৩. ব্ৰহ্মচৰিযকথা

১. সুদ্ধব্ৰহ্মচৰিযকথা

২৬৯. নত্থি দেৱেসু ব্ৰহ্মচৰিযৱাসোতি? আমন্তা. সব্বে দেৱা জড়া এলমূগা [এড়মূগা (স্যা.)] অৱিঞ্ঞূ হত্থসংৱাচিকা নপ্পটিবলা সুভাসিতদুব্ভাসিতানং অত্থমঞ্ঞাতুং, সব্বে দেৱা ন বুদ্ধে পসন্না ন ধম্মে পসন্না ন সঙ্ঘে পসন্না, ন বুদ্ধং ভগৱন্তং পযিৰুপাসন্তি, ন বুদ্ধং ভগৱন্তং পঞ্হং পুচ্ছন্তি, ন বুদ্ধেন ভগৱতা পঞ্হে ৱিস্সজ্জিতে অত্তমনা, সব্বে দেৱা কম্মাৱৰণেন সমন্নাগতা কিলেসাৱৰণেন সমন্নাগতা ৱিপাকাৱৰণেন সমন্নাগতা অস্সদ্ধা অচ্ছন্দিকা দুপ্পঞ্ঞা অভব্বা নিযামং ওক্কমিতুং কুসলেসু ধম্মেসু সম্মত্তং, সব্বে দেৱা মাতুঘাতকা পিতুঘাতকা অৰহন্তঘাতকা ৰুহিৰুপ্পাদকা সঙ্ঘভেদকা, সব্বে দেৱা পাণাতিপাতিনো অদিন্নাদাযিনো কামেসুমিচ্ছাচাৰিনো মুসাৱাদিনো পিসুণৱাচা ফৰুসাৱাচা সম্ফপ্পলাপিনো অভিজ্ঝালুনো ব্যাপন্নচিত্তা মিচ্ছাদিট্ঠিকাতি? ন হেৱং ৱত্তব্বে…পে….

ননু অত্থি দেৱা অজড়া অনেলমূগা ৱিঞ্ঞূ ন হত্থসংৱাচিকা পটিবলা সুভাসিতদুব্ভাসিতানং অত্থমঞ্ঞাতুং, অত্থি দেৱা বুদ্ধে পসন্না ধম্মে পসন্না সঙ্ঘে পসন্না, বুদ্ধং ভগৱন্তং পযিৰুপাসন্তি, বুদ্ধং ভগৱন্তং পঞ্হং পুচ্ছন্তি, বুদ্ধেন ভগৱতা পঞ্হে ৱিস্সজ্জিতে অত্তমনা হোন্তি, অত্থি দেৱা ন কম্মাৱৰণেন সমন্নাগতা ন কিলেসাৱৰণেন সমন্নাগতা ন ৱিপাকাৱৰণেন সমন্নাগতা সদ্ধা ছন্দিকা পঞ্ঞৱন্তো ভব্বা নিযামং ওক্কমিতুং কুসলেসু ধম্মেসু সম্মত্তং, অত্থি দেৱা ন মাতুঘাতকা ন পিতুঘাতকা ন অৰহন্তঘাতকা ন ৰুহিৰুপ্পাদকা ন সঙ্ঘভেদকা, অত্থি দেৱা ন পাণাতিপাতিনো ন অদিন্নাদাযিনো ন কামেসুমিচ্ছাচাৰিনো ন মুসাৱাদিনো ন পিসুণাৱাচা ন ফৰুসাৱাচা ন সম্ফপ্পলাপিনো ন অভিজ্ঝালুনো অব্যাপন্নচিত্তা সম্মাদিট্ঠিকাতি? আমন্তা.

হঞ্চি অত্থি দেৱা অজড়া অনেলমূগা ৱিঞ্ঞূ ন হত্থসংৱাচিকা পটিবলা সুভাসিতদুব্ভাসিতানং অত্থমঞ্ঞাতুং…পে… অত্থি দেৱা বুদ্ধে পসন্না…পে… সম্মাদিট্ঠিকা, নো চ ৱত ৰে ৱত্তব্বে – ‘‘নত্থি দেৱেসু ব্ৰহ্মচৰিযৱাসো’’তি.

২৭০. অত্থি দেৱেসু ব্ৰহ্মচৰিযৱাসোতি? আমন্তা. অত্থি তত্থ পব্বজ্জা মুণ্ডিযং কাসাৱধাৰণা পত্তধাৰণা, দেৱেসু সম্মাসম্বুদ্ধা উপ্পজ্জন্তি, পচ্চেকসম্বুদ্ধা উপ্পজ্জন্তি, সাৱকযুগং উপ্পজ্জতীতি? ন হেৱং ৱত্তব্বে…পে….

দেৱেসু পব্বজ্জা নত্থীতি, নত্থি দেৱেসু ব্ৰহ্মচৰিযৱাসোতি? আমন্তা. যত্থ অত্থি পব্বজ্জা তত্থেৱ ব্ৰহ্মচৰিযৱাসো, যত্থ নত্থি পব্বজ্জা নত্থি তত্থ ব্ৰহ্মচৰিযৱাসোতি? ন হেৱং ৱত্তব্বে…পে… যত্থ অত্থি পব্বজ্জা তত্থেৱ ব্ৰহ্মচৰিযৱাসো, যত্থ নত্থি পব্বজ্জা নত্থি তত্থ ব্ৰহ্মচৰিযৱাসোতি? আমন্তা. যো পব্বজতি তস্সেৱ ব্ৰহ্মচৰিযৱাসো, যো ন পব্বজতি নত্থি তস্স ব্ৰহ্মচৰিযৱাসোতি? ন হেৱং ৱত্তব্বে…পে….

দেৱেসু মুণ্ডিযং নত্থীতি, নত্থি দেৱেসু ব্ৰহ্মচৰিযৱাসোতি? আমন্তা. যত্থ অত্থি মুণ্ডিযং তত্থেৱ ব্ৰহ্মচৰিযৱাসো, যত্থ নত্থি মুণ্ডিযং নত্থি তত্থ ব্ৰহ্মচৰিযৱাসোতি? ন হেৱং ৱত্তব্বে…পে… যত্থ অত্থি মুণ্ডিযং তত্থেৱ ব্ৰহ্মচৰিযৱাসো, যত্থ নত্থি মুণ্ডিযং নত্থি তত্থ ব্ৰহ্মচৰিযৱাসোতি? আমন্তা. যো মুণ্ডো হোতি তস্সেৱ ব্ৰহ্মচৰিযৱাসো, যো মুণ্ডো ন হোতি নত্থি তস্স ব্ৰহ্মচৰিযৱাসোতি? ন হেৱং ৱত্তব্বে…পে….

দেৱেসু কাসাৱধাৰণা নত্থীতি, নত্থি দেৱেসু ব্ৰহ্মচৰিযৱাসোতি? আমন্তা. যত্থ অত্থি কাসাৱধাৰণা তত্থেৱ ব্ৰহ্মচৰিযৱাসো, যত্থ নত্থি কাসাৱধাৰণা নত্থি তত্থ ব্ৰহ্মচৰিযৱাসোতি? ন হেৱং ৱত্তব্বে…পে… যত্থ অত্থি কাসাৱধাৰণা তত্থেৱ ব্ৰহ্মচৰিযৱাসো, যত্থ নত্থি কাসাৱধাৰণা নত্থি তত্থ ব্ৰহ্মচৰিযৱাসোতি? আমন্তা. যো কাসাৱং ধাৰেতি তস্সেৱ ব্ৰহ্মচৰিযৱাসো, যো কাসাৱং ন ধাৰেতি নত্থি তস্স ব্ৰহ্মচৰিযৱাসোতি? ন হেৱং ৱত্তব্বে…পে….

দেৱেসু পত্তধাৰণা নত্থীতি, নত্থি দেৱেসু ব্ৰহ্মচৰিযৱাসোতি? আমন্তা. যত্থ অত্থি পত্তধাৰণা তত্থেৱ ব্ৰহ্মচৰিযৱাসো, যত্থ নত্থি পত্তধাৰণা নত্থি তত্থ ব্ৰহ্মচৰিযৱাসোতি? ন হেৱং ৱত্তব্বে…পে… যত্থ অত্থি পত্তধাৰণা তত্থেৱ ব্ৰহ্মচৰিযৱাসো, যত্থ নত্থি পত্তধাৰণা নত্থি তত্থ ব্ৰহ্মচৰিযৱাসোতি? আমন্তা? যো পত্তং ধাৰেতি তস্সেৱ ব্ৰহ্মচৰিযৱাসো, যো পত্তং ন ধাৰেতি নত্থি তস্স ব্ৰহ্মচৰিযৱাসোতি? ন হেৱং ৱত্তব্বে…পে….

দেৱেসু সম্মাসম্বুদ্ধা নুপ্পজ্জন্তীতি, নত্থি দেৱেসু ব্ৰহ্মচৰিযৱাসোতি? আমন্তা. যত্থ সম্মাসম্বুদ্ধা উপ্পজ্জন্তি তত্থেৱ ব্ৰহ্মচৰিযৱাসো, যত্থ সম্মাসম্বুদ্ধা নুপ্পজ্জন্তি নত্থি তত্থ ব্ৰহ্মচৰিযৱাসোতি? ন হেৱং ৱত্তব্বে…পে… যত্থ সম্মাসম্বুদ্ধা উপ্পজ্জন্তি তত্থেৱ ব্ৰহ্মচৰিযৱাসো, যত্থ সম্মাসম্বুদ্ধা নুপ্পজ্জন্তি নত্থি তত্থ ব্ৰহ্মচৰিযৱাসোতি? আমন্তা. লুম্বিনিযা ভগৱা জাতো, বোধিযা মূলে অভিসম্বুদ্ধো, বাৰাণসিযং ভগৱতা ধম্মচক্কং পৱত্তিতং; তত্থেৱ ব্ৰহ্মচৰিযৱাসো, নত্থঞ্ঞত্ৰ ব্ৰহ্মচৰিযৱাসোতি? ন হেৱং ৱত্তব্বে…পে….

দেৱেসু পচ্চেকসম্বুদ্ধা নুপ্পজ্জন্তীতি, নত্থি দেৱেসু ব্ৰহ্মচৰিযৱাসোতি? আমন্তা. যত্থ পচ্চেকসম্বুদ্ধা উপ্পজ্জন্তি তত্থেৱ ব্ৰহ্মচৰিযৱাসো, যত্থ পচ্চেকসম্বুদ্ধা নুপ্পজ্জন্তি নত্থি তত্থ ব্ৰহ্মচৰিযৱাসোতি? ন হেৱং ৱত্তব্বে…পে… যত্থ পচ্চেকসম্বুদ্ধা উপ্পজ্জন্তি তত্থেৱ ব্ৰহ্মচৰিযৱাসো, যত্থ পচ্চেকসম্বুদ্ধা নুপ্পজ্জন্তি নত্থি তত্থ ব্ৰহ্মচৰিযৱাসোতি? আমন্তা. মজ্ঝিমেসু জনপদেসু পচ্চেকসম্বুদ্ধা উপ্পজ্জন্তি, তত্থেৱ ব্ৰহ্মচৰিযৱাসো, নত্থঞ্ঞত্ৰ ব্ৰহ্মচৰিযৱাসোতি? ন হেৱং ৱত্তব্বে…পে….

দেৱেসু সাৱকযুগং নুপ্পজ্জতীতি, নত্থি দেৱেসু ব্ৰহ্মচৰিযৱাসোতি? আমন্তা. যত্থ সাৱকযুগং উপ্পজ্জতি তত্থেৱ ব্ৰহ্মচৰিযৱাসো, যত্থ সাৱকযুগং নুপ্পজ্জতি নত্থি তত্থ ব্ৰহ্মচৰিযৱাসোতি? ন হেৱং ৱত্তব্বে…পে… যত্থ সাৱকযুগং উপ্পজ্জতি তত্থেৱ ব্ৰহ্মচৰিযৱাসো, যত্থ সাৱকযুগং নুপ্পজ্জতি নত্থি তত্থ ব্ৰহ্মচৰিযৱাসোতি? আমন্তা. মগধেসু সাৱকযুগং উপ্পন্নং, তত্থেৱ ব্ৰহ্মচৰিযৱাসো, নত্থঞ্ঞত্ৰ ব্ৰহ্মচৰিযৱাসোতি? ন হেৱং ৱত্তব্বে…পে….

২৭১. অত্থি দেৱেসু ব্ৰহ্মচৰিযৱাসোতি? আমন্তা. সব্বদেৱেসু অত্থি ব্ৰহ্মচৰিযৱাসোতি? ন হেৱং ৱত্তব্বে…পে….

অত্থি মনুস্সেসু ব্ৰহ্মচৰিযৱাসোতি? আমন্তা. সব্বমনুস্সেসু অত্থি ব্ৰহ্মচৰিযৱাসোতি? ন হেৱং ৱত্তব্বে…পে….

অত্থি দেৱেসু ব্ৰহ্মচৰিযৱাসোতি? আমন্তা. অসঞ্ঞসত্তেসু দেৱেসু অত্থি ব্ৰহ্মচৰিযৱাসোতি? ন হেৱং ৱত্তব্বে…পে….

অত্থি মনুস্সেসু ব্ৰহ্মচৰিযৱাসোতি? আমন্তা. পচ্চন্তিমেসু জনপদেসু অত্থি ব্ৰহ্মচৰিযৱাসো মিলক্খেসু [মিলক্খূসু (স্যা. ক.)] অৱিঞ্ঞাতাৰেসু যত্থ নত্থি গতি ভিক্খূনং ভিক্খুনীনং উপাসকানং উপাসিকানন্তি? ন হেৱং ৱত্তব্বে.

অত্থি দেৱেসু ব্ৰহ্মচৰিযৱাসোতি? অত্থি যত্থ অত্থি, অত্থি যত্থ নত্থীতি. অসঞ্ঞসত্তেসু দেৱেসু অত্থি যত্থ অত্থি, অত্থি যত্থ নত্থি ব্ৰহ্মচৰিযৱাসো, সঞ্ঞসত্তেসু [অসঞ্ঞসত্তেসু (ক.)] দেৱেসু অত্থি যত্থ অত্থি, অত্থি যত্থ নত্থি ব্ৰহ্মচৰিযৱাসোতি? ন হেৱং ৱত্তব্বে.

দেৱেসু অত্থি যত্থ অত্থি, অত্থি যত্থ নত্থি ব্ৰহ্মচৰিযৱাসোতি? আমন্তা. কত্থ অত্থি, কত্থ নত্থীতি? অসঞ্ঞসত্তেসু দেৱেসু নত্থি ব্ৰহ্মচৰিযৱাসো, সঞ্ঞসত্তেসু [অসঞ্ঞসত্তেসু (ক.)] দেৱেসু অত্থি ব্ৰহ্মচৰিযৱাসোতি. অসঞ্ঞসত্তেসু দেৱেসু নত্থি ব্ৰহ্মচৰিযৱাসোতি? আমন্তা. সঞ্ঞসত্তেসু [অসঞ্ঞসত্তেসু (ক.)] দেৱেসু নত্থি ব্ৰহ্মচৰিযৱাসোতি? ন হেৱং ৱত্তব্বে.

সঞ্ঞসত্তেসু দেৱেসু অত্থি ব্ৰহ্মচৰিযৱাসোতি? আমন্তা. অসঞ্ঞসত্তেসু দেৱেসু অত্থি ব্ৰহ্মচৰিযৱাসোতি? ন হেৱং ৱত্তব্বে.

অত্থি মনুস্সেসু ব্ৰহ্মচৰিযৱাসোতি? অত্থি যত্থ অত্থি, অত্থি যত্থ নত্থীতি. পচ্চন্তিমেসু জনপদেসু অত্থি যত্থ অত্থি, অত্থি যত্থ নত্থি ব্ৰহ্মচৰিযৱাসো মিলক্খেসু অৱিঞ্ঞাতাৰেসু যত্থ নত্থি গতি ভিক্খূনং ভিক্খুনীনং উপাসকানং উপাসিকানং, মজ্ঝিমেসু জনপদেসু অত্থি যত্থ অত্থি, অত্থি যত্থ নত্থি ব্ৰহ্মচৰিযৱাসোতি? ন হেৱং ৱত্তব্বে.

মনুস্সেসু অত্থি যত্থ অত্থি, অত্থি যত্থ নত্থি ব্ৰহ্মচৰিযৱাসোতি? আমন্তা. কত্থ অত্থি, কত্থ নত্থীতি? পচ্চন্তিমেসু জনপদেসু নত্থি ব্ৰহ্মচৰিযৱাসো মিলক্খেসু অৱিঞ্ঞাতাৰেসু যত্থ নত্থি গতি ভিক্খূনং ভিক্খুনীনং উপাসকানং উপাসিকানং, মজ্ঝিমেসু জনপদেসু অত্থি ব্ৰহ্মচৰিযৱাসোতি. পচ্চন্তিমেসু জনপদেসু নত্থি ব্ৰহ্মচৰিযৱাসো মিলক্খেসু অৱিঞ্ঞাতাৰেসু যত্থ নত্থি গতি ভিক্খূনং ভিক্খুনীনং উপাসকানং উপাসিকানন্তি? আমন্তা. মজ্ঝিমেসু জনপদেসু নত্থি ব্ৰহ্মচৰিযৱাসোতি? ন হেৱং ৱত্তব্বে.

মজ্ঝিমেসু জনপদেসু অত্থি ব্ৰহ্মচৰিযৱাসোতি? আমন্তা. পচ্চন্তিমেসু জনপদেসু অত্থি ব্ৰহ্মচৰিযৱাসো মিলক্খেসু অৱিঞ্ঞাতাৰেসু যত্থ নত্থি গতি ভিক্খূনং ভিক্খুনীনং উপাসকানং উপাসিকানন্তি? ন হেৱং ৱত্তব্বে.

অত্থি দেৱেসু ব্ৰহ্মচৰিযৱাসোতি? আমন্তা. ননু ৱুত্তং ভগৱতা – ‘‘তীহি, ভিক্খৱে, ঠানেহি জম্বুদীপকা মনুস্সা উত্তৰকুৰুকে চ মনুস্সে অধিগ্গণ্হন্তি দেৱে চ তাৱতিংসে! কতমেহি তীহি? সূৰা, সতিমন্তো, ইধ ব্ৰহ্মচৰিযৱাসো’’তি [অ. নি. ৯.২১]. অত্থেৱ সুত্তন্তোতি? আমন্তা. তেন হি নত্থি দেৱেসু ব্ৰহ্মচৰিযৱাসোতি.

সাৱত্থিযং ৱুত্তং ভগৱতা – ‘‘ইধ ব্ৰহ্মচৰিযৱাসো’’তি? আমন্তা. সাৱত্থিযংযেৱ ব্ৰহ্মচৰিযৱাসো, নত্থি অঞ্ঞত্ৰ ব্ৰহ্মচৰিযৱাসোতি? ন হেৱং ৱত্তব্বে.

২৭২. অনাগামিস্স পুগ্গলস্স পঞ্চোৰম্ভাগিযানি সংযোজনানি পহীনানি, পঞ্চুদ্ধম্ভাগিযানি সংযোজনানি অপ্পহীনানি, ইতো চুতস্স তত্থ উপপন্নস্স কুহিং ফলুপ্পত্তীতি? তত্থেৱ. হঞ্চি অনাগামিস্স পুগ্গলস্স পঞ্চোৰম্ভাগিযানি সংযোজনানি পহীনানি, পঞ্চুদ্ধম্ভাগিযানি সংযোজনানি অপ্পহীনানি, ইতো চুতস্স তত্থ উপপন্নস্স তহিং ফলুপ্পত্তি; নো চ ৱত ৰে ৱত্তব্বে – ‘‘নত্থি দেৱেসু ব্ৰহ্মচৰিযৱাসো’’তি.

অনাগামিস্স পুগ্গলস্স পঞ্চোৰম্ভাগিযানি সংযোজনানি পহীনানি, পঞ্চুদ্ধম্ভাগিযানি সংযোজনানি অপ্পহীনানি, ইতো চুতস্স তত্থ উপপন্নস্স কুহিং ভাৰোহৰণং, কুহিং দুক্খপৰিঞ্ঞাতং, কুহিং কিলেসপ্পহানং, কুহিং নিৰোধসচ্ছিকিৰিযা, কুহিং অকুপ্পপটিৱেধোতি? তত্থেৱ. হঞ্চি অনাগামিস্স পুগ্গলস্স পঞ্চোৰম্ভাগিযানি সংযোজনানি পহীনানি, পঞ্চুদ্ধম্ভাগিযানি সংযোজনানি অপ্পহীনানি, ইতো চুতস্স তত্থ উপপন্নস্স তহিং অকুপ্পপটিৱেধো; নো চ ৱত ৰে ৱত্তব্বে – ‘‘নত্থি দেৱেসু ব্ৰহ্মচৰিযৱাসো’’তি.

অনাগামিস্স পুগ্গলস্স পঞ্চোৰম্ভাগিযানি সংযোজনানি পহীনানি, পঞ্চুদ্ধম্ভাগিযানি সংযোজনানি অপ্পহীনানি, ইতো চুতস্স তত্থ উপপন্নস্স তহিং ফলুপ্পত্তি, তহিং ভাৰোহৰণং, তহিং দুক্খপৰিঞ্ঞাতং, তহিং কিলেসপ্পহানং, তহিং নিৰোধসচ্ছিকিৰিযা, তহিং অকুপ্পপটিৱেধো; কেনট্ঠেন ৱদেসি – ‘‘নত্থি দেৱেসু ব্ৰহ্মচৰিযৱাসো’’তি? হন্দ হি অনাগামী পুগ্গলো ইধ ভাৱিতেন মগ্গেন তত্থ ফলং সচ্ছিকৰোতীতি [সচ্ছিকৰোতি (বহূসু)].

২. সংসন্দনব্ৰহ্মচৰিযকথা

২৭৩. অনাগামী পুগ্গলো ইধ ভাৱিতেন মগ্গেন তত্থ ফলং সচ্ছিকৰোতীতি? আমন্তা. সোতাপন্নো পুগ্গলো তত্থ ভাৱিতেন মগ্গেন ইধ ফলং সচ্ছিকৰোতীতি? ন হেৱং ৱত্তব্বে.

অনাগামী পুগ্গলো ইধ ভাৱিতেন মগ্গেন তত্থ ফলং সচ্ছিকৰোতীতি? আমন্তা. সকদাগামী পুগ্গলো ইধ পৰিনিব্বাযিপুগ্গলো [ইধপৰিনিব্বাযী (?)] তত্থ ভাৱিতেন মগ্গেন ইধ ফলং সচ্ছিকৰোতীতি? ন হেৱং ৱত্তব্বে.

সোতাপন্নো পুগ্গলো ইধ ভাৱিতেন মগ্গেন ইধ ফলং সচ্ছিকৰোতীতি? আমন্তা. অনাগামী পুগ্গলো তত্থ ভাৱিতেন মগ্গেন তত্থ ফলং সচ্ছিকৰোতীতি? ন হেৱং ৱত্তব্বে.

সকদাগামী পুগ্গলো ইধ পৰিনিব্বাযিপুগ্গলো ইধ ভাৱিতেন মগ্গেন ইধ ফলং সচ্ছিকৰোতীতি? আমন্তা. অনাগামী পুগ্গলো তত্থ ভাৱিতেন মগ্গেন তত্থ ফলং সচ্ছিকৰোতীতি? ন হেৱং ৱত্তব্বে…পে….

ইধ ৱিহায নিট্ঠস্স পুগ্গলস্স মগ্গো চ ভাৱীযতি, ন চ কিলেসা পহীযন্তীতি? আমন্তা. সোতাপত্তিফলসচ্ছিকিৰিযায পটিপন্নস্স পুগ্গলস্স মগ্গো চ ভাৱীযতি, ন চ কিলেসা পহীযন্তীতি? ন হেৱং ৱত্তব্বে…পে….

ইধ ৱিহায নিট্ঠস্স পুগ্গলস্স মগ্গো চ ভাৱীযতি, ন চ কিলেসা পহীযন্তীতি? আমন্তা. সকদাগামিফলসচ্ছিকিৰিযায পটিপন্নস্স পুগ্গলস্স…পে… অৰহত্তসচ্ছিকিৰিযায পটিপন্নস্স পুগ্গলস্স মগ্গো চ ভাৱীযতি, ন চ কিলেসা পহীযন্তীতি? ন হেৱং ৱত্তব্বে…পে….

সোতাপত্তিফলসচ্ছিকিৰিযায পটিপন্নস্স পুগ্গলস্স অপুব্বং অচৰিমং মগ্গো চ ভাৱীযতি, কিলেসা চ পহীযন্তীতি? আমন্তা. ইধ ৱিহায নিট্ঠস্স পুগ্গলস্স অপুব্বং অচৰিমং মগ্গো চ ভাৱীযতি, কিলেসা চ পহীযন্তীতি? ন হেৱং ৱত্তব্বে.

সকদাগামিফলসচ্ছিকিৰিযায পটিপন্নস্স পুগ্গলস্স…পে… অৰহত্তসচ্ছিকিৰিযায পটিপন্নস্স পুগ্গলস্স অপুব্বং অচৰিমং মগ্গো চ ভাৱীযতি, কিলেসা চ পহীযন্তীতি? আমন্তা. ইধ ৱিহায নিট্ঠস্স পুগ্গলস্স অপুব্বং অচৰিমং মগ্গো চ ভাৱীযতি, কিলেসা চ পহীযন্তীতি? ন হেৱং ৱত্তব্বে.

অনাগামী পুগ্গলো কতকৰণীযো ভাৱিতভাৱনো তত্থ উপপজ্জতীতি? আমন্তা. অৰহা উপপজ্জতীতি? ন হেৱং ৱত্তব্বে.

অৰহা উপপজ্জতীতি? আমন্তা. অত্থি অৰহতো পুনব্ভৱোতি? ন হেৱং ৱত্তব্বে.

অত্থি অৰহতো পুনব্ভৱোতি? আমন্তা. অৰহা ভৱেন ভৱং গচ্ছতি, গতিযা গতিং গচ্ছতি, সংসাৰেন সংসাৰং গচ্ছতি, উপপত্তিযা উপপত্তিং গচ্ছতীতি? ন হেৱং ৱত্তব্বে.

অনাগামী পুগ্গলো কতকৰণীযো ভাৱিতভাৱনো অনোহটভাৰো তত্থ উপপজ্জতীতি? আমন্তা. ভাৰোহৰণায পুন মগ্গং ভাৱেতীতি? ন হেৱং ৱত্তব্বে.

অনাগামী পুগ্গলো কতকৰণীযো ভাৱিতভাৱনো অপৰিঞ্ঞাতদুক্খো অপ্পহীনকিলেসো অসচ্ছিকতনিৰোধো অপ্পটিৱিদ্ধাকুপ্পো তত্থ উপপজ্জতীতি? আমন্তা. অকুপ্পপটিৱেধায পুন মগ্গং ভাৱেতীতি? ন হেৱং ৱত্তব্বে.

অনাগামী পুগ্গলো কতকৰণীযো ভাৱিতভাৱনো অনোহটভাৰো তত্থ উপপজ্জতি, ন চ ভাৰোহৰণায পুন মগ্গং ভাৱেতীতি? আমন্তা. অনোহটভাৰো চ তত্থ পৰিনিব্বাযতীতি? ন হেৱং ৱত্তব্বে.

অনাগামী পুগ্গলো কতকৰণীযো ভাৱিতভাৱনো অপৰিঞ্ঞাতদুক্খো অপ্পহীনকিলেসো অসচ্ছিকতনিৰোধো অপ্পটিৱিদ্ধাকুপ্পো তত্থ উপপজ্জতি, ন চ অকুপ্পপটিৱেধায পুন মগ্গং ভাৱেতীতি? আমন্তা. অপ্পটিৱিদ্ধাকুপ্পো চ তত্থ পৰিনিব্বাযতীতি? ন হেৱং ৱত্তব্বে. যথা মিগো সল্লেন ৱিদ্ধো দূৰম্পি গন্ত্ৱা কালং কৰোতি, এৱমেৱং অনাগামী পুগ্গলো ইধ ভাৱিতেন মগ্গেন তত্থ ফলং সচ্ছিকৰোতীতি.

যথা মিগো সল্লেন ৱিদ্ধো দূৰম্পি গন্ত্ৱা সসল্লোৱ কালং কৰোতি, এৱমেৱং অনাগামী পুগ্গলো ইধ ভাৱিতেন মগ্গেন তত্থ সসল্লোৱ পৰিনিব্বাযতীতি? ন হেৱং ৱত্তব্বে…পে….

ব্ৰহ্মচৰিযকথা নিট্ঠিতা.

৩. ওধিসোকথা

২৭৪. ওধিসোধিসো কিলেসে জহতীতি? আমন্তা. সোতাপত্তিফলসচ্ছিকিৰিযায পটিপন্নো পুগ্গলো দুক্খদস্সনেন কিং জহতীতি? সক্কাযদিট্ঠিং ৱিচিকিচ্ছং সীলব্বতপৰামাসং তদেকট্ঠে চ কিলেসে একদেসে জহতীতি. একদেসং সোতাপন্নো, একদেসং ন সোতাপন্নো, একদেসং সোতাপত্তিফলপ্পত্তো [সোতাপত্তিফলং পত্তো (?)] পটিলদ্ধো অধিগতো সচ্ছিকতো উপসম্পজ্জ ৱিহৰতি, কাযেন ফুসিত্ৱা ৱিহৰতি, একদেসং ন কাযেন ফুসিত্ৱা ৱিহৰতি, একদেসং সত্তক্খত্তুপৰমো, কোলঙ্কোলো, একবীজী, বুদ্ধে অৱেচ্চপ্পসাদেন সমন্নাগতো, ধম্মে…পে… সঙ্ঘে…পে… অৰিযকন্তেহি সীলেহি সমন্নাগতো একদেসং অৰিযকন্তেহি সীলেহি ন সমন্নাগতোতি? ন হেৱং ৱত্তব্বে…পে….

সমুদযদস্সনেন কিং জহতীতি? সক্কাযদিট্ঠিং জহতি, ৱিচিকিচ্ছং সীলব্বতপৰামাসং তদেকট্ঠে চ কিলেসে একদেসে জহতীতি. একদেসং সোতাপন্নো, একদেসং ন সোতাপন্নো…পে… একদেসং অৰিযকন্তেহি সীলেহি সমন্নাগতো, একদেসং অৰিযকন্তেহি সীলেহি ন সমন্নাগতোতি? ন হেৱং ৱত্তব্বে…পে….

নিৰোধদস্সনেন কিং জহতীতি? ৱিচিকিচ্ছং সীলব্বতপৰামাসং তদেকট্ঠে চ কিলেসে একদেসে জহতীতি. একদেসং সোতাপন্নো, একদেসং ন সোতাপন্নো…পে… একদেসং অৰিযকন্তেহি সীলেহি সমন্নাগতো, একদেসং অৰিযকন্তেহি সীলেহি ন সমন্নাগতোতি? ন হেৱং ৱত্তব্বে…পে….

মগ্গদস্সনেন কিং জহতীতি? সীলব্বতপৰামাসং তদেকট্ঠে চ কিলেসে জহতীতি. একদেসং সোতাপন্নো, একদেসং ন সোতাপন্নো, একদেসং সোতাপত্তিফলপ্পত্তো পটিলদ্ধো অধিগতো সচ্ছিকতো উপসম্পজ্জ ৱিহৰতি, কাযেন ফুসিত্ৱা ৱিহৰতি, একদেসং ন কাযেন ফুসিত্ৱা ৱিহৰতি, একদেসং সত্তক্খত্তুপৰমো, কোলঙ্কোলো, একবীজী, বুদ্ধে অৱেচ্চপ্পসাদেন সমন্নাগতো, ধম্মে…পে… সঙ্ঘে…পে… অৰিযকন্তেহি সীলেহি সমন্নাগতো, একদেসং অৰিযকন্তেহি সীলেহি ন সমন্নাগতোতি? ন হেৱং ৱত্তব্বে…পে….

২৭৫. সকদাগামিফলসচ্ছিকিৰিযায পটিপন্নো পুগ্গলো দুক্খদস্সনেন কিং জহতীতি? ওড়াৰিকং কামৰাগং জহতি, ওড়াৰিকং ব্যাপাদং তদেকট্ঠে চ কিলেসে একদেসে জহতীতি. একদেসং সকদাগামী, একদেসং ন সকদাগামী, একদেসং সকদাগামিফলপ্পত্তো [সকদাগামিফলং পত্তো (?)] পটিলদ্ধো অধিগতো সচ্ছিকতো উপসম্পজ্জ ৱিহৰতি, কাযেন ফুসিত্ৱা ৱিহৰতি, একদেসং ন কাযেন ফুসিত্ৱা ৱিহৰতীতি? ন হেৱং ৱত্তব্বে…পে….

সমুদযদস্সনেন কিং জহতীতি? ওড়াৰিকং কামৰাগং জহতি, ওড়াৰিকং ব্যাপাদং তদেকট্ঠে চ কিলেসে একদেসে জহতীতি. একদেসং সকদাগামী, একদেসং ন সকদাগামী, একদেসং সকদাগামিফলপ্পত্তো পটিলদ্ধো অধিগতো সচ্ছিকতো উপসম্পজ্জ ৱিহৰতি, কাযেন ফুসিত্ৱা ৱিহৰতি, একদেসং ন কাযেন ফুসিত্ৱা ৱিহৰতীতি? ন হেৱং ৱত্তব্বে…পে….

নিৰোধদস্সনেন কিং জহতীতি? ওড়াৰিকং ব্যাপাদং জহতি, তদেকট্ঠে চ কিলেসে একদেসে জহতীতি. একদেসং সকদাগামী, একদেসং ন সকদাগামী, একদেসং সকদাগামিফলপ্পত্তো পটিলদ্ধো অধিগতো সচ্ছিকতো উপসম্পজ্জ ৱিহৰতি, কাযেন ফুসিত্ৱা ৱিহৰতি, একদেসং ন কাযেন ফুসিত্ৱা ৱিহৰতীতি? ন হেৱং ৱত্তব্বে…পে….

মগ্গদস্সনেন কিং জহতীতি? ওড়াৰিকং ব্যাপাদং জহতি, তদেকট্ঠে চ কিলেসে জহতীতি. একদেসং সকদাগামী, একদেসং ন সকদাগামী, একদেসং সকদাগামিফলপ্পত্তো পটিলদ্ধো অধিগতো সচ্ছিকতো উপসম্পজ্জ ৱিহৰতি, কাযেন ফুসিত্ৱা ৱিহৰতি, একদেসং ন কাযেন ফুসিত্ৱা ৱিহৰতীতি? ন হেৱং ৱত্তব্বে…পে….

২৭৬. অনাগামিফলসচ্ছিকিৰিযায পটিপন্নো পুগ্গলো দুক্খদস্সনেন কিং জহতীতি? অণুসহগতং কামৰাগং জহতি, অণুসহগতং ব্যাপাদং তদেকট্ঠে চ কিলেসে একদেসে জহতীতি. একদেসং অনাগামী, একদেসং ন অনাগামী, একদেসং অনাগামিফলপ্পত্তো [অনাগামিফলং পত্তো (?)] পটিলদ্ধো অধিগতো সচ্ছিকতো উপসম্পজ্জ ৱিহৰতি, কাযেন ফুসিত্ৱা ৱিহৰতি, একদেসং ন কাযেন ফুসিত্ৱা ৱিহৰতি, একদেসং অন্তৰাপৰিনিব্বাযী, উপহচ্চপৰিনিব্বাযী, অসঙ্খাৰপৰিনিব্বাযী, সসঙ্খাৰপৰিনিব্বাযী, উদ্ধংসোতো অকনিট্ঠগামী, একদেসং ন উদ্ধংসোতো অকনিট্ঠগামীতি? ন হেৱং ৱত্তব্বে…পে….

সমুদযদস্সনেন কিং জহতীতি? অণুসহগতং কামৰাগং জহতি, অণুসহগতং ব্যাপাদং তদেকট্ঠে চ কিলেসে একদেসে জহতীতি. একদেসং অনাগামী, একদেসং ন অনাগামী…পে… একদেসং উদ্ধংসোতো অকনিট্ঠগামী, একদেসং ন উদ্ধংসোতো অকনিট্ঠগামীতি? ন হেৱং ৱত্তব্বে…পে….

নিৰোধদস্সনেন কিং জহতীতি? অণুসহগতং ব্যাপাদং জহতি, তদেকট্ঠে চ কিলেসে একদেসে জহতীতি. একদেসং অনাগামী, একদেসং ন অনাগামী…পে… একদেসং উদ্ধংসোতো অকনিট্ঠগামী, একদেসং ন উদ্ধংসোতো অকনিট্ঠগামীতি? ন হেৱং ৱত্তব্বে…পে….

মগ্গদস্সনেন কিং জহতীতি? তদেকট্ঠে চ কিলেসে জহতীতি. একদেসং অনাগামী, একদেসং ন অনাগামী, একদেসং অনাগামিফলপ্পত্তো পটিলদ্ধো অধিগতো সচ্ছিকতো উপসম্পজ্জ ৱিহৰতি, কাযেন ফুসিত্ৱা ৱিহৰতি, একদেসং ন কাযেন ফুসিত্ৱা ৱিহৰতি, একদেসং অন্তৰাপৰিনিব্বাযী, উপহচ্চপৰিনিব্বাযী, অসঙ্খাৰপৰিনিব্বাযী, সসঙ্খাৰপৰিনিব্বাযী, উদ্ধংসোতো অকনিট্ঠগামী, একদেসং ন উদ্ধংসোতো অকনিট্ঠগামীতি? ন হেৱং ৱত্তব্বে…পে….

২৭৭. অৰহত্তসচ্ছিকিৰিযায পটিপন্নো পুগ্গলো দুক্খদস্সনেন কিং জহতীতি? ৰূপৰাগং অৰূপৰাগং মানং উদ্ধচ্চং অৱিজ্জং তদেকট্ঠে চ কিলেসে একদেসে জহতীতি. একদেসং অৰহা, একদেসং ন অৰহা, একদেসং অৰহত্তপ্পত্তো [অৰহত্তং পত্তো (?)] পটিলদ্ধো অধিগতো সচ্ছিকতো উপসম্পজ্জ ৱিহৰতি, কাযেন ফুসিত্ৱা ৱিহৰতি, একদেসং ন কাযেন ফুসিত্ৱা ৱিহৰতি, একদেসং ৱীতৰাগো ৱীতদোসো ৱীতমোহো কতকৰণীযো ওহিতভাৰো অনুপ্পত্তসদত্থো পৰিক্খীণভৱসংযোজনো সম্মদঞ্ঞাৱিমুত্তো উক্খিত্তপলিঘো সঙ্কিণ্ণপৰিখো অব্বূড়্হেসিকো নিৰগ্গড়ো অৰিযো পন্নদ্ধজো পন্নভাৰো ৱিসঞ্ঞুত্তো সুৱিজিতৱিজযো, দুক্খং তস্স পৰিঞ্ঞাতং, সমুদযো পহীনো, নিৰোধো সচ্ছিকতো, মগ্গো ভাৱিতো, অভিঞ্ঞেয্যং অভিঞ্ঞাতং, পৰিঞ্ঞেয্যং পৰিঞ্ঞাতং, পহাতব্বং পহীনং, ভাৱেতব্বং ভাৱিতং, সচ্ছিকাতব্বং সচ্ছিকতং, (একদেসং সচ্ছিকাতব্বং সচ্ছিকতং,) [( ) (?)] একদেসং সচ্ছিকাতব্বং ন সচ্ছিকতন্তি? ন হেৱং ৱত্তব্বে…পে….

সমুদযদস্সনেন কিং জহতীতি? ৰূপৰাগং অৰূপৰাগং জহতি, মানং উদ্ধচ্চং অৱিজ্জং তদেকট্ঠে চ কিলেসে একদেসে জহতীতি. একদেসং অৰহা, একদেসং ন অৰহা…পে… একদেসং সচ্ছিকাতব্বং সচ্ছিকতং, একদেসং সচ্ছিকাতব্বং ন সচ্ছিকতন্তি? ন হেৱং ৱত্তব্বে…পে….

নিৰোধদস্সনেন কিং জহতীতি? মানং জহতি, উদ্ধচ্চং অৱিজ্জং তদেকট্ঠে চ কিলেসে একদেসে জহতীতি. একদেসং অৰহা, একদেসং ন অৰহা …পে… একদেসং সচ্ছিকাতব্বং সচ্ছিকতং, একদেসং সচ্ছিকাতব্বং ন সচ্ছিকতন্তি? ন হেৱং ৱত্তব্বে…পে….

মগ্গদস্সনেন কিং জহতীতি? উদ্ধচ্চং অৱিজ্জং তদেকট্ঠে চ কিলেসে জহতীতি. একদেসং অৰহা, একদেসং ন অৰহা, একদেসং অৰহত্তপ্পত্তো পটিলদ্ধো অধিগতো সচ্ছিকতো উপসম্পজ্জ ৱিহৰতি, কাযেন ফুসিত্ৱা ৱিহৰতি, একদেসং ন কাযেন ফুসিত্ৱা ৱিহৰতি, একদেসং ৱীতৰাগো ৱীতদোসো ৱীতমোহো কতকৰণীযো ওহিতভাৰো অনুপ্পত্তসদত্থো পৰিক্খীণভৱসংযোজনো সম্মদঞ্ঞাৱিমুত্তো উক্খিত্তপলিঘো সঙ্কিণ্ণপৰিখো অব্বূড়্হেসিকো নিৰগ্গড়ো অৰিযো পন্নদ্ধজো পন্নভাৰো ৱিসঞ্ঞুত্তো সুৱিজিতৱিজযো, দুক্খং তস্স পৰিঞ্ঞাতং, সমুদযো পহীনো, নিৰোধো সচ্ছিকতো, মগ্গো ভাৱিতো, অভিঞ্ঞেয্যং অভিঞ্ঞাতং, পৰিঞ্ঞেয্যং পৰিঞ্ঞাতং, পহাতব্বং পহীনং, ভাৱেতব্বং ভাৱিতং, সচ্ছিকাতব্বং সচ্ছিকতং, একদেসং সচ্ছিকাতব্বং সচ্ছিকতং, একদেসং সচ্ছিকাতব্বং ন সচ্ছিকতন্তি? ন হেৱং ৱত্তব্বে…পে….

২৭৮. ন ৱত্তব্বং – ‘‘ওধিসোধিসো কিলেসে জহতী’’তি? আমন্তা. ননু ৱুত্তং ভগৱতা –

‘‘অনুপুব্বেন মেধাৱী, থোকং থোকং খণে খণে;

কম্মাৰো ৰজতস্সেৱ, নিদ্ধমে মলমত্তনো’’তি [ধ. প. ২৩৯ ধম্মপদে].

অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘ওধিসোধিসো কিলেসে জহতী’’তি.

ওধিসোধিসো কিলেসে জহতীতি? আমন্তা. ননু ৱুত্তং ভগৱতা –

‘‘সহাৱস্স দস্সনসম্পদায,

তযস্সু ধম্মা জহিতা ভৱন্তি;

সক্কাযদিট্ঠী ৱিচিকিচ্ছিতঞ্চ,

সীলব্বতং ৱাপি যদত্থি কিঞ্চি;

চতূহপাযেহি চ ৱিপ্পমুত্তো,

ছচ্চাভিঠানানি অভব্ব [অভব্বো (সী. স্যা.)] কাতু’’ন্তি [খু. পা. ৬.১০; সু. নি. ২৩৩].

অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘ওধিসোধিসো কিলেসে জহতী’’তি.

ওধিসোধিসো কিলেসে জহতীতি? আমন্তা. ননু ৱুত্তং ভগৱতা – ‘‘যস্মিং, ভিক্খৱে, সমযে অৰিযসাৱকস্স ৱিৰজং ৱীতমলং ধম্মচক্খুং উদপাদি – ‘যং কিঞ্চি সমুদযধম্মং, সব্বং তং নিৰোধধম্ম’ন্তি, সহ দস্সনুপ্পাদা, ভিক্খৱে, অৰিযসাৱকস্স তীণি সংযোজনানি পহীযন্তি – সক্কাযদিট্ঠি ৱিচিকিচ্ছা সীলব্বতপৰামাসো’’তি [অঙ্গুত্তৰনিকাযে]. অত্থেৱ সুত্তন্তোতি? আমন্তা. তেন হি ন ৱত্তব্বং – ‘‘ওধিসোধিসো কিলেসে জহতী’’তি.

ওধিসোকথা নিট্ঠিতা.