২. পঞ্হাপুচ্ছকং

৭১৪. পঞ্চ সিক্খাপদানি – পাণাতিপাতা ৱেৰমণী সিক্খাপদং, অদিন্নাদানা ৱেৰমণী সিক্খাপদং, কামেসুমিচ্ছাচাৰা ৱেৰমণী সিক্খাপদং, মুসাৱাদা ৱেৰমণী সিক্খাপদং, সুৰামেৰযমজ্জপমাদট্ঠানা ৱেৰমণী সিক্খাপদং.

৭১৫. পঞ্চন্নং সিক্খাপদানং কতি কুসলা, কতি অকুসলা, কতি অব্যাকতা…পে… কতি সৰণা, কতি অৰণা?

১. তিকং

৭১৬. কুসলাযেৱ. সিযা সুখায ৱেদনায সম্পযুত্তা, সিযা অদুক্খমসুখায ৱেদনায সম্পযুত্তা, ৱিপাকধম্মধম্মা, অনুপাদিন্নুপাদানিযা, অসংকিলিট্ঠসংকিলেসিকা, সৱিতক্কসৱিচাৰা, সিযা পীতিসহগতা, সিযা সুখসহগতা, সিযা উপেক্খাসহগতা.

নেৱ দস্সনেন ন ভাৱনায পহাতব্বা, নেৱ দস্সনেন ন ভাৱনায পহাতব্বহেতুকা, আচযগামিনো, নেৱসেক্খনাসেক্খা, পৰিত্তা, পৰিত্তাৰম্মণা, মজ্ঝিমা, অনিযতা, ন ৱত্তব্বা মগ্গাৰম্মণাতিপি, মগ্গহেতুকাতিপি, মগ্গাধিপতিনোতিপি. সিযা উপ্পন্না, সিযা অনুপ্পন্না, ন ৱত্তব্বা উপ্পাদিনোতি, সিযা অতীতা, সিযা অনাগতা, সিযা পচ্চুপ্পন্না, পচ্চুপ্পন্নাৰম্মণা, সিযা অজ্ঝত্তা, সিযা বহিদ্ধা, সিযা অজ্ঝত্তবহিদ্ধা, বহিদ্ধাৰম্মণা, অনিদস্সনঅপ্পটিঘা.

২. দুকং

৭১৭. ন হেতূ সহেতুকা, হেতুসম্পযুত্তা. ন ৱত্তব্বা ‘‘হেতূ চেৱ সহেতুকা চা’’তি, সহেতুকা চেৱ ন চ হেতূ, ন ৱত্তব্বা ‘‘হেতূ চেৱ হেতুসম্পযুত্তা চা’’তি, হেতুসম্পযুত্তা চেৱ ন চ হেতূ, ন হেতু সহেতূকা, সপ্পচ্চযা, সঙ্খতা, অনিদস্সনা, অপ্পটিঘা, অৰূপা, লোকিযা, কেনচি ৱিঞ্ঞেয্যা, কেনচি ন ৱিঞ্ঞেয্যা.

নো আসৱা, সাসৱা, আসৱৱিপ্পযুত্তা, ন ৱত্তব্বা ‘‘আসৱা চেৱ সাসৱা চা’’তি, সাসৱা চেৱ নো চ আসৱা, ন ৱত্তব্বা ‘‘আসৱা চেৱ আসৱসম্পযুত্তা চা’’তিপি, ‘‘আসৱসম্পযুত্তা চেৱ নো চ আসৱা’’তিপি. আসৱৱিপ্পযুত্তা সাসৱা, নো সংযোজনা…পে… নো গন্থা…পে… নো ওঘা…পে… নো যোগা…পে… নো নীৱৰণা…পে… নো পৰামাসা…পে… সাৰম্মণা, নো চিত্তা, চেতসিকা, চিত্তসম্পযুত্তা, চিত্তসংসট্ঠা, চিত্তসমুট্ঠানা, চিত্তসহভুনো, চিত্তানুপৰিৱত্তিনো, চিত্তসংসট্ঠসমুট্ঠানা, চিত্তসংসট্ঠসমুট্ঠানসহভুনো, চিত্তসংসট্ঠসমুট্ঠানানুপৰিৱত্তিনো, বাহিৰা, নো উপাদা, অনুপাদিন্না, নো উপাদানা…পে… নো কিলেসা.

ন দস্সনেন পহাতব্বা, ন ভাৱনাযপহাতব্বা, ন দস্সনেন পহাতব্বহেতুকা, ন ভাৱনায পহাতব্বহেতুকা, সৱিতক্কা, সৱিচাৰা, সিযা সপ্পীতিকা, সিযা অপ্পীতিকা, সিযা পীতিসহগতা, সিযা ন পীতিসহগতা, সিযা সুখসহগতা, সিযা ন সুখসহগতা, সিযা উপেক্খাসহগতা, সিযা ন উপেক্খাসহগতা, কামাৱচৰা, ন ৰূপাৱচৰা, ন অৰূপাৱচৰা, পৰিযাপন্না, অনিয্যানিকা, অনিযতা, সউত্তৰা, অৰণাতি.

পঞ্হাপুচ্ছকং.

সিক্খাপদৱিভঙ্গো নিট্ঠিতো.