৫. পঞ্চকউদ্দেসো

১১. পঞ্চ পুগ্গলা –

(১) অত্থেকচ্চো পুগ্গলো আৰভতি [আৰম্ভতি (সী. স্যা.)] চ ৱিপ্পটিসাৰী চ হোতি, তঞ্চ চেতোৱিমুত্তিং পঞ্ঞাৱিমুত্তিং যথাভূতং নপ্পজানাতি, যত্থস্স তে উপ্পন্না পাপকা অকুসলা ধম্মা অপৰিসেসা নিৰুজ্ঝন্তি. অত্থেকচ্চো পুগ্গলো আৰভতি ন ৱিপ্পটিসাৰী চ হোতি, তঞ্চ চেতোৱিমুত্তিং পঞ্ঞাৱিমুত্তিং যথাভূতং নপ্পজানাতি, যত্থস্স তে উপ্পন্না পাপকা অকুসলা ধম্মা অপৰিসেসা নিৰুজ্ঝন্তি. অত্থেকচ্চো পুগ্গলো নাৰভতি ৱিপ্পটিসাৰী চ হোতি, তঞ্চ চেতোৱিমুত্তিং পঞ্ঞাৱিমুত্তিং যথাভূতং নপ্পজানাতি, যত্থস্স তে উপ্পন্না পাপকা অকুসলা ধম্মা অপৰিসেসা নিৰুজ্ঝন্তি. অত্থেকচ্চো পুগ্গলো নাৰভতি ন ৱিপ্পটিসাৰী হোতি, তঞ্চ চেতোৱিমুত্তিং পঞ্ঞাৱিমুত্তিং যথাভূতং নপ্পজানাতি, যত্থস্স তে উপ্পন্না পাপকা অকুসলা ধম্মা অপৰিসেসা নিৰুজ্ঝন্তি. অত্থেকচ্চো পুগ্গলো নাৰভতি ন ৱিপ্পটিসাৰী হোতি, তঞ্চ চেতোৱিমুত্তিং পঞ্ঞাৱিমুত্তিং যথাভূতং পজানাতি, যত্থস্স তে উপ্পন্না পাপকা অকুসলা ধম্মা অপৰিসেসা নিৰুজ্ঝন্তি.

(২) দত্ৱা অৱজানাতি, সংৱাসেন অৱজানাতি, আধেয্যমুখো হোতি, লোলো হোতি, মন্দো মোমূহো হোতি.

(৩) পঞ্চ যোধাজীৱূপমা পুগ্গলা.

(৪) পঞ্চ পিণ্ডপাতিকা.

(৫) পঞ্চ খলুপচ্ছাভত্তিকা.

(৬) পঞ্চ একাসনিকা.

(৭) পঞ্চ পংসুকূলিকা.

(৮) পঞ্চ তেচীৱৰিকা.

(৯) পঞ্চ আৰঞ্ঞিকা.

(১০) পঞ্চ ৰুক্খমূলিকা.

(১১) পঞ্চ অব্ভোকাসিকা.

(১২) পঞ্চ নেসজ্জিকা.

(১৩) পঞ্চ যথাসন্থতিকা.

(১৪) পঞ্চ সোসানিকা.

পঞ্চকং.