৭. সত্তকপুগ্গলপঞ্ঞত্তি

২০৩. কথঞ্চ পুগ্গলো সকিং নিমুগ্গো নিমুগ্গোৱ হোতি? ইধেকচ্চো পুগ্গলো সমন্নাগতো হোতি একন্তকাড়কেহি অকুসলেহি ধম্মেহি. এৱং পুগ্গলো সকিং নিমুগ্গো নিমুগ্গোৱ হোতি.

কথঞ্চ পুগ্গলো উম্মুজ্জিত্ৱা নিমুজ্জতি? ইধেকচ্চো পুগ্গলো উম্মুজ্জতি ‘‘সাহু সদ্ধা কুসলেসু ধম্মেসু, সাধু [সাহু (সী. স্যা.) এৱং তীসু ঠানেসুপি] হিৰী কুসলেসু ধম্মেসু, সাধু ওত্তপ্পং কুসলেসু ধম্মেসু, সাধু ৱীৰিযং [ৱিৰিযং (সী. স্যা.)] কুসলেসু ধম্মেসু, সাধু পঞ্ঞা কুসলেসু ধম্মেসূ’’তি. তস্স সা সদ্ধা নেৱ তিট্ঠতি নো ৱড্ঢতি হাযতিযেৱ, তস্স সা হিৰী নেৱ তিট্ঠতি নো ৱড্ঢতি হাযতিযেৱ, তস্স তং ওত্তপ্পং নেৱ তিট্ঠতি নো ৱড্ঢতি হাযতিযেৱ, তস্স তং ৱীৰিযং নেৱ তিট্ঠতি নো ৱড্ঢতি হাযতিযেৱ, তস্স সা পঞ্ঞা নেৱ তিট্ঠতি নো ৱড্ঢতি হাযতিযেৱ. এৱং পুগ্গলো উম্মুজ্জিত্ৱা নিমুজ্জতি.

কথঞ্চ পুগ্গলো উম্মুজ্জিত্ৱা ঠিতো হোতি? ইধেকচ্চো পুগ্গলো উম্মুজ্জতি ‘‘সাহু সদ্ধা কুসলেসু ধম্মেসু, সাধু হিৰী কুসলেসু ধম্মেসু, সাধু ওত্তপ্পং কুসলেসু ধম্মেসু, সাধু ৱীৰিযং কুসলেসু ধম্মেসু, সাধু পঞ্ঞা কুসলেসু ধম্মেসূ’’তি. তস্স সা সদ্ধা নেৱ হাযতি নো ৱড্ঢতি ঠিতা হোতি, তস্স সা হিৰী নেৱ হাযতি নো ৱড্ঢতি ঠিতা হোতি, তস্স তং ওত্তপ্পং নেৱ হাযতি নো ৱড্ঢতি ঠিতং হোতি, তস্স তং ৱীৰিযং নেৱ হাযতি নো ৱড্ঢতি ঠিতং হোতি, তস্স সা পঞ্ঞা নেৱ হাযতি নো ৱড্ঢতি ঠিতা হোতি. এৱং পুগ্গলো উম্মুজ্জিত্ৱা ঠিতো হোতি.

কথঞ্চ পুগ্গলো উম্মুজ্জিত্ৱা ৱিপস্সতি ৱিলোকেতি? ইধেকচ্চো পুগ্গলো উম্মুজ্জতি ‘‘সাহু সদ্ধা কুসলেসু ধম্মেসু, সাধু হিৰী কুসলেসু ধম্মেসু, সাধু ওত্তপ্পং কুসলেসু ধম্মেসু, সাধু ৱীৰিযং কুসলেসু ধম্মেসু, সাধু পঞ্ঞা কুসলেসু ধম্মেসূ’’তি. সো তিণ্ণং সংযোজনানং পৰিক্খযা সোতাপন্নো হোতি অৱিনিপাতধম্মো নিযতো সম্বোধিপৰাযনো. এৱং পুগ্গলো উম্মুজ্জিত্ৱা ৱিপস্সতি ৱিলোকেতি.

কথঞ্চ পুগ্গলো উম্মুজ্জিত্ৱা পতৰতি? ইধেকচ্চো পুগ্গলো উম্মুজ্জতি ‘‘সাহু সদ্ধা কুসলেসু ধম্মেসু, সাধু হিৰী কুসলেসু ধম্মেসু, সাধু ওত্তপ্পং কুসলেসু ধম্মেসু, সাধু ৱীৰিযং কুসলেসু ধম্মেসু, সাধু পঞ্ঞা কুসলেসু ধম্মেসূ’’তি. সো তিণ্ণং সংযোজনানং পৰিক্খযা ৰাগদোসমোহানং তনুত্তা সকদাগামী হোতি সকিদেৱ ইমং লোকং আগন্ত্ৱা দুক্খস্সন্তকৰো হোতি. এৱং পুগ্গলো উম্মুজ্জিত্ৱা পতৰতি.

কথঞ্চ পুগ্গলো উম্মুজ্জিত্ৱা পতিগাধপ্পত্তো হোতি? ইধেকচ্চো পুগ্গলো উম্মুজ্জতি ‘‘সাহু সদ্ধা কুসলেসু ধম্মেসু, সাধু হিৰী কুসলেসু ধম্মেসু, সাধু ওত্তপ্পং কুসলেসু ধম্মেসু, সাধু ৱীৰিযং কুসলেসু ধম্মেসু, সাধু পঞ্ঞা কুসলেসু ধম্মেসূ’’তি. সো পঞ্চন্নং ওৰম্ভাগিযানং সংযোজনানং পৰিক্খযা ওপপাতিকো হোতি তত্থ পৰিনিব্বাযী অনাৱত্তিধম্মো তস্মা লোকা. এৱং পুগ্গলো উম্মুজ্জিত্ৱা পতিগাধপ্পত্তো হোতি.

কথঞ্চ পুগ্গলো উম্মুজ্জিত্ৱা তিণ্ণো হোতি পাৰঙ্গতো থলে তিট্ঠতি ব্ৰাহ্মণো? ইধেকচ্চো পুগ্গলো উম্মুজ্জতি ‘‘সাহু সদ্ধা কুসলেসু ধম্মেসু, সাধু হিৰী কুসলেসু ধম্মেসু, সাধু ওত্তপ্পং কুসলেসু ধম্মেসু, সাধু ৱীৰিযং কুসলেসু ধম্মেসু, সাধু পঞ্ঞা কুসলেসু ধম্মেসূ’’তি. সো আসৱানং খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. এৱং পুগ্গলো উম্মুজ্জিত্ৱা তিণ্ণো হোতি পাৰঙ্গতো থলে তিট্ঠতি ব্ৰাহ্মণো.

২০৪. কতমো চ পুগ্গলো উভতোভাগৱিমুত্তো? ইধেকচ্চো পুগ্গলো অট্ঠ ৱিমোক্খে কাযেন ফুসিত্ৱা ৱিহৰতি পঞ্ঞায চস্স দিস্ৱা আসৱা পৰিক্খীণা হোন্তি. অযং ৱুচ্চতি পুগ্গলো উভতোভাগৱিমুত্তো.

২০৫. কতমো চ পুগ্গলো পঞ্ঞাৱিমুত্তো…পে… কাযসক্খী… দিট্ঠিপ্পত্তো… সদ্ধাৱিমুত্তো… ধম্মানুসাৰী ….

২০৬. কতমো চ পুগ্গলো সদ্ধানুসাৰী? যস্স পুগ্গলস্স সোতাপত্তিফলসচ্ছিকিৰিযায পটিপন্নস্স সদ্ধিন্দ্ৰিযং অধিমত্তং হোতি, সদ্ধাৱাহিং সদ্ধাপুব্বঙ্গমং অৰিযমগ্গং ভাৱেতি. অযং ৱুচ্চতি পুগ্গলো সদ্ধানুসাৰী. সোতাপত্তিফলসচ্ছিকিৰিযায পটিপন্নো পুগ্গলো সদ্ধানুসাৰী, ফলে ঠিতো সদ্ধাৱিমুত্তোতি.

সত্তকনিদ্দেসো.