৯. নৱকনিদ্দেসো

(১) নৱ আঘাতৱত্থূনি

৯৬০. তত্থ কতমানি নৱ আঘাতৱত্থূনি? ‘‘অনত্থং মে অচৰী’’তি আঘাতো জাযতি; ‘‘অনত্থং মে চৰতী’’তি আঘাতো জাযতি; ‘‘অনত্থং মে চৰিস্সতী’’তি আঘাতো জাযতি; ‘‘পিযস্স মে মনাপস্স অনত্থং অচৰি’’…পে… অনত্থং চৰতি…পে… অনত্থং চৰিস্সতীতি আঘাতো জাযতি; অপ্পিযস্স মে অমনাপস্স অত্থং অচৰি…পে… অত্থং চৰতি…পে… অত্থং চৰিস্সতীতি আঘাতো জাযতি. ইমানি নৱ আঘাতৱত্থূনি.

(২) নৱ পুৰিসমলানি

৯৬১. তত্থ কতমানি নৱ পুৰিসমলানি? কোধো, মক্খো, ইস্সা, মচ্ছৰিযং, মাযা, সাঠেয্যং, মুসাৱাদো, পাপিচ্ছতা, মিচ্ছাদিট্ঠি – ইমানি নৱ পুৰিসমলানি.

(৩) নৱৱিধা মানা

৯৬২. তত্থ কতমে নৱৱিধা মানা? ‘‘সেয্যস্স সেয্যোহমস্মী’’তি মানো, ‘‘সেয্যস্স সদিসোহমস্মী’’তি মানো, ‘‘সেয্যস্স হীনোহমস্মী’’তি মানো, ‘‘সদিসস্স সেয্যোহমস্মী’’তি মানো, ‘‘সদিসস্স সদিসোহমস্মী’’তি মানো, ‘‘সদিসস্স হীনোহমস্মী’’তি মানো, ‘‘হীনস্স সেয্যোহমস্মী’’তি মানো, ‘‘হীনস্স সদিসোহমস্মী’’তি মানো, ‘‘হীনস্স হীনোহমস্মী’’তি মানো – ইমে নৱৱিধা মানা.

(৪) নৱ তণ্হামূলকা ধম্মা

৯৬৩. তত্থ কতমে নৱ তণ্হামূলকা ধম্মা? তণ্হং পটিচ্চ পৰিযেসনা, পৰিযেসনং পটিচ্চ লাভো, লাভং পটিচ্চ ৱিনিচ্ছযো, ৱিনিচ্ছযং পটিচ্চ ছন্দৰাগো, ছন্দৰাগং পটিচ্চ অজ্ঝোসানং, অজ্ঝোসানং পটিচ্চ পৰিগ্গহো, পৰিগ্গহং পটিচ্চ মচ্ছৰিযং, মচ্ছৰিযং পটিচ্চ আৰক্খো, আৰক্খাধিকৰণং দণ্ডাদান-সত্থাদান-কলহ-ৱিগ্গহৱিৱাদ-তুৱংতুৱং-পেসুঞ্ঞ-মুসাৱাদা অনেকে পাপকা অকুসলা ধম্মা সম্ভৱন্তি – ইমে নৱ তণ্হামূলকা ধম্মা.

(৫) নৱ ইঞ্জিতানি

৯৬৪. তত্থ কতমানি নৱ ইঞ্জিতানি? ‘‘অস্মী’’তি ইঞ্জিতমেতং, ‘‘অহমস্মী’’তি ইঞ্জিতমেতং, ‘‘অযমহমস্মী’’তি ইঞ্জিতমেতং ‘‘ভৱিস্স’’ন্তি ইঞ্জিতমেতং, ‘‘ৰূপী ভৱিস্স’’ন্তি ইঞ্জিতমেতং, ‘‘অৰূপী ভৱিস্স’’ন্তি ইঞ্জিতমেতং, ‘‘সঞ্ঞী ভৱিস্স’’ন্তি ইঞ্জিতমেতং, ‘‘অসঞ্ঞী ভৱিস্স’’ন্তি ইঞ্জিতমেতং, ‘‘নেৱসঞ্ঞীনাসঞ্ঞী ভৱিস্স’’ন্তি ইঞ্জিতমেতং – ইমানি নৱ ইঞ্জিতানি.

(৬-৯) নৱ মঞ্ঞিতাদীনি

৯৬৫. তত্থ কতমানি নৱ মঞ্ঞিতানি… নৱ ফন্দিতানি… নৱ পপঞ্চিতানি… নৱ সঙ্খতানি? ‘‘অস্মী’’তি সঙ্খতমেতং, ‘‘অহমস্মী’’তি সঙ্খতমেতং, ‘‘অযমহমস্মী’’তি সঙ্খতমেতং, ‘‘ভৱিস্স’’ন্তি সঙ্খতমেতং, ‘‘ৰূপী ভৱিস্স’’ন্তি সঙ্খতমেতং, ‘‘অৰূপী ভৱিস্স’’ন্তি সঙ্খতমেতং, ‘‘সঞ্ঞী ভৱিস্স’’ন্তি সঙ্খতমেতং, ‘‘অসঞ্ঞী ভৱিস্স’’ন্তি সঙ্খতমেতং, ‘‘নেৱসঞ্ঞীনাসঞ্ঞী ভৱিস্স’’ন্তি সঙ্খতমেতং – ইমানি নৱ সঙ্খতানি.

নৱকং.