১৮. অট্ঠাৰসমৱগ্গো

(১৮৩) ৭. ঝানন্তৰিককথা

৮১৭. অত্থি ঝানন্তৰিকাতি? আমন্তা. অত্থি ফস্সন্তৰিকা…পে… অত্থি সঞ্ঞন্তৰিকাতি? ন হেৱং ৱত্তব্বে…পে….

অত্থি ঝানন্তৰিকাতি? আমন্তা. দুতিযস্স চ ঝানস্স ততিযস্স চ ঝানস্স অন্তৰে অত্থি ঝানন্তৰিকাতি? ন হেৱং ৱত্তব্বে…পে….

অত্থি ঝানন্তৰিকাতি? আমন্তা. ততিযস্স চ ঝানস্স চতুত্থস্স চ ঝানস্স অন্তৰে অত্থি ঝানন্তৰিকাতি? ন হেৱং ৱত্তব্বে…পে….

দুতিযস্স চ ঝানস্স ততিযস্স চ ঝানস্স অন্তৰে নত্থি ঝানন্তৰিকাতি? আমন্তা. হঞ্চি দুতিযস্স চ ঝানস্স ততিযস্স চ ঝানস্স অন্তৰে নত্থি ঝানন্তৰিকা, নো চ ৱত ৰে ৱত্তব্বে – ‘‘অত্থি ঝানন্তৰিকা’’তি.

ততিযস্স চ ঝানস্স চতুত্থস্স চ ঝানস্স অন্তৰে নত্থি ঝানন্তৰিকাতি? আমন্তা. হঞ্চি ততিযস্স চ ঝানস্স চতুত্থস্স চ ঝানস্স অন্তৰে নত্থি ঝানন্তৰিকা, নো চ ৱত ৰে ৱত্তব্বে – ‘‘অত্থি ঝানন্তৰিকা’’তি.

৮১৮. পঠমস্স চ ঝানস্স দুতিযস্স চ ঝানস্স অন্তৰে অত্থি ঝানন্তৰিকাতি? আমন্তা. দুতিযস্স চ ঝানস্স ততিযস্স চ ঝানস্স অন্তৰে অত্থি ঝানন্তৰিকাতি? ন হেৱং ৱত্তব্বে…পে….

পঠমস্স চ ঝানস্স দুতিযস্স চ ঝানস্স অন্তৰে অত্থি ঝানন্তৰিকাতি? আমন্তা. ততিযস্স চ ঝানস্স চতুত্থস্স চ ঝানস্স অন্তৰে অত্থি ঝানন্তৰিকাতি? ন হেৱং ৱত্তব্বে…পে….

দুতিযস্স চ ঝানস্স ততিযস্স চ ঝানস্স অন্তৰে নত্থি ঝানন্তৰিকাতি? আমন্তা. পঠমস্স চ ঝানস্স দুতিযস্স চ ঝানস্স অন্তৰে নত্থি ঝানন্তৰিকাতি? ন হেৱং ৱত্তব্বে…পে….

ততিযস্স চ ঝানস্স চতুত্থস্স চ ঝানস্স অন্তৰে নত্থি ঝানন্তৰিকাতি? আমন্তা. পঠমস্স চ ঝানস্স দুতিযস্স চ ঝানস্স অন্তৰে নত্থি ঝানন্তৰিকাতি? ন হেৱং ৱত্তব্বে…পে….

৮১৯. অৱিতক্কো ৱিচাৰমত্তো সমাধি ঝানন্তৰিকাতি? আমন্তা. সৱিতক্কো সৱিচাৰো সমাধি ঝানন্তৰিকাতি? ন হেৱং ৱত্তব্বে…পে….

অৱিতক্কো ৱিচাৰমত্তো সমাধি ঝানন্তৰিকাতি? আমন্তা. অৱিতক্কো অৱিচাৰো সমাধি ঝানন্তৰিকাতি? ন হেৱং ৱত্তব্বে…পে….

সৱিতক্কো সৱিচাৰো সমাধি ন ঝানন্তৰিকাতি? আমন্তা. অৱিতক্কো ৱিচাৰমত্তো সমাধি ন ঝানন্তৰিকাতি? ন হেৱং ৱত্তব্বে…পে….

অৱিতক্কো অৱিচাৰো সমাধি ন ঝানন্তৰিকাতি? আমন্তা. অৱিতক্কো ৱিচাৰমত্তো সমাধি ন ঝানন্তৰিকাতি? ন হেৱং ৱত্তব্বে…পে….

৮২০. দ্ৱিন্নং ঝানানং পটুপ্পন্নানমন্তৰে অৱিতক্কো ৱিচাৰমত্তো সমাধীতি? আমন্তা. ননু অৱিতক্কে ৱিচাৰমত্তে সমাধিম্হি ৱত্তমানে পঠমং ঝানং নিৰুদ্ধং দুতিযং ঝানং পটুপ্পন্নন্তি? আমন্তা. হঞ্চি অৱিতক্কে ৱিচাৰমত্তে সমাধিম্হি ৱত্তমানে পঠমং ঝানং নিৰুদ্ধং দুতিযং ঝানং পটুপ্পন্নং, নো চ ৱত ৰে ৱত্তব্বে – ‘‘দ্ৱিন্নং ঝানানং পটুপ্পন্নানমন্তৰে অৱিতক্কো ৱিচাৰমত্তো সমাধি ঝানন্তৰিকাতি.

৮২১. অৱিতক্কো ৱিচাৰমত্তো সমাধি ন ঝানন্তৰিকাতি? আমন্তা. অৱিতক্কো ৱিচাৰমত্তো সমাধি পঠমং ঝানং…পে… দুতিযং ঝানং…পে… ততিযং ঝানং…পে… চতুত্থং ঝানন্তি? ন হেৱং ৱত্তব্বে. তেন হি অৱিতক্কো ৱিচাৰমত্তো সমাধি ঝানন্তৰিকাতি.

৮২২. অৱিতক্কো ৱিচাৰমত্তো সমাধি ঝানন্তৰিকাতি? আমন্তা. ননু তযো সমাধী ৱুত্তা ভগৱতা – সৱিতক্কো সৱিচাৰো সমাধি, অৱিতক্কো ৱিচাৰমত্তো সমাধি, অৱিতক্কো অৱিচাৰো সমাধীতি [দী. নি. ৩.৩০৫, ৩৫৩]? আমন্তা. হঞ্চি তযো সমাধী ৱুত্তা ভগৱতা – সৱিতক্কো…পে… অৱিচাৰো সমাধি, নো চ ৱত ৰে ৱত্তব্বে – ‘‘অৱিতক্কো ৱিচাৰমত্তো সমাধি ঝানন্তৰিকা’’তি.

ঝানন্তৰিককথা নিট্ঠিতা.