন্তি ছন্দং পটিলভতি, সিযন্তি মানং পটিলভতি, সিযন্তি দিট্ঠিং পটিলভতি. তস্মিং সতি ইমানি পপঞ্চিতানি হোন্তি – ইত্থং সিযন্তি ৱা, এৱং সিযন্তি ৱা, অঞ্ঞথা সিযন্তি ৱা.

(১২) কথঞ্চ ইত্থং সিযন্তি হোতি? খত্তিযো সিযন্তি ৱা, ব্ৰাহ্মণো সিযন্তি ৱা, ৱেস্সো সিযন্তি ৱা, সুদ্দো সিযন্তি ৱা, গহট্ঠো সিযন্তি ৱা, পব্বজিতো সিযন্তি ৱা, দেৱো সিযন্তি ৱা, মনুস্সো সিযন্তি ৱা, ৰূপী সিযন্তি ৱা, অৰূপী সিযন্তি ৱা, সঞ্ঞী সিযন্তি ৱা, অসঞ্ঞী সিযন্তি ৱা, নেৱসঞ্ঞীনাসঞ্ঞী সিযন্তি ৱা – এৱং ইত্থং সিযন্তি হোতি.

(১৩) কথঞ্চ এৱং সিযন্তি হোতি? পৰপুগ্গলং উপনিধায যথা সো খত্তিযো তথাহং খত্তিযো সিযন্তি ৱা, যথা সো ব্ৰাহ্মণো তথাহং ব্ৰাহ্মণো সিযন্তি ৱা…পে… যথা সো নেৱসঞ্ঞীনাসঞ্ঞী তথাহং নেৱসঞ্ঞীনাসঞ্ঞী সিযন্তি ৱা – এৱং এৱং সিযন্তি হোতি.

(১৪) কথঞ্চ অঞ্ঞথা সিযন্তি হোতি? পৰপুগ্গলং উপনিধায যথা সো খত্তিযো নাহং তথা খত্তিযো সিযন্তি ৱা, যথা সো ব্ৰাহ্মণো নাহং তথা ব্ৰাহ্মণো সিযন্তি ৱা…পে… যথা সো নেৱসঞ্ঞীনাসঞ্ঞী নাহং তথা নেৱসঞ্ঞীনাসঞ্ঞী সিযন্তি ৱা – এৱং অঞ্ঞথা সিযন্তি হোতি.

(১৫) কথঞ্চ অপাহং সিযন্তি হোতি? কঞ্চি ধম্মং অনৱকাৰিং কৰিত্ৱা ৰূপং… ৱেদনং… সঞ্ঞং… সঙ্খাৰে… ৱিঞ্ঞাণং অপাহং সিযন্তি ছন্দং পটিলভতি, অপাহং সিযন্তি মানং পটিলভতি, অপাহং সিযন্তি দিট্ঠিং পটিলভতি. তস্মিং সতি ইমানি পপঞ্চিতানি হোন্তি – অপাহং ইত্থং সিযন্তি ৱা, অপাহং এৱং সিযন্তি ৱা, অপাহং অঞ্ঞথা সিযন্তি ৱা.

(১৬) কথঞ্চ অপাহং ইত্থং সিযন্তি হোতি? অপাহং খত্তিযো সিযন্তি ৱা, অপাহং ব্ৰাহ্মণো সিযন্তি ৱা, অপাহং ৱেস্সো সিযন্তি ৱা, অপাহং সুদ্দো সিযন্তি ৱা, অপাহং গহট্ঠো সিযন্তি ৱা, অপাহং পব্বজিতো সিযন্তি ৱা, অপাহং দেৱো সিযন্তি ৱা, অপাহং মনুস্সো সিযন্তি ৱা, অপাহং ৰূপী সিযন্তি ৱা, অপাহং অৰূপী সিযন্তি ৱা, অপাহং সঞ্ঞী সিযন্তি ৱা, অপাহং অসঞ্ঞী সিযন্তি ৱা, অপাহং নেৱসঞ্ঞীনাসঞ্ঞী সিযন্তি ৱা – এৱং অপাহং ইত্থং সিযন্তি হোতি. (১৭) কথঞ্চ অপাহং এৱং সিযন্তি হোতি? পৰপুগ্গলং উপনিধায যথা সো খত্তিযো অপাহং তথা খত্তিযো সিযন্তি ৱা, যথা সো ব্ৰাহ্মণো অপাহং তথা ব্ৰাহ্মণো সিযন্তি ৱা…পে… যথা সো নেৱসঞ্ঞীনাসঞ্ঞী অপাহং তথা নেৱসঞ্ঞীনাসঞ্ঞী সিযন্তি ৱা – এৱং অপাহং এৱং সিযন্তি হোতি.

(১৮) কথঞ্চ অপাহং অঞ্ঞথা সিযন্তি হোতি? পৰপুগ্গলং উপনিধায যথা সো খত্তিযো অপাহং ন তথা খত্তিযো সিযন্তি ৱা, যথা সো ব্ৰাহ্মণো অপাহং ন তথা ব্ৰাহ্মণো সিযন্তি ৱা…পে… যথা সো নেৱসঞ্ঞীনাসঞ্ঞী অপাহং ন তথা নেৱসঞ্ঞীনাসঞ্ঞী সিযন্তি ৱা – এৱং অপাহং অঞ্ঞথা সিযন্তি হোতি.

ইমানি অট্ঠাৰস তণ্হাৱিচৰিতানি অজ্ঝত্তিকস্স উপাদায.

(২) বাহিৰস্স উপাদায

৯৭৫. তত্থ কতমানি অট্ঠাৰস তণ্হাৱিচৰিতানি বাহিৰস্স উপাদায? ইমিনা অস্মীতি হোতি, ইমিনা ইত্থস্মীতি হোতি, ইমিনা এৱস্মীতি হোতি, ইমিনা অঞ্ঞথাস্মীতি হোতি, ইমিনা ভৱিস্সন্তি হোতি, ইমিনা ইত্থং ভৱিস্সন্তি হোতি, ইমিনা এৱং ভৱিস্সন্তি হোতি, ইমিনা অঞ্ঞথা ভৱিস্সন্তি হোতি, ইমিনা অসস্মীতি হোতি, ইমিনা সাতস্মীতি হোতি, ইমিনা সিযন্তি হোতি, ইমিনা ইত্থং সিযন্তি হোতি, ইমিনা এৱং সিযন্তি হোতি, ইমিনা অঞ্ঞথা সিযন্তি হোতি, ইমিনা অপাহং সিযন্তি হোতি, ইমিনা অপাহং ইত্থং সিযন্তি হোতি, ইমিনা অপাহং এৱং সিযন্তি হোতি, ইমিনা অপাহং অঞ্ঞথা সিযন্তি হোতি.

৯৭৬. (১) কথঞ্চ ইমিনা অস্মীতি হোতি? কঞ্চি ধম্মং অৱকাৰিং কৰিত্ৱা ৰূপং… ৱেদনং… সঞ্ঞং… সঙ্খাৰে… ৱিঞ্ঞাণং ইমিনা অস্মীতি ছন্দং পটিলভতি, ইমিনা অস্মীতি মানং পটিলভতি, ইমিনা অস্মীতি দিট্ঠিং পটিলভতি. তস্মিং সতি ইমানি পপঞ্চিতানি হোন্তি – ইমিনা ইত্থস্মীতি ৱা, ইমিনা এৱস্মীতি ৱা, ইমিনা অঞ্ঞথাস্মীতি ৱা.

(২) কথঞ্চ ইমিনা ইত্থস্মীতি হোতি? ইমিনা খত্তিযোস্মীতি ৱা, ইমিনা ব্ৰাহ্মণোস্মীতি ৱা, ইমিনা ৱেস্সোস্মীতি ৱা, ইমিনা সুদ্দোস্মীতি ৱা, ইমিনা গহট্ঠোস্মীতি ৱা, ইমিনা পব্বজিতোস্মীতি ৱা, ইমিনা দেৱোস্মীতি ৱা, ইমিনা মনুস্সোস্মীতি ৱা, ইমিনা ৰূপীস্মীতি ৱা, ইমিনা অৰূপীস্মীতি ৱা, ইমিনা সঞ্ঞীস্মীতি ৱা, ইমিনা অসঞ্ঞীস্মীতি ৱা, ইমিনা নেৱসঞ্ঞীনাসঞ্ঞীস্মীতি ৱা – এৱং ইমিনা ইত্থস্মীতি হোতি.

(৩) কথঞ্চ ইমিনা এৱস্মীতি হোতি? পৰপুগ্গলং উপনিধায যথা সো খত্তিযো ইমিনা তথাহং খত্তিযোস্মীতি ৱা, যথা সো ব্ৰাহ্মণো ইমিনা তথাহং ব্ৰাহ্মণোস্মীতি ৱা…পে… যথা সো নেৱসঞ্ঞীনাসঞ্ঞী ইমিনা তথাহং নেৱসঞ্ঞীনাসঞ্ঞীস্মীতি ৱা – এৱং ইমিনা এৱস্মীতি হোতি.

(৪) কথঞ্চ ইমিনা অঞ্ঞথাস্মীতি হোতি? পৰপুগ্গলং উপনিধায যথা সো খত্তিযো ইমিনা নাহং তথা খত্তিযোস্মীতি ৱা, যথা সো ব্ৰাহ্মণো ইমিনা নাহং তথা ব্ৰাহ্মণোস্মীতি ৱা…পে… যথা সো নেৱসঞ্ঞীনাসঞ্ঞী ইমিনা নাহং তথা নেৱসঞ্ঞীনাসঞ্ঞীস্মীতি ৱা – এৱং ইমিনা অঞ্ঞথাস্মীতি হোতি.

(৫) কথঞ্চ ইমিনা ভৱিস্সন্তি হোতি? কঞ্চি ধম্মং অৱকাৰিং কৰিত্ৱা ৰূপং… ৱেদনং… সঞ্ঞং… সঙ্খাৰে… ৱিঞ্ঞাণং ইমিনা ভৱিস্সন্তি ছন্দং পটিলভতি, ইমিনা ভৱিস্সন্তি মানং পটিলভতি, ইমিনা ভৱিস্সন্তি দিট্ঠিং পটিলভতি. তস্মিং সতি ইমানি পপঞ্চিতানি হোন্তি – ইমিনা ইত্থং ভৱিস্সন্তি ৱা, ইমিনা এৱং ভৱিস্সন্তি ৱা, ইমিনা অঞ্ঞথা ভৱিস্সন্তি ৱা.

(৬) কথঞ্চ ইমিনা ইত্থং ভৱিস্সন্তি হোতি? ইমিনা খত্তিযো ভৱিস্সন্তি ৱা…পে… ইমিনা অৰূপী ভৱিস্সন্তি ৱা, ইমিনা সঞ্ঞী ভৱিস্সন্তি ৱা, ইমিনা অসঞ্ঞী ভৱিস্সন্তি ৱা, ইমিনা নেৱসঞ্ঞীনাসঞ্ঞী ভৱিস্সন্তি ৱা – এৱং ইমিনা ইত্থং ভৱিস্সন্তি হোতি.

(৭) কথঞ্চ ইমিনা এৱং ভৱিস্সন্তি হোতি? পৰপুগ্গলং উপনিধায যথা সো খত্তিযো ইমিনা তথাহং খত্তিযো ভৱিস্সন্তি ৱা, যথা সো ব্ৰাহ্মণো ইমিনা তথাহং ব্ৰাহ্মণো ভৱিস্সন্তি ৱা…পে… যথা সো নেৱসঞ্ঞীনাসঞ্ঞী ইমিনা তথাহং নেৱসঞ্ঞীনাসঞ্ঞী ভৱিস্সন্তি ৱা – এৱং ইমিনা এৱং ভৱিস্সন্তি হোতি.

(৮) কথঞ্চ ইমিনা অঞ্ঞথা ভৱিস্সন্তি হোতি? পৰপুগ্গলং উপনিধায যথা সো খত্তিযো ইমিনা নাহং তথা খত্তিযো ভৱিস্সন্তি ৱা, যথা সো ব্ৰাহ্মণো ইমিনা নাহং তথা ব্ৰাহ্মণো ভৱিস্সন্তি ৱা…পে… যথা সো নেৱসঞ্ঞীনাসঞ্ঞী ইমিনা নাহং তথা নেৱসঞ্ঞীনাসঞ্ঞী ভৱিস্সন্তি ৱা – এৱং ইমিনা অঞ্ঞথা ভৱিস্সন্তি হোতি.

(৯) কথঞ্চ ইমিনা অসস্মীতি হোতি? কঞ্চি ধম্মং অৱকাৰিং [অৱকাৰী (সী.)] কৰিত্ৱা ৰূপং…পে… ৱেদনং… সঞ্ঞং… সঙ্খাৰে… ৱিঞ্ঞাণং ইমিনা নিচ্চোস্মি ধুৱোস্মি সস্সতোস্মি অৱিপৰিণামধম্মোস্মীতি – এৱং ইমিনা অসস্মীতি হোতি.

(১০) কথঞ্চ ইমিনা সাতস্মীতি হোতি? কঞ্চি ধম্মং অৱকাৰিং কৰিত্ৱা ৰূপং…পে… ৱেদনং… সঞ্ঞং… সঙ্খাৰে… ৱিঞ্ঞাণং ইমিনা উচ্ছিজ্জিস্সামি ৱিনস্সিস্সামি ন ভৱিস্সামীতি – এৱং ইমিনা সাতস্মীতি হোতি.

(১১) কথঞ্চ ইমিনা সিযন্তি হোতি? কঞ্চি ধম্মং অৱকাৰিং কৰিত্ৱা ৰূপং…পে… ৱেদনং… সঞ্ঞং… সঙ্খাৰে… ৱিঞ্ঞাণং ইমিনা সিযন্তি ছন্দং পটিলভতি, ইমিনা সিযন্তি মানং পটিলভতি, ইমিনা সিযন্তি দিট্ঠিং পটিলভতি. তস্মিং সতি ইমানি পপঞ্চিতানি হোন্তি – ইমিনা ইত্থং সিযন্তি ৱা, ইমিনা এৱং সিযন্তি ৱা, ইমিনা অঞ্ঞথা সিযন্তি ৱা.

(১২) কথঞ্চ ইমিনা ইত্থং সিযন্তি হোতি? ইমিনা খত্তিযো সিযন্তি ৱা, ইমিনা ব্ৰাহ্মণো সিযন্তি ৱা, ইমিনা ৱেস্সো সিযন্তি ৱা, ইমিনা সুদ্দো সিযন্তি ৱা, ইমিনা গহট্ঠো সিযন্তি ৱা, ইমিনা পব্বজিতো সিযন্তি ৱা, ইমিনা দেৱো সিযন্তি ৱা, ইমিনা মনুস্সো সিযন্তি ৱা, ইমিনা ৰূপী সিযন্তি ৱা, ইমিনা অৰূপী সিযন্তি ৱা, ইমিনা সঞ্ঞী সিযন্তি ৱা, ইমিনা অসঞ্ঞী সিযন্তি ৱা, ইমিনা নেৱসঞ্ঞীনাসঞ্ঞী সিযন্তি ৱা – এৱং ইমিনা ইত্থং সিযন্তি হোতি.

(১৩) কথঞ্চ ইমিনা এৱং সিযন্তি হোতি? পৰপুগ্গলং উপনিধায যথা সো খত্তিযো ইমিনা তথাহং খত্তিযো সিযন্তি ৱা, যথা সো ব্ৰাহ্মণো ইমিনা তথাহং ব্ৰাহ্মণো সিযন্তি ৱা…পে… যথা সো নেৱসঞ্ঞীনাসঞ্ঞী ইমিনা তথাহং নেৱসঞ্ঞীনাসঞ্ঞী সিযন্তি ৱা – এৱং ইমিনা এৱং সিযন্তি হোতি.

(১৪) কথঞ্চ ইমিনা অঞ্ঞথা সিযন্তি হোতি? পৰপুগ্গলং উপনিধায যথা সো খত্তিযো ইমিনা নাহং তথা খত্তিযো সিযন্তি ৱা, যথা সো ব্ৰাহ্মণো ইমিনা নাহং তথা ব্ৰাহ্মণো সিযন্তি ৱা…পে… যথা সো নেৱসঞ্ঞীনাসঞ্ঞী ইমিনা নাহং তথা নেৱসঞ্ঞীনাসঞ্ঞী সিযন্তি ৱা – এৱং ইমিনা অঞ্ঞথা সিযন্তি হোতি.

(১৫) কথঞ্চ ইমিনা অপাহং সিযন্তি হোতি? কঞ্চি ধম্মং অৱকাৰিং কৰিত্ৱা ৰূপং…পে… ৱেদনং… সঞ্ঞং… সঙ্খাৰে… ৱিঞ্ঞাণং ইমিনা অপাহং সিযন্তি ছন্দং পটিলভতি, ইমিনা অপাহং সিযন্তি মানং পটিলভতি, ইমিনা অপাহং সিযন্তি দিট্ঠিং পটিলভতি. তস্মিং সতি ইমানি পপঞ্চিতানি হোন্তি – ইমিনা অপাহং ইত্থং সিযন্তি ৱা, ইমিনা অপাহং এৱং সিযন্তি ৱা, ইমিনা অপাহং অঞ্ঞথা সিযন্তি ৱা.

(১৬) কথঞ্চ ইমিনা অপাহং ইত্থং সিযন্তি হোতি? ইমিনা অপাহং খত্তিযো সিযন্তি ৱা, ইমিনা অপাহং ব্ৰাহ্মণো সিযন্তি ৱা, ইমিনা অপাহং ৱেস্সো সিযন্তি ৱা, ইমিনা অপাহং সুদ্দো সিযন্তি ৱা, ইমিনা অপাহং গহট্ঠো সিযন্তি ৱা, ইমিনা অপাহং পব্বজিতো সিযন্তি ৱা, ইমিনা অপাহং দেৱো সিযন্তি ৱা, ইমিনা অপাহং মনুস্সো সিযন্তি ৱা, ইমিনা অপাহং ৰূপী সিযন্তি ৱা, ইমিনা অপাহং অৰূপী সিযন্তি ৱা, ইমিনা অপাহং সঞ্ঞী সিযন্তি ৱা, ইমিনা অপাহং অসঞ্ঞী সিযন্তি ৱা, ইমিনা অপাহং নেৱসঞ্ঞীনাসঞ্ঞী সিযন্তি ৱা – এৱং ইমিনা অপাহং ইত্থং সিযন্তি হোতি.

(১৭) কথঞ্চ ইমিনা অপাহং এৱং সিযন্তি হোতি? পৰপুগ্গলং উপনিধায যথা সো খত্তিযো ইমিনা অপাহং তথা খত্তিযো সিযন্তি ৱা, যথা সো ব্ৰাহ্মণো ইমিনা অপাহং তথা ব্ৰাহ্মণো সিযন্তি ৱা…পে… যথা সো নেৱসঞ্ঞীনাসঞ্ঞী ইমিনা অপাহং তথা নেৱসঞ্ঞীনাসঞ্ঞী সিযন্তি ৱা – এৱং ইমিনা অপাহং এৱং সিযন্তি হোতি.

(১৮) কথঞ্চ ইমিনা অপাহং অঞ্ঞথা সিযন্তি হোতি? পৰপুগ্গলং উপনিধায যথা সো খত্তিযো ইমিনা অপাহং ন তথা খত্তিযো সিযন্তি ৱা, যথা সো ব্ৰাহ্মণো ইমিনা অপাহং ন তথা ব্ৰাহ্মণো সিযন্তি ৱা…পে… যথা সো নেৱসঞ্ঞীনাসঞ্ঞী ইমিনা অপাহং ন তথা নেৱসঞ্ঞীনাসঞ্ঞী সিযন্তি ৱা – এৱং ইমিনা অপাহং অঞ্ঞথা সিযন্তি হোতি.

ইমানি অট্ঠাৰস তণ্হাৱিচৰিতানি বাহিৰস্স উপাদায.

ইতি ইমানি অট্ঠাৰস তণ্হাৱিচৰিতানি অজ্ঝত্তিকস্স উপাদায, ইমানি অট্ঠাৰস তণ্হাৱিচৰিতানি বাহিৰস্স উপাদায, তদেকজ্ঝং অভিসঞ্ঞূহিত্ৱা অভিসঙ্খিপিত্ৱা ছত্তিংস তণ্হাৱিচৰিতানি হোন্তি. ইতি এৱৰূপানি অতীতানি ছত্তিংস তণ্হাৱিচৰিতানি, অনাগতানি ছত্তিংস তণ্হাৱিচৰিতানি, পচ্চুপ্পন্নানি ছত্তিংস তণ্হাৱিচৰিতানি, তদেকজ্ঝং অভিসঞ্ঞূহিত্ৱা অভিসঙ্খিপিত্ৱা অট্ঠতণ্হাৱিচৰিতসতং হোতি.

৯৭৭. তত্থ কতমানি দ্ৱাসট্ঠি দিট্ঠিগতানি ব্ৰহ্মজালে ৱেয্যাকৰণে ৱুত্তানি ভগৱতা? চত্তাৰো সস্সতৱাদা, চত্তাৰো একচ্চসস্সতিকা, চত্তাৰো অন্তানন্তিকা, চত্তাৰো অমৰাৱিক্খেপিকা, দ্ৱে অধিচ্চসমুপ্পন্নিকা, সোড়স সঞ্ঞীৱাদা, অট্ঠ অসঞ্ঞীৱাদা, অট্ঠ নেৱসঞ্ঞীনাসঞ্ঞীৱাদা, সত্ত উচ্ছেদৱাদা, পঞ্চ দিট্ঠধম্মনিব্বানৱাদা – ইমানি দ্ৱাসট্ঠি দিট্ঠিগতানি ব্ৰহ্মজালে ৱেয্যাকৰণে ৱুত্তানি ভগৱতাতি.

খুদ্দকৱত্থুৱিভঙ্গো নিট্ঠিতো.