১৯. একূনৱীসতিমৱগ্গো

(১৯২) ৭. অচ্চন্তনিযামকথা

৮৪৭. অত্থি পুথুজ্জনস্স অচ্চন্তনিযামতাতি? আমন্তা. মাতুঘাতকো অচ্চন্তনিযতো, পিতুঘাতকো…পে… অৰহন্তঘাতকো…পে… ৰুহিৰুপ্পাদকো …পে… সঙ্ঘভেদকো অচ্চন্তনিযতোতি? ন হেৱং ৱত্তব্বে…পে….

৮৪৮. অত্থি পুথুজ্জনস্স অচ্চন্তনিযামতাতি? আমন্তা. অচ্চন্তনিযতস্স পুগ্গলস্স ৱিচিকিচ্ছা উপ্পজ্জেয্যাতি? আমন্তা. হঞ্চি অচ্চন্তনিযতস্স পুগ্গলস্স ৱিচিকিচ্ছা উপ্পজ্জেয্য, নো চ ৱত ৰে ৱত্তব্বে – ‘‘অত্থি পুথুজ্জনস্স অচ্চন্তনিযামতা’’তি.

অচ্চন্তনিযতস্স পুগ্গলস্স ৱিচিকিচ্ছা নুপ্পজ্জেয্যাতি? আমন্তা. পহীনাতি? ন হেৱং ৱত্তব্বে…পে… পহীনাতি? আমন্তা. সোতাপত্তিমগ্গেনাতি? ন হেৱং ৱত্তব্বে…পে… সকদাগামিমগ্গেন …পে… অনাগামিমগ্গেন…পে… অৰহত্তমগ্গেনাতি? ন হেৱং ৱত্তব্বে…পে….

কতমেন মগ্গেনাতি? অকুসলেন মগ্গেনাতি. অকুসলো মগ্গো নিয্যানিকো খযগামী বোধগামী অনাসৱো…পে… অসংকিলেসিকোতি? ন হেৱং ৱত্তব্বে…পে… ননু অকুসলো মগ্গো অনিয্যানিকো…পে… সংকিলেসিকোতি? আমন্তা. হঞ্চি অকুসলো মগ্গো অনিয্যানিকো…পে… সংকিলেসিকো, নো চ ৱত ৰে ৱত্তব্বে – ‘‘অচ্চন্তনিযতস্স পুগ্গলস্স ৱিচিকিচ্ছা অকুসলেন মগ্গেন পহীনা’’তি.

৮৪৯. সস্সতদিট্ঠিযা নিযতস্স পুগ্গলস্স উচ্ছেদদিট্ঠি উপ্পজ্জেয্যাতি? আমন্তা. হঞ্চি সস্সতদিট্ঠিযা নিযতস্স পুগ্গলস্স উচ্ছেদদিট্ঠি উপ্পজ্জেয্য, নো চ ৱত ৰে ৱত্তব্বে – ‘‘অত্থি পুথুজ্জনস্স অচ্চন্তনিযামতা’’তি.

সস্সতদিট্ঠিযা নিযতস্স পুগ্গলস্স উচ্ছেদদিট্ঠি নুপ্পজ্জেয্যাতি? আমন্তা. পহীনাতি? ন হেৱং ৱত্তব্বে…পে… পহীনাতি? আমন্তা. সোতাপত্তিমগ্গেনাতি? ন হেৱং ৱত্তব্বে…পে… সকদাগামিমগ্গেন…পে… অনাগামিমগ্গেন…পে… অৰহত্তমগ্গেনাতি? ন হেৱং ৱত্তব্বে…পে….

কতমেন মগ্গেনাতি? অকুসলেন মগ্গেন. অকুসলো মগ্গো…পে… নো চ ৱত ৰে ৱত্তব্বে – ‘‘সস্সতদিট্ঠিযা নিযতস্স পুগ্গলস্স উচ্ছেদদিট্ঠি অকুসলেন মগ্গেন পহীনা’’তি.

৮৫০. উচ্ছেদদিট্ঠিযা নিযতস্স পুগ্গলস্স সস্সতদিট্ঠি উপ্পজ্জেয্যাতি? আমন্তা. হঞ্চি উচ্ছেদদিট্ঠিযা নিযতস্স পুগ্গলস্স সস্সতদিট্ঠি উপ্পজ্জেয্য, নো চ ৱত ৰে ৱত্তব্বে – ‘‘অত্থি পুথুজ্জনস্স অচ্চন্তনিযামতা’’তি.

উচ্ছেদদিট্ঠিযা নিযতস্স পুগ্গলস্স সস্সতদিট্ঠি নুপ্পজ্জেয্যাতি? আমন্তা. পহীনাতি? ন হেৱং ৱত্তব্বে…পে… পহীনাতি? আমন্তা. সোতাপত্তিমগ্গেনাতি? ন হেৱং ৱত্তব্বে …পে… সকদাগামিমগ্গেন…পে… অনাগামিমগ্গেন…পে… অৰহত্তমগ্গেনাতি? ন হেৱং ৱত্তব্বে…পে….

কতমেন মগ্গেনাতি? অকুসলেন মগ্গেনাতি. অকুসলো মগ্গো…পে… নো চ ৱত ৰে ৱত্তব্বে – ‘‘উচ্ছেদদিট্ঠিযা নিযতস্স পুগ্গলস্স সস্সতদিট্ঠি অকুসলেন মগ্গেন পহীনা’’তি.

৮৫১. ন ৱত্তব্বং – ‘‘অত্থি পুথুজ্জনস্স অচ্চন্তনিযামতা’’তি? আমন্তা. ননু ৱুত্তং ভগৱতা – ‘‘ইধ, ভিক্খৱে, একচ্চো পুগ্গলো সমন্নাগতো হোতি একন্তকাড়কেহি অকুসলেহি ধম্মেহি, সো [এৱং খো ভিক্খৱে পুগ্গলো (অ. নি. ৭.১৫)] সকিং নিমুগ্গো নিমুগ্গোৱ হোতী’’তি [অ. নি. ৭.১৫]! অত্থেৱ সুত্তন্তোতি? আমন্তা. তেন হি অত্থি পুথুজ্জনস্স অচ্চন্তনিযামতাতি.

৮৫২. ৱুত্তং ভগৱতা – ‘‘ইধ, ভিক্খৱে, একচ্চো পুগ্গলো সমন্নাগতো হোতি একন্তকাড়কেহি অকুসলেহি ধম্মেহি, সো সকিং নিমুগ্গো নিমুগ্গোৱ হোতী’’তি কত্ৱা তেন চ কাৰণেন অত্থি পুথুজ্জনস্স অচ্চন্তনিযামতাতি? আমন্তা. ৱুত্তং ভগৱতা – ‘‘ইধ, ভিক্খৱে, একচ্চো পুগ্গলো উম্মুজ্জিত্ৱা নিমুজ্জতী’’তি [অ. নি. ৭.১৫]! অত্থেৱ সুত্তন্তোতি? আমন্তা. সব্বকালং উম্মুজ্জিত্ৱা নিমুজ্জতীতি? ন হেৱং ৱত্তব্বে…পে….

ৱুত্তং ভগৱতা – ‘‘ইধ, ভিক্খৱে, একচ্চো পুগ্গলো সমন্নাগতো হোতি একন্তকাড়কেহি অকুসলেহি ধম্মেহি, সো সকিং নিমুগ্গো নিমুগ্গোৱ হোতী’’তি – কত্ৱা তেন চ কাৰণেন অত্থি পুথুজ্জনস্স অচ্চন্তনিযামতাতি? আমন্তা. ৱুত্তং ভগৱতা – ‘‘ইধ, ভিক্খৱে, একচ্চো পুগ্গলো উম্মুজ্জিত্ৱা ঠিতো হোতি, উম্মুজ্জিত্ৱা ৱিপস্সতি ৱিলোকেতি, উম্মুজ্জিত্ৱা পতৰতি, উম্মুজ্জিত্ৱা পতিগাধপ্পত্তো হোতী’’তি [অ. নি. ৭.১৫]! অত্থেৱ সুত্তন্তোতি? আমন্তা. সব্বকালং উম্মুজ্জিত্ৱা পতিগাধপ্পত্তো হোতীতি? ন হেৱং ৱত্তব্বে…পে….

অচ্চন্তনিযামকথা নিট্ঠিতা.