৪. জহতিকথা

১. নসুত্তাহৰণকথা

২৭৯. জহতি পুথুজ্জনো কামৰাগব্যাপাদন্তি? আমন্তা. অচ্চন্তং জহতি, অনৱসেসং জহতি, অপ্পটিসন্ধিযং জহতি, সমূলং জহতি, সতণ্হং জহতি, সানুসযং জহতি, অৰিযেন ঞাণেন জহতি, অৰিযেন মগ্গেন জহতি, অকুপ্পং পটিৱিজ্ঝন্তো জহতি, অনাগামিফলং সচ্ছিকৰোন্তো জহতীতি? ন হেৱং ৱত্তব্বে…পে….

ৱিক্খম্ভেতি পুথুজ্জনো কামৰাগব্যাপাদন্তি? আমন্তা. অচ্চন্তং ৱিক্খম্ভেতি, অনৱসেসং ৱিক্খম্ভেতি, অপ্পটিসন্ধিযং ৱিক্খম্ভেতি, সমূলং ৱিক্খম্ভেতি, সতণ্হং ৱিক্খম্ভেতি, সানুসযং ৱিক্খম্ভেতি, অৰিযেন ঞাণেন ৱিক্খম্ভেতি, অৰিযেন মগ্গেন ৱিক্খম্ভেতি, অকুপ্পং পটিৱিজ্ঝন্তো ৱিক্খম্ভেতি, অনাগামিফলং সচ্ছিকৰোন্তো ৱিক্খম্ভেতীতি? ন হেৱং ৱত্তব্বে…পে….

জহতি অনাগামিফলসচ্ছিকিৰিযায পটিপন্নো পুগ্গলো কামৰাগব্যাপাদং, সো চ অচ্চন্তং জহতি, অনৱসেসং জহতি…পে… অনাগামিফলং সচ্ছিকৰোন্তো জহতীতি? আমন্তা. জহতি পুথুজ্জনো কামৰাগব্যাপাদং, সো চ অচ্চন্তং জহতি, অনৱসেসং জহতি…পে… অনাগামিফলং সচ্ছিকৰোন্তো জহতীতি? ন হেৱং ৱত্তব্বে…পে….

ৱিক্খম্ভেতি অনাগামিফলসচ্ছিকিৰিযায পটিপন্নো পুগ্গলো কামৰাগব্যাপাদং, সো চ অচ্চন্তং ৱিক্খম্ভেতি, অনৱসেসং ৱিক্খম্ভেতি…পে… অনাগামিফলং সচ্ছিকৰোন্তো ৱিক্খম্ভেতীতি? আমন্তা. ৱিক্খম্ভেতি পুথুজ্জনো কামৰাগব্যাপাদং, সো চ অচ্চন্তং ৱিক্খম্ভেতি, অনৱসেসং ৱিক্খম্ভেতি …পে… অনাগামিফলং সচ্ছিকৰোন্তো ৱিক্খম্ভেতীতি? ন হেৱং ৱত্তব্বে…পে….

জহতি পুথুজ্জনো কামৰাগব্যাপাদং, সো চ ন অচ্চন্তং জহতি, ন অনৱসেসং জহতি…পে… ন অনাগামিফলং সচ্ছিকৰোন্তো জহতীতি? আমন্তা. জহতি অনাগামিফলসচ্ছিকিৰিযায পটিপন্নো পুগ্গলো কামৰাগব্যাপাদং, সো চ ন অচ্চন্তং জহতি…পে… ন অনাগামিফলং সচ্ছিকৰোন্তো জহতীতি? ন হেৱং ৱত্তব্বে…পে….

ৱিক্খম্ভেতি পুথুজ্জনো কামৰাগব্যাপাদং, সো চ ন অচ্চন্তং ৱিক্খম্ভেতি, ন অনৱসেসং ৱিক্খম্ভেতি…পে… ন অনাগামিফলং সচ্ছিকৰোন্তো ৱিক্খম্ভেতীতি? আমন্তা. ৱিক্খম্ভেতি অনাগামিফলসচ্ছিকিৰিযায পটিপন্নো পুগ্গলো কামৰাগব্যাপাদং, সো চ ন অচ্চন্তং ৱিক্খম্ভেতি, ন অনৱসেসং ৱিক্খম্ভেতি…পে… ন অনাগামিফলং সচ্ছিকৰোন্তো ৱিক্খম্ভেতীতি? ন হেৱং ৱত্তব্বে…পে….

জহতি পুথুজ্জনো কামৰাগব্যাপাদন্তি? আমন্তা. কতমেন মগ্গেনাতি? ৰূপাৱচৰেন মগ্গেনাতি. ৰূপাৱচৰো মগ্গো নিয্যানিকো খযগামী বোধগামী অপচযগামী অনাসৱো অসংযোজনিযো অগন্থনিযো অনোঘনিযো অযোগনিযো অনীৱৰণিযো অপৰামট্ঠো অনুপাদানিযো অসংকিলেসিযোতি? ন হেৱং ৱত্তব্বে. ননু ৰূপাৱচৰো মগ্গো অনিয্যানিকো ন খযগামী ন বোধগামী ন অপচযগামী সাসৱো সংযোজনিযো…পে… সংকিলেসিযোতি? আমন্তা. হঞ্চি ৰূপাৱচৰো মগ্গো অনিয্যানিকো ন খযগামী…পে… সংকিলেসিযো, নো চ ৱত ৰে ৱত্তব্বে – ‘‘জহতি পুথুজ্জনো ৰূপাৱচৰেন মগ্গেন কামৰাগব্যাপাদ’’ন্তি.

জহতি অনাগামিফলসচ্ছিকিৰিযায পটিপন্নো পুগ্গলো অনাগামিমগ্গেন কামৰাগব্যাপাদং, সো চ মগ্গো নিয্যানিকো খযগামী বোধগামী অপচযগামী অনাসৱো…পে… অসংকিলেসিযোতি? আমন্তা. জহতি পুথুজ্জনো ৰূপাৱচৰেন মগ্গেন কামৰাগব্যাপাদং, সো চ মগ্গো নিয্যানিকো খযগামী বোধগামী অপচযগামী অনাসৱো…পে… অসংকিলেসিযোতি? ন হেৱং ৱত্তব্বে…পে….

জহতি পুথুজ্জনো ৰূপাৱচৰেন মগ্গেন কামৰাগব্যাপাদং, সো চ মগ্গো অনিয্যানিকো ন খযগামী ন বোধগামী ন অপচযগামী সাসৱো…পে… সংকিলেসিযোতি? আমন্তা. জহতি অনাগামিফলসচ্ছিকিৰিযায পটিপন্নো পুগ্গলো অনাগামিমগ্গেন কামৰাগব্যাপাদং, সো চ মগ্গো অনিয্যানিকো ন খযগামী ন বোধগামী ন অপচযগামী সাসৱো…পে… সংকিলেসিযোতি? ন হেৱং ৱত্তব্বে…পে….

২৮০. পুথুজ্জনো কামেসু ৱীতৰাগো সহ ধম্মাভিসমযা অনাগামিফলে সণ্ঠাতীতি? আমন্তা. অৰহত্তে সণ্ঠাতীতি? ন হেৱং ৱত্তব্বে…পে….

পুথুজ্জনো কামেসু ৱীতৰাগো সহ ধম্মাভিসমযা অনাগামিফলে সণ্ঠাতীতি? আমন্তা. অপুব্বং অচৰিমং তযো মগ্গে ভাৱেতীতি? ন হেৱং ৱত্তব্বে…পে….

অপুব্বং অচৰিমং তযো মগ্গে ভাৱেতীতি? আমন্তা. অপুব্বং অচৰিমং তীণি সামঞ্ঞফলানি সচ্ছিকৰোতীতি? ন হেৱং ৱত্তব্বে…পে….

অপুব্বং অচৰিমং তীণি সামঞ্ঞফলানি সচ্ছিকৰোতীতি? আমন্তা. তিণ্ণং ফস্সানং তিস্সন্নং ৱেদনানং তিস্সন্নং সঞ্ঞানং তিস্সন্নং চেতনানং তিণ্ণং চিত্তানং তিস্সন্নং সদ্ধানং তিণ্ণং ৱীৰিযানং তিস্সন্নং সতীনং তিণ্ণং সমাধীনং তিস্সন্নং পঞ্ঞানং সমোধানং হোতীতি? ন হেৱং ৱত্তব্বে…পে….

পুথুজ্জনো কামেসু ৱীতৰাগো সহ ধম্মাভিসমযা অনাগামিফলে সণ্ঠাতীতি? আমন্তা. সোতাপত্তিমগ্গেনাতি? ন হেৱং ৱত্তব্বে…পে….

সকদাগামিমগ্গেনাতি? ন হেৱং ৱত্তব্বে. কতমেন মগ্গেনাতি? অনাগামিমগ্গেনাতি. অনাগামিমগ্গেন সক্কাযদিট্ঠিং ৱিচিকিচ্ছং সীলব্বতপৰামাসং জহতীতি? ন হেৱং ৱত্তব্বে…পে….

২. সুত্তাহৰণকথা

২৮১. অনাগামিমগ্গেন সক্কাযদিট্ঠিং ৱিচিকিচ্ছং সীলব্বতপৰামাসং জহতীতি? আমন্তা. ননু তিণ্ণং সংযোজনানং পহানা সোতাপত্তিফলং ৱুত্তং ভগৱতাতি? আমন্তা. হঞ্চি তিণ্ণং সংযোজনানং পহানা সোতাপত্তিফলং ৱুত্তং ভগৱতা, নো চ ৱত ৰে ৱত্তব্বে – ‘‘অনাগামিমগ্গেন সক্কাযদিট্ঠিং ৱিচিকিচ্ছং সীলব্বতপৰামাসং জহতী’’তি. অনাগামিমগ্গেন ওড়াৰিকং কামৰাগং ওড়াৰিকং ব্যাপাদং জহতীতি? ন হেৱং ৱত্তব্বে…পে….

অনাগামিমগ্গেন ওড়াৰিকং কামৰাগং ওড়াৰিকং ব্যাপাদং জহতীতি? আমন্তা. ননু কামৰাগব্যাপাদানং তনুভাৱা সকদাগামিফলং ৱুত্তং ভগৱতাতি? আমন্তা. হঞ্চি কামৰাগব্যাপাদানং তনুভাৱা সকদাগামিফলং ৱুত্তং ভগৱতা, নো চ ৱত ৰে ৱত্তব্বে – ‘‘অনাগামিমগ্গেন ওড়াৰিকং কামৰাগং ওড়াৰিকং ব্যাপাদং জহতী’’তি.

পুথুজ্জনো কামেসু ৱীতৰাগো সহ ধম্মাভিসমযা অনাগামিফলে সণ্ঠাতীতি? আমন্তা. যে কেচি ধম্মং অভিসমেন্তি, সব্বে তে সহ ধম্মাভিসমযা অনাগামিফলে সণ্ঠহন্তীতি? ন হেৱং ৱত্তব্বে…পে….

ন ৱত্তব্বং – ‘‘জহতি পুথুজ্জনো কামৰাগব্যাপাদ’’ন্তি? আমন্তা. ননু ৱুত্তং ভগৱতা –

‘‘অহেসুং তে [অহিংসকা (অ. নি. ৬.৫৪)] অতীতংসে, ছ সত্থাৰো যসস্সিনো;

নিৰামগন্ধা কৰুণেধিমুত্তা [কৰুণাধিমুত্তা (সী. ক.)], কামসংযোজনাতিগা.

‘‘কামৰাগং ৱিৰাজেত্ৱা, ব্ৰহ্মলোকূপগা অহু;

অহেসুং সাৱকা তেসং, অনেকানি সতানিপি.

‘‘নিৰামগন্ধা কৰুণেধিমুত্তা, কামসংযোজনাতিগা;

কামৰাগং ৱিৰাজেত্ৱা, ব্ৰহ্মলোকূপগা অহূ’’তি [অ. নি. ৬.৫৪].

অত্থেৱ সুত্তন্তোতি? আমন্তা. তেন হি জহতি পুথুজ্জনো কামৰাগব্যাপাদন্তি.

জহতি পুথুজ্জনো কামৰাগব্যাপাদন্তি? আমন্তা. ননু ৱুত্তং ভগৱতা – ‘‘সো হি নাম, ভিক্খৱে, সুনেত্তো সত্থা এৱং দীঘাযুকো সমানো এৱং চিৰট্ঠিতিকো অপৰিমুত্তো অহোসি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি অপৰিমুত্তো দুক্খস্মাতি ৱদামি. তং কিস্স হেতু? চতুন্নং ধম্মানং অননুবোধা অপ্পটিৱেধা. কতমেসং চতুন্নং? অৰিযস্স সীলস্স অননুবোধা অপ্পটিৱেধা, অৰিযস্স সমাধিস্স, অৰিযায পঞ্ঞায, অৰিযায ৱিমুত্তিযা অননুবোধা অপ্পটিৱেধা. তযিদং, ভিক্খৱে, অৰিযং সীলং অনুবুদ্ধং পটিৱিদ্ধং, অৰিযো সমাধি অনুবুদ্ধো পটিৱিদ্ধো, অৰিযা পঞ্ঞা অনুবুদ্ধা পটিৱিদ্ধা, অৰিযা ৱিমুত্তি অনুবুদ্ধা পটিৱিদ্ধা, উচ্ছিন্না ভৱতণ্হা, খীণা ভৱনেত্তি, নত্থি দানি পুনব্ভৱোতি.

‘‘সীলং সমাধি পঞ্ঞা চ, ৱিমুত্তি চ অনুত্তৰা;

অনুবুদ্ধা ইমে ধম্মা, গোতমেন যসস্সিনা.

‘‘ইতি বুদ্ধো অভিঞ্ঞায, ধম্মমক্খাসি ভিক্খুনং;

দুক্খস্সন্তকৰো সত্থা, চক্খুমা পৰিনিব্বুতো’’তি [অ. নি. ৭.৬৬].

অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘জহতি পুথুজ্জনো কামৰাগব্যাপাদ’’ন্তি.

জহতিকথা নিট্ঠিতা.