১০. দসকনিদ্দেসো

(১) দস কিলেসৱত্থূনি

৯৬৬. তত্থ কতমানি দস কিলেসৱত্থূনি? লোভো, দোসো, মোহো, মানো, দিট্ঠি, ৱিচিকিচ্ছা, থিনং, উদ্ধচ্চং, অহিৰিকং, অনোত্তপ্পং – ইমানি দস কিলেসৱত্থূনি.

(২) দস আঘাতৱত্থূনি

৯৬৭. তত্থ কতমানি দস আঘাতৱত্থূনি? ‘‘অনত্থং মে অচৰী’’তি আঘাতো জাযতি, ‘‘অনত্থং মে চৰতী’’তি আঘাতো জাযতি, ‘‘অনত্থং মে চৰিস্সতী’’তি আঘাতো জাযতি, ‘‘পিযস্স মে মনাপস্স অনত্থং অচৰি’’…পে… অনত্থং চৰতি…পে… অনত্থং চৰিস্সতীতি আঘাতো জাযতি, অপ্পিযস্স মে অমনাপস্স অত্থং অচৰি…পে… অত্থং চৰতি…পে… অত্থং চৰিস্সতীতি আঘাতো জাযতি, অট্ঠানে ৱা পন আঘাতো জাযতি – ইমানি দস আঘাতৱত্থূনি.

(৩) দস অকুসলকম্মপথা

৯৬৮. তত্থ কতমে দস অকুসলকম্মপথা? পাণাতিপাতো, অদিন্নাদানং, কামেসুমিচ্ছাচাৰো, মুসাৱাদো, পিসুণা ৱাচা, ফৰুসা ৱাচা, সম্ফপ্পলাপো, অভিজ্ঝা, ব্যাপাদো, মিচ্ছাদিট্ঠি – ইমে দস অকুসলকম্মপথা.

(৪) দস সংযোজনানি

৯৬৯. তত্থ কতমানি দস সংযোজনানি? কামৰাগসংযোজনং, পটিঘসংযোজনং, মানসংযোজনং, দিট্ঠিসংযোজনং, ৱিচিকিচ্ছাসংযোজনং, সীলব্বতপৰামাসসংযোজনং, ভৱৰাগসংযোজনং, ইস্সাসংযোজনং, মচ্ছৰিযসংযোজনং, অৱিজ্জাসংযোজনং – ইমানি দস সংযোজনানি.

(৫) দস মিচ্ছত্তা

৯৭০. তত্থ কতমে দস মিচ্ছত্তা? মিচ্ছাদিট্ঠি, মিচ্ছাসঙ্কপ্পো, মিচ্ছাৱাচা, মিচ্ছাকম্মন্তো, মিচ্ছাআজীৱো, মিচ্ছাৱাযামো, মিচ্ছাসতি, মিচ্ছাসমাধি, মিচ্ছাঞাণং, মিচ্ছাৱিমুত্তি – ইমে দস মিচ্ছত্তা.

(৬) দসৱত্থুকা মিচ্ছাদিট্ঠি

৯৭১. তত্থ কতমা দসৱত্থুকা মিচ্ছাদিট্ঠি? নত্থি দিন্নং, নত্থি যিট্ঠং, নত্থি হুতং, নত্থি সুকতদুক্কটানং কম্মানং ফলং ৱিপাকো, নত্থি অযং লোকো, নত্থি পৰো লোকো, নত্থি মাতা, নত্থি পিতা, নত্থি সত্তা ওপপাতিকা, নত্থি লোকে সমণব্ৰাহ্মণা সম্মগ্গতা [সমগ্গতা (ক.)] সম্মা পটিপন্না যে ইমঞ্চ লোকং পৰঞ্চ লোকং সযং অভিঞ্ঞা সচ্ছিকত্ৱা পৱেদেন্তীতি – অযং দসৱত্থুকা মিচ্ছাদিট্ঠি.

(৭) দসৱত্থুকা অন্তগ্গাহিকা দিট্ঠি

৯৭২. তত্থ কতমা দসৱত্থুকা অন্তগ্গাহিকা দিট্ঠি? সস্সতো লোকোতি ৱা, অসস্সতো লোকোতি ৱা, অন্তৱা লোকোতি ৱা, অনন্তৱা লোকোতি ৱা, তং জীৱং তং সৰীৰন্তি ৱা, অঞ্ঞং জীৱং অঞ্ঞং সৰীৰন্তি ৱা, হোতি তথাগতো পৰং মৰণাতি ৱা, ন হোতি তথাগতো পৰং মৰণাতি ৱা, হোতি চ ন চ হোতি তথাগতো পৰং মৰণাতি ৱা, নেৱ হোতি ন ন হোতি তথাগতো পৰং মৰণাতি ৱা – অযং দসৱত্থুকা অন্তগ্গাহিকা দিট্ঠি.

দসকং.