২১. একৱীসতিমৱগ্গো

(২০৩) ৪. ইদ্ধিকথা

৮৮৩. অত্থি অধিপ্পাযইদ্ধি বুদ্ধানং ৱা সাৱকানং ৱাতি? আমন্তা. ‘‘নিচ্চপণ্ণা ৰুক্খা হোন্তূ’’তি – অত্থি অধিপ্পাযইদ্ধি বুদ্ধানং ৱা সাৱকানং ৱাতি? ন হেৱং ৱত্তব্বে…পে… নিচ্চপুপ্ফা ৰুক্খা হোন্তু…পে… নিচ্চফলিকা ৰুক্খা হোন্তু… নিচ্চং জুণ্হং হোতু… নিচ্চং খেমং হোতু… নিচ্চং সুভিক্খং হোতু… ‘‘নিচ্চং সুৱত্থি [সুৱুট্ঠিকং (স্যা.)] হোতূ’’তি – অত্থি অধিপ্পাযইদ্ধি বুদ্ধানং ৱা সাৱকানং ৱাতি? ন হেৱং ৱত্তব্বে…পে….

অত্থি অধিপ্পাযইদ্ধি বুদ্ধানং ৱা সাৱকানং ৱাতি? আমন্তা. ‘‘উপ্পন্নো ফস্সো মা নিৰুজ্ঝী’’তি – অত্থি অধিপ্পাযইদ্ধি বুদ্ধানং ৱা সাৱকানং ৱাতি? ন হেৱং ৱত্তব্বে…পে….

উপ্পন্না ৱেদনা…পে… সঞ্ঞা… চেতনা… চিত্তং… সদ্ধা… ৱীৰিযং… সতি… সমাধি…পে… পঞ্ঞা মা নিৰুজ্ঝীতি – অত্থি অধিপ্পাযইদ্ধি বুদ্ধানং ৱা সাৱকানং ৱাতি? ন হেৱং ৱত্তব্বে…পে….

অত্থি অধিপ্পাযইদ্ধি বুদ্ধানং ৱা সাৱকানং ৱাতি? আমন্তা. ‘‘ৰূপং নিচ্চং হোতূ’’তি – অত্থি অধিপ্পাযইদ্ধি… ৱেদনা…পে… সঞ্ঞা…পে… সঙ্খাৰা…পে… ‘‘ৱিঞ্ঞাণং নিচ্চং হোতূ’’তি – অত্থি অধিপ্পাযইদ্ধি বুদ্ধানং ৱা সাৱকানং ৱাতি? ন হেৱং ৱত্তব্বে…পে….

অত্থি অধিপ্পাযইদ্ধি বুদ্ধানং ৱা সাৱকানং ৱাতি? আমন্তা. ‘‘জাতিধম্মা সত্তা মা জাযিংসূ’’তি অত্থি…পে… ‘‘জৰাধম্মা সত্তা মা জীৰিংসূ’’তি…পে… ‘‘ব্যাধিধম্মা সত্তা মা ব্যাধিযিংসূ’’তি…পে… ‘‘মৰণধম্মা সত্তা মা মীযিংসূ’’তি – অত্থি অধিপ্পাযইদ্ধি বুদ্ধানং ৱা সাৱকানং ৱাতি? ন হেৱং ৱত্তব্বে…পে….

৮৮৪. ন ৱত্তব্বং – ‘‘অত্থি অধিপ্পাযইদ্ধি বুদ্ধানং ৱা সাৱকানং ৱা’’তি? আমন্তা. ননু আযস্মা পিলিন্দৱচ্ছো ৰঞ্ঞো মাগধস্স সেনিযস্স বিম্বিসাৰস্স পাসাদং ‘‘সুৱণ্ণ’’ন্ত্ৱেৱ অধিমুচ্চি, সুৱণ্ণো চ পন আসীতি [পাৰা. ৬২১; মহাৱ. ২৭১]? আমন্তা. হঞ্চি আযস্মা পিলিন্দৱচ্ছো ৰঞ্ঞো মাগধস্স সেনিযস্স বিম্বিসাৰস্স পাসাদং সুৱণ্ণন্ত্ৱেৱ অধিমুচ্চি, সুৱণ্ণো চ পন আসি, তেন ৱত ৰে ৱত্তব্বে – ‘‘অত্থি অধিপ্পাযইদ্ধি বুদ্ধানং ৱা সাৱকানং ৱা’’তি.

ইদ্ধিকথা নিট্ঠিতা.