২. অনাগতাদিএকচ্চকথা

৩০০. অনাগতং অত্থীতি? একচ্চং অত্থি, একচ্চং নত্থীতি. একচ্চং জাতং, একচ্চং অজাতং; একচ্চং সঞ্জাতং, একচ্চং অসঞ্জাতং; একচ্চং নিব্বত্তং, একচ্চং অনিব্বত্তং; একচ্চং পাতুভূতং, একচ্চং অপাতুভূতন্তি? ন হেৱং ৱত্তব্বে…পে….

অনাগতং একচ্চং অত্থি, একচ্চং নত্থীতি? আমন্তা. অনাগতা উপ্পাদিনো ধম্মা একচ্চে অত্থি, একচ্চে নত্থীতি? ন হেৱং ৱত্তব্বে…পে… অনাগতং একচ্চং অত্থি, একচ্চং নত্থীতি? আমন্তা. অনাগতা অনুপ্পাদিনো ধম্মা একচ্চে অত্থি, একচ্চে নত্থীতি? ন হেৱং ৱত্তব্বে…পে….

অনাগতং একচ্চং অত্থি, একচ্চং নত্থীতি? আমন্তা. কিং অত্থি, কিং নত্থীতি? অনাগতা উপ্পাদিনো ধম্মা – তে অত্থি; অনাগতা অনুপ্পাদিনো ধম্মা – তে নত্থীতি. অনাগতা উপ্পাদিনো ধম্মা – তে অত্থীতি? আমন্তা. অনাগতা অনুপ্পাদিনো ধম্মা – তে অত্থীতি? ন হেৱং ৱত্তব্বে…পে… অনাগতা অনুপ্পাদিনো ধম্মা – তে নত্থীতি? আমন্তা. অনাগতা উপ্পাদিনো ধম্মা – তে নত্থীতি? ন হেৱং ৱত্তব্বে…পে….

অনাগতা উপ্পাদিনো ধম্মা – তে অত্থীতি? আমন্তা. ননু অনাগতা উপ্পাদিনো ধম্মা অজাতাতি? আমন্তা. হঞ্চি অনাগতা উপ্পাদিনো ধম্মা অজাতা, নো চ ৱত ৰে ৱত্তব্বে – ‘‘অনাগতা উপ্পাদিনো ধম্মা – তে অত্থী’’তি.

অনাগতা উপ্পাদিনো ধম্মা অজাতা – তে অত্থীতি? আমন্তা. অনাগতা অনুপ্পাদিনো ধম্মা অজাতা – তে অত্থীতি? ন হেৱং ৱত্তব্বে…পে… অনাগতা অনুপ্পাদিনো ধম্মা অজাতা – তে নত্থীতি? আমন্তা. অনাগতা উপ্পাদিনো ধম্মা অজাতা – তে নত্থীতি? ন হেৱং ৱত্তব্বে…পে….

ন ৱত্তব্বং – ‘‘অনাগতা উপ্পাদিনো ধম্মা – তে অত্থী’’তি? আমন্তা. ননু অনাগতা উপ্পাদিনো ধম্মা উপ্পজ্জিস্সন্তীতি? আমন্তা. হঞ্চি অনাগতা উপ্পাদিনো ধম্মা উপ্পজ্জিস্সন্তি, তেন ৱত ৰে ৱত্তব্বে – ‘‘অনাগতা উপ্পাদিনো ধম্মা – তে অত্থী’’তি.

অনাগতা উপ্পাদিনো ধম্মা উপ্পজ্জিস্সন্তীতি কত্ৱা তে অত্থীতি? আমন্তা. উপ্পজ্জিস্সন্তীতি কত্ৱা পচ্চুপ্পন্নাতি? ন হেৱং ৱত্তব্বে…পে… উপ্পজ্জিস্সন্তীতি কত্ৱা পচ্চুপ্পন্নাতি? আমন্তা. পচ্চুপ্পন্না ধম্মা নিৰুজ্ঝিস্সন্তীতি কত্ৱা তে নত্থীতি? ন হেৱং ৱত্তব্বে…পে….

একচ্চং অত্থীতিকথা নিট্ঠিতা.