৬. ছক্কউদ্দেসো

১২. ছ পুগ্গলা –

(১) অত্থেকচ্চো পুগ্গলো পুব্বে অননুস্সুতেসু ধম্মেসু সামং সচ্চানি অভিসম্বুজ্ঝতি, তত্থ চ সব্বঞ্ঞুতং পাপুণাতি বলেসু [ফলেসু (পী.)] চ ৱসীভাৱং. অত্থেকচ্চো পুগ্গলো পুব্বে অননুস্সুতেসু ধম্মেসু সামং সচ্চানি অভিসম্বুজ্ঝতি, ন চ তত্থ সব্বঞ্ঞুতং পাপুণাতি ন চ বলেসু ৱসীভাৱং. অত্থেকচ্চো পুগ্গলো পুব্বে অননুস্সুতেসু ধম্মেসু সামং সচ্চানি অনভিসম্বুজ্ঝতি, দিট্ঠে চেৱ ধম্মে দুক্খস্সন্তকৰো হোতি সাৱকপাৰমিঞ্চ পাপুণাতি. অত্থেকচ্চো পুগ্গলো পুব্বে অননুস্সুতেসু ধম্মেসু সামং সচ্চানি অনভিসম্বুজ্ঝতি, দিট্ঠেৱ ধম্মে দুক্খস্সন্তকৰো হোতি, ন চ সাৱকপাৰমিং পাপুণাতি. অত্থেকচ্চো পুগ্গলো পুব্বে অননুস্সুতেসু ধম্মেসু সামং সচ্চানি অনভিসম্বুজ্ঝতি, ন চ দিট্ঠেৱ ধম্মে দুক্খস্সন্তকৰো হোতি, অনাগামী হোতি অনাগন্তা [অনাগন্ত্ৱা (স্যা. ক.) অ. নি. ৪.১৭১] ইত্থত্তং. অত্থেকচ্চো পুগ্গলো পুব্বে অননুস্সুতেসু ধম্মেসু সামং সচ্চানি অনভিসম্বুজ্ঝতি, ন চ দিট্ঠেৱ ধম্মে দুক্খস্সন্তকৰো হোতি, আগামী [সোতাপন্নসকদাগামী (স্যা. ক.)] হোতি আগন্তা ইত্থত্তং.

ছক্কং.