১. অতীতাদিএকচ্চকথা

২৯৯. অতীতং অত্থীতি? একচ্চং অত্থি, একচ্চং নত্থীতি. একচ্চং নিৰুদ্ধং, একচ্চং ন নিৰুদ্ধং; একচ্চং ৱিগতং, একচ্চং অৱিগতং; একচ্চং অত্থঙ্গতং, একচ্চং ন অত্থঙ্গতং; একচ্চং অব্ভত্থঙ্গতং, একচ্চং ন অব্ভত্থঙ্গতন্তি? ন হেৱং ৱত্তব্বে…পে….

অতীতং একচ্চং অত্থি, একচ্চং নত্থীতি? আমন্তা. অতীতা অৱিপক্কৱিপাকা ধম্মা একচ্চে অত্থি, একচ্চে নত্থীতি? ন হেৱং ৱত্তব্বে…পে… অতীতং একচ্চং অত্থি, একচ্চং নত্থীতি? আমন্তা. অতীতা ৱিপক্কৱিপাকা ধম্মা একচ্চে অত্থি, একচ্চে নত্থীতি? ন হেৱং ৱত্তব্বে…পে… অতীতং একচ্চং অত্থি, একচ্চং নত্থীতি? আমন্তা. অতীতা অৱিপাকা ধম্মা একচ্চে অত্থি একচ্চে নত্থীতি? ন হেৱং ৱত্তব্বে…পে….

অতীতং একচ্চং অত্থি একচ্চং নত্থীতি? আমন্তা. কিং অত্থি কিং নত্থীতি? অতীতা অৱিপক্কৱিপাকা ধম্মা – তে অত্থি; অতীতা ৱিপক্কৱিপাকা ধম্মা – তে নত্থীতি. অতীতা অৱিপক্কৱিপাকা ধম্মা – তে অত্থীতি? আমন্তা. অতীতা ৱিপক্কৱিপাকা ধম্মা – তে অত্থীতি? ন হেৱং ৱত্তব্বে…পে… অতীতা অৱিপক্কৱিপাকা ধম্মা – তে অত্থীতি? আমন্তা. অতীতা অৱিপাকা ধম্মা – তে অত্থীতি [অতীতা অৱিপক্কৱিপাকা ধম্মা তে নত্থীতি (ক.)]? ন হেৱং ৱত্তব্বে…পে….

অতীতা ৱিপক্কৱিপাকা ধম্মা – তে নত্থীতি? আমন্তা. অতীতা অৱিপক্কৱিপাকা ধম্মা – তে নত্থীতি? ন হেৱং ৱত্তব্বে …পে….

অতীতা অৱিপাকা [ৱিপক্কৱিপাকা (স্যা.), অৱিপক্কৱিপাকা (ক.)] ধম্মা – তে নত্থীতি? আমন্তা. অতীতা অৱিপক্কৱিপাকা [অৱিপাকা (স্যা.)] ধম্মা – তে নত্থীতি? ন হেৱং ৱত্তব্বে…পে….

অতীতা অৱিপক্কৱিপাকা ধম্মা – তে অত্থীতি? আমন্তা. ননু অতীতা অৱিপক্কৱিপাকা ধম্মা নিৰুদ্ধাতি? আমন্তা. হঞ্চি অতীতা অৱিপক্কৱিপাকা ধম্মা নিৰুদ্ধা, নো চ ৱত ৰে ৱত্তব্বে – ‘‘অতীতা অৱিপক্কৱিপাকা ধম্মা – তে [ধম্মা নিৰুদ্ধা তে (স্যা. ক.)] অত্থী’’তি.

অতীতা অৱিপক্কৱিপাকা ধম্মা নিৰুদ্ধা – তে অত্থীতি? আমন্তা. অতীতা ৱিপক্কৱিপাকা ধম্মা নিৰুদ্ধা – তে অত্থীতি? ন হেৱং ৱত্তব্বে…পে… অতীতা অৱিপক্কৱিপাকা ধম্মা নিৰুদ্ধা – তে অত্থীতি? আমন্তা. অতীতা অৱিপাকা [অৱিপক্কৱিপাকা (সী. ক.)] ধম্মা নিৰুদ্ধা – তে অত্থীতি? ন হেৱং ৱত্তব্বে…পে….

অতীতা ৱিপক্কৱিপাকা ধম্মা নিৰুদ্ধা – তে নত্থীতি? আমন্তা. অতীতা অৱিপক্কৱিপাকা ধম্মা নিৰুদ্ধা – তে নত্থীতি? ন হেৱং ৱত্তব্বে…পে….

অতীতা অৱিপাকা [ৱিপক্কৱিপাকা (স্যা.), অৱিপক্কৱিপাকা (ক.)] ধম্মা নিৰুদ্ধা – তে নত্থীতি? আমন্তা. অতীতা অৱিপক্কৱিপাকা [অৱিপাকা (স্যা.)] ধম্মা নিৰুদ্ধা – তে নত্থীতি? ন হেৱং ৱত্তব্বে…পে….

অতীতা অৱিপক্কৱিপাকা ধম্মা নিৰুদ্ধা – তে অত্থীতি? আমন্তা. অতীতা ৱিপক্কৱিপাকা ধম্মা নিৰুদ্ধা – তে নত্থীতি? আমন্তা. অতীতা একদেসং ৱিপক্কৱিপাকা ধম্মা একদেসং অৱিপক্কৱিপাকা ধম্মা নিৰুদ্ধা – তে একচ্চে অত্থি একচ্চে নত্থীতি? ন হেৱং ৱত্তব্বে…পে….

ন ৱত্তব্বং – ‘‘অতীতা অৱিপক্কৱিপাকা ধম্মা – তে অত্থী’’তি? আমন্তা. ননু অতীতা অৱিপক্কৱিপাকা ধম্মা ৱিপচ্চিস্সন্তীতি? আমন্তা. হঞ্চি অতীতা অৱিপক্কৱিপাকা ধম্মা ৱিপচ্চিস্সন্তি, তেন ৱত ৰে ৱত্তব্বে – ‘‘অতীতা অৱিপক্কৱিপাকা ধম্মা – তে অত্থী’’তি.

অতীতা অৱিপক্কৱিপাকা ধম্মা ৱিপচ্চিস্সন্তীতি কত্ৱা তে অত্থীতি? আমন্তা. ৱিপচ্চিস্সন্তীতি কত্ৱা পচ্চুপ্পন্নাতি? ন হেৱং ৱত্তব্বে…পে… ৱিপচ্চিস্সন্তীতি কত্ৱা পচ্চুপ্পন্নাতি? আমন্তা. পচ্চুপ্পন্না ধম্মা নিৰুজ্ঝিস্সন্তীতি কত্ৱা তে নত্থীতি? ন হেৱং ৱত্তব্বে…পে….