১-৭. পটিচ্চৱাৰাদি
পচ্চযচতুক্কং
৪১. কুসলং কেনচি ৱিঞ্ঞেয্যং ধম্মং পটিচ্চ কুসলো কেনচি ৱিঞ্ঞেয্যো ধম্মো উপ্পজ্জতি হেতুপচ্চযা. কুসলং কেনচি ৱিঞ্ঞেয্যং ধম্মং পটিচ্চ অব্যাকতো কেনচি ৱিঞ্ঞেয্যো ধম্মো উপ্পজ্জতি হেতুপচ্চযা. কুসলং কেনচি ৱিঞ্ঞেয্যং ধম্মং পটিচ্চ কুসলো কেনচি ৱিঞ্ঞেয্যো চ অব্যাকতো কেনচি ৱিঞ্ঞেয্যো চ ধম্মা উপ্পজ্জন্তি হেতুপচ্চযা. (৩)
অকুসলং কেনচি ৱিঞ্ঞেয্যং ধম্মং পটিচ্চ অকুসলো কেনচি ৱিঞ্ঞেয্যো ধম্মো উপ্পজ্জতি হেতুপচ্চযা… তীণি.
অব্যাকতং কেনচি ৱিঞ্ঞেয্যং ধম্মং পটিচ্চ অব্যাকতো কেনচি ৱিঞ্ঞেয্যো ধম্মো উপ্পজ্জতি হেতুপচ্চযা. (১)
কুসলং কেনচি ৱিঞ্ঞেয্যঞ্চ অব্যাকতং কেনচি ৱিঞ্ঞেয্যঞ্চ ধম্মং পটিচ্চ অব্যাকতো কেনচি ৱিঞ্ঞেয্যো ধম্মো উপ্পজ্জতি হেতুপচ্চযা. (১)
অকুসলং কেনচি ৱিঞ্ঞেয্যঞ্চ অব্যাকতং কেনচি ৱিঞ্ঞেয্যঞ্চ ধম্মং পটিচ্চ অব্যাকতো কেনচি ৱিঞ্ঞেয্যো ধম্মো উপ্পজ্জতি হেতুপচ্চযা. (১)
৪২. কুসলং কেনচি ৱিঞ্ঞেয্যং ধম্মং পটিচ্চ কুসলো কেনচি ৱিঞ্ঞেয্যো ধম্মো উপ্পজ্জতি আৰম্মণপচ্চযা. (১)
অকুসলং কেনচি ৱিঞ্ঞেয্যং ধম্মং পটিচ্চ অকুসলো কেনচি ৱিঞ্ঞেয্যো ধম্মো উপ্পজ্জতি আৰম্মণপচ্চযা. (১)
অব্যাকতং কেনচি ৱিঞ্ঞেয্যং ধম্মং পটিচ্চ অব্যাকতো কেনচি ৱিঞ্ঞেয্যো ধম্মো উপ্পজ্জতি আৰম্মণপচ্চযা. (১) (সংখিত্তং.)
৪৩. হেতুযা নৱ, আৰম্মণে তীণি…পে… অৱিগতে নৱ (সংখিত্তং).
পচ্চনীযং
নহেতুপচ্চযো
৪৪. অকুসলং কেনচি ৱিঞ্ঞেয্যং ধম্মং পটিচ্চ অকুসলো কেনচি ৱিঞ্ঞেয্যো ধম্মো উপ্পজ্জতি নহেতুপচ্চযা. (১)
অব্যাকতং কেনচি ৱিঞ্ঞেয্যং ধম্মং পটিচ্চ অব্যাকতো কেনচি ৱিঞ্ঞেয্যো ধম্মো উপ্পজ্জতি নহেতুপচ্চযা. (১) (সংখিত্তং.)
৪৫. নহেতুযা দ্ৱে, নআৰম্মণে পঞ্চ, নঅধিপতিযা নৱ…পে… নোৱিগতে পঞ্চ (সংখিত্তং. সহজাতৱাৰম্পি…পে… সম্পযুত্তৱাৰম্পি পটিচ্চৱাৰসদিসং).
হেতুপচ্চযো
৪৬. কুসলো কেনচি ৱিঞ্ঞেয্যো ধম্মো কুসলস্স কেনচি ৱিঞ্ঞেয্যস্স ধম্মস্স হেতুপচ্চযেন পচ্চযো… তীণি.
অকুসলো কেনচি ৱিঞ্ঞেয্যো ধম্মো অকুসলস্স কেনচি ৱিঞ্ঞেয্যস্স ধম্মস্স হেতুপচ্চযেন পচ্চযো… তীণি.
অব্যাকতো কেনচি ৱিঞ্ঞেয্যো ধম্মো অব্যাকতস্স কেনচি ৱিঞ্ঞেয্যস্স ধম্মস্স হেতুপচ্চযেন পচ্চযো. (১) (সংখিত্তং.)
৪৭. হেতুযা সত্ত, আৰম্মণে নৱ…পে… অৱিগতে তেৰস (সংখিত্তং. যথা কুসলত্তিকে পঞ্হাৱাৰং, এৱং ৱিত্থাৰেতব্বং).
৪৮. কুসলং নকেনচি ৱিঞ্ঞেয্যং ধম্মং পটিচ্চ কুসলো নকেনচি ৱিঞ্ঞেয্যো ধম্মো উপ্পজ্জতি হেতুপচ্চযা (কেনচিৱিঞ্ঞেয্যসদিসং).
কুসলত্তিকচূড়ন্তৰদুকং নিট্ঠিতং.